ఆకట్టుకున్న ఇంగ్లండ్‌... ఇంగ్లండ్‌దే టి20 సిరీస్‌
international | Suryaa Desk | Published : Sat, Jun 26, 2021, 11:01 AM
ఆల్‌రౌండ్‌ ప్రదర్శనతో ఆకట్టుకున్న ఇంగ్లండ్‌ జట్టు శ్రీలంకతో జరుగుతున్న మూడు మ్యాచ్‌ల టి20 సిరీస్‌ను మరో మ్యాచ్‌ మిగిలి ఉండగానే 2-0తో సొంతం చేసుకుంది. వర్షం అంతరాయం కలిగించిన రెండో టి20 మ్యాచ్‌లో ఇంగ్లండ్‌ డక్‌వర్త్‌ లూయిస్‌ పద్ధతిలో ఐదు వికెట్ల తేడాతో గెలిచింది. తొలుత బ్యాటింగ్‌కు దిగిన శ్రీలంక 20 ఓవర్లలో 7 వికెట్లకు 111 పరుగులు చేసింది. కుశాల్‌ మెండిస్‌ (39; 3 ఫోర్లు, సిక్స్‌) టాప్‌ స్కోరర్‌గా నిలిచాడు. ఇంగ్లండ్‌ బౌలర్లలో మార్క్‌ వుడ్‌ (2/18), ఆదిల్‌ రషీద్‌ (2/24) రాణించారు.
ఇంగ్లండ్‌ ఇన్నింగ్స్‌ సమయంలో వర్షం రావడంతో ఆ జట్టు లక్ష్యాన్ని 18 ఓవర్లలో 103 పరుగులుగా నిర్ణయించారు. ఇంగ్లండ్‌ 16.1 ఓవర్లలో 5 వికెట్లు కోల్పోయి 108 పరుగులు చేసి గెలి చింది. సామ్‌ బిల్లింగ్స్‌ (24; 2 ఫోర్లు), 'మ్యాన్‌ ఆఫ్‌ ద మ్యాచ్‌' లివింగ్‌స్టోన్‌ (26 బంతుల్లో 29 నాటౌట్‌; సిక్స్‌), సామ్‌ కరన్‌ (8 బంతుల్లో 16 నాటౌట్‌; ఫోర్, సిక్స్‌) రాణించి ఇంగ్లండ్‌ విజయాన్ని ఖాయం చేశారు. చివరిదైన మూడో టి20 మ్యాచ్‌ నేడు జరుగుతుంది.
|
|