చేవెళ్ల ఎంపీ అభ్యర్థిగా "పొలిమేర" నటి నామినేషన్.. పవన్ కళ్యాణ్ ఫ్యాన్

ఈసారి లోక్‌సభ ఎన్నికల్లో దేశంలోని వివిధ రాష్ట్రాల్లో ఎంతో మంది సినీ, టీవీ నటులు పోటీ చేస్తున్నారు. అందులో కొందరు ఇప్పటికే రాజకీయాల్లో ఉండగా.. ఈ ఎన్నికలతో రాజకీయ అరంగేట్రం చేస్తున్న వారు చాలా మంది ఉన్నారు. హీరోలు, హీరోయిన్లు, కమెడియన్లు సహా ఎంతో మంది ఈ ఎన్నికల్లో తమ అదృష్టం పరీక్షించుకుంటున్నారు. ఇక తెలుగు రాష్ట్రాల విషయానికి వస్తే ఎన్నికల్లో సినీ గ్లామర్‌ కొంచెం తక్కువగానే ఉంది. ఆంధ్రప్రదేశ్‌లో హిందూపురం నుంచి నటసింహం నందమూరి బాలకృష్ణ, పిఠాపురం నుంచి పవర్‌స్టార్ పవన్ కళ్యాణ్, నగరి నుంచి రోజా సెల్వమణి పోటీలో నిలిచారు. ఇక తెలంగాణలో మాత్రం ఇప్పటివరకు ఏ సినీ నటులు పోటీలో దిగలేదు. ఈ నేపథ్యంలోనే తాజాగా చేవెళ్ల నుంచి మా ఊరి పొలిమేర నటి పోటీ చేస్తున్నారు.

మా ఊరి పొలిమేర 1, మా ఊరి పొలిమేర 2 సినిమాలతో నటిగా గుర్తింపు తెచ్చుకున్న దాసరి సాహితి.. చేవేళ్ల పార్లమెంట్ నియోజకవర్గం నుంచి ఇండిపెండెంట్ అభ్యర్థిగా పోటీ చేస్తున్నారు. ఈ నేపథ్యంలోనే బుధవారం దాసరి సాహితి నామినేషన్‌ దాఖలు చేశారు. రంగారెడ్డి జిల్లా కలెక్టర్, రిటర్నింగ్ అధికారి శశాంకకు తన నామపత్రాలను సమర్పించారు. ఈ క్రమంలోనే ఎన్నికల అఫిడవిట్‌ను కూడా అందించారు. అందులో దాసరి సాహితి తన ఆస్తుల వివరాలను వెల్లడించారు. తనకు సుమారు రూ.5 లక్షలుగా ఎన్నికల అఫిడవిట్‌లో తెలిపారు. తన వయసు 29 ఏళ్లు అని.. ఇంకా పెళ్లి కాలేదని పేర్కొన్నారు.

ఇటీవలె ఇన్‌స్టాగ్రామ్ వేదికగా రాజకీయాల గురించి ప్రస్తావించిన దాసరి సాహితి.. తాను పవర్ స్టార్ పవన్‌ కళ్యాణ్ ఫ్యాన్ అని చెప్పారు. అయితే ఇన్‌స్టాగ్రామ్‌లో తాను రీల్స్‌కు మాత్రం రాజకీయాలను అంటగట్టొద్దని సాహితి కోరారు. ఇక చేవేళ్ల నుంచి ఇప్పటికే కాంగ్రెస్‌ నుంచి రంజిత్‌రెడ్డి, బీజేపీ తరపున కొండా విశ్వేశ్వర్‌రెడ్డి, బీఆర్ఎస్‌ నుంచి కాసాని జ్ఞానేశ్వర్‌ పోటీలో ఉన్నారు. మా ఊరి పొలిమేర, మా ఊరి పొలిమేర 2 సినిమాల్లో దాసరి సాహితి తన నటనతో ఆకట్టుకున్నారు. మా ఊరి పొలిమేర సినిమాలో గెటప్‌ శ్రీను భార్య రాములు పాత్రలో దాసరి సాహితి నటించారు. ఇక మా ఊరి పొలిమేర 2 లో రాజేశ్‌తో కలిసి నటించారు. నితిన్ తీసిన ఎక్స్‌ట్రా ఆర్డినరీ మ్యాన్, సింగర్ సునీత కుమారుడు ఆకాష్ గోపరాజు హీరోగా పరిచయమైన సర్కారు నౌకరి, స్టూడెంట్ ఆఫ్ ది ఇయర్ వంటి సినిమాల్లో దాసరి సాహితీ నటించారు. అంతకుముందు కొన్ని షార్ట్ ఫిలిమ్స్‌లో కూడా దాసరి సాహితీ చేశారు. ఇక యాంకర్ ప్రదీప్ పెళ్లి చూపులు షోలో కూడా ఆమె పాల్గొన్నారు.