మంకీ ఫాక్స్ వ్యాపించే క్రమం ఇదే...వైద్య నిపుణుల ప్రకటన

ప్రపంచాన్ని వణికిస్తోన్న మంకీపాక్స్ వ్యాధిపై వైద్య నిపుణులు దృష్టి సారించారు. ఇందులో భాగంగా మంకీపాక్స్ రోగుల నుంచి వైరస్ ఇతరులకు సంక్రమించే అవకాశం నెలరోజుల పాటు ఉంటుందని ఆరోగ్య నిపుణులు అంటున్నారు. ఈ విషయాన్ని జాన్ హాప్‌కిన్స్ యూనివర్శిటీ వైద్య నిపుణుడు అమేష్ అడాల్జా వెల్లడించారు. "చర్మంపై ఏర్పడే గాయాలు మానడానికి కొన్ని వారాలు సమయం పడుతుందని, ఆ గాయాలు మానేవరకు అది అంటువ్యాధిగానే పరిగణించాలని అమేష్ అడాల్జా అన్నారు.

కరోనా పీడ వదలక ముందే మరో వ్యాధి ప్రపంచాన్ని వణికిస్తుంది. ఈ వ్యాధి తీవ్రత ఏ స్థాయిలో ఉంటుందోనని వైద్య నిపుణులు ఆందోళన చెందుతున్నారు. ఇప్పటికే యూకే, అమెరికా, కెనాడతో సహా అనేక దేశాల్లో ఈ మంకీ పాక్స్ కేసులు వెలుగులోకి వచ్చాయి. ప్రస్తుతం ప్రపంచ వ్యాప్తంగా 80 మంకీపాక్స్ కేసులు నమోదు అయ్యాయి. వీటితోపాటు మరో 50 అనుమానిత కేసులున్నాయి.

ఇదిలావుంటే మంకీపాక్స్ రోగులకు చికిత్స చేయడానికి ఫుడ్ అండ్ డ్రగ్ అడ్మినిస్ట్రేషన్ మశూచి మందును ఆమోదించింది. అయితే ఎప్పటికప్పుడు వ్యాధి పరిస్థితిని అంచనా వేయడానికి రోజు వారీ సమావేశాలను నిర్వహిస్తున్నట్టు ప్రపంచ ఆరోగ్య సంస్థ పేర్కొంది.

మంకీ పాక్స్ వైరస్ సోకిన వ్యక్తులు ముఖం, శరీరంపై దద్దుర్లు, చర్మంపై గాయాలు, జ్వరంతో బాధపడుతుంటారు. ఈ వైరస్ రోగుల శరీర స్రావాలు, మంకీపాక్స్ పుండ్లు, రోగులు దగ్గు, తుమ్ములతో బయటపడిన తుంపర్ల ద్వారా వ్యాపిస్తుంది. ఈ వైరస్ బారిన పడిన వారిలో మొదట ప్లూ వంటి లక్షణాలు కనబడతాయి. ఇప్పటి వరకూ 12 దేశాల్లో 80కిపైగా మంకీపాక్స్ కేసులు నమోదైనట్టు ప్రపంచ ఆరోగ్య సంస్థ వెల్లడించింది. మరో 50 అనుమానిత కేసులను పరిశీలిస్తున్నట్టు పేర్కొంది. అలాగే భవిష్యత్తులో మరిన్ని కేసులు నమోదయ్యే అవకాశం ఉందని హెచ్చరించింది. తొమ్మిది యూరోపియన్ దేశాలతో పాటు అమెరికా, కెనడా, ఆస్ట్రేలియాలో ఇన్ఫెక్షన్లు నిర్ధారించబడ్డాయి.