గగనవీధుల్లో విమానంలో ఘనంగా వివాహం.. రన్‌వేపై ఊరేగింపు.. వైరల్ వీడియో

ఆకాశమంత పందిరి వేసి.. భూదేవి అంత పీటలు వేసి రంగరంగ వైభవంగా పెళ్లి చేయాలని పెద్ద అంటారు. కానీ, ఓ వ్యాపారవేత్త తన కుమార్తె వివాహాన్ని ఆకాశంలో జరిపించి వార్తల్లో నిలిచారు. ఎవరూ ఊహించని రీతిలో ఏకంగా విమానాన్నే కళ్యాణ వేదికగా చేశాడు. అనంతరం విమానాశ్రయం రన్‌వేపై ఊరేగింపు నిర్వహించారు. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది. భారత్‌కు చెందిన వ్యాపారవేత్త దిలీప్ పోప్లీ.. యూఏఈలో స్థిరపడ్డారు. ఆయన తన కుమార్తె విధి పోప్లీకి నవంబరు 24న ఘనంగా పెళ్లి జరిపించారు.

అందుకు ప్రైవేట్‌ బోయింగ్‌-747లో ఏర్పాట్లు చేశారు. అందులో వరుడు హృదేశ్‌ సైనాని, వధువు విధితో పాటు 350 మంది అతిథులు అందులో బయలుదేరారు. అంతకు ముందు వరుడు బారాత్‌తో డాన్స్‌ చేస్తూ విమాన రన్‌వే వరకు వచ్చారు. దుబాయ్‌ ప్రైవేట్‌ టెర్మినల్‌ నుంచి ఒమన్‌కు బయలుదేరిన ఈ విమానం గగనతలంలో ఉండగానే ఈ జంట వివాహం చేసుకుంది. మూడు గంటల పాటు గాల్లో ప్రయాణించింది.

ఈ ఏర్పాటుపై వరుడు హృదేశ్‌ సైనాని సంతోషం వ్యక్తం చేశాడు. తన మామ దిలీప్ పోప్లీ, తండ్రికి కృత‌జ్ఞ‌త‌లు తెలిపాడు. ‘విధి తన చిన్ననాటి స్నేహితురాలు.. హైస్కూల్‌ వరకూ ఇద్దరం కలిసి చదువుకున్నాం.. ఆమెను వివాహం చేసుకోవడం చాలా చాలా ఆనందంగా ఉంది.. అది విమానంలో ఏర్పాటుచేసిన కళ్యాణ వేదికపై’ అని సంబరపడిపోయాడు. ఈ అనుభవాన్ని జీవితాంతం గుర్తుండిపోయేలా చేసినందుకు ప్రైవేట్ చార్టర్ ఫ్లైట్ ఆపరేటర్ జెటెక్స్‌కు కూడా ఆయన కృతజ్ఞతలు తెలిపారు. వధువు విధి మాట్లాడుతూ.. వధువు విధి పోప్లీ మాట్లాడుతూ.. ‘నేను చాలా ఉత్సాహంగా ఉన్నాను. నేనెప్పుడూ ఊహించలేదు. నా తల్లిదండ్రుల వివాహం కూడా విమానంలోనే జరిగింది.. కానీ నేను అది చూడలేదు.. మా కోసం మళ్లీ అలాంటి ఏర్పాట్లు చేశారు’ అని తెలిపింది. యూఏఈ, భారత్‌లో ప్రతిష్టాత్మక జ్యువెలరీ సంస్థలకు పర్యాయపదంగా ఉన్న పాప్లీ కుటుంబానికి ఇలాంటి వేడుకలు కొత్తేమీ కాదు. పాప్లీ జ్యువెలర్స్ యజమాని లక్ష్మణ్ పోప్లీ, 1994లో ఎయిరిండియా విమానంలో సునీతతో తన కుమారుడు దిలీప్ వివాహాన్ని జరిపించారు.