కొలంబియాలోని ప్రాడో మునిసిపాలిటిలో దారుణం చోటుచేసుకుంది. ఓ పదేళ్ల బాలికపై ఓ వ్యక్తి లైంగిక దాడి చేయడంతో ఆ బాలిక గర్భం దాల్చి ఓ బిడ్డకు జన్మనిచ్చింది. ఆ బాలికకు ఎనిమిదేళ్ల వయసు ఉన్నప్పటి నుంచే ఆమెపై లైంగిక దాడి జరుగుతున్నట్లు అధికారులు భావిస్తున్నారు. ఆమె బిడ్డకు జన్మనిచ్చిన విషయం నెల రోజులు ఆలస్యంగా అధికారుల దృష్టికి వచ్చింది. అధికారులు ఆ బాధితురాలిని, ఆమె బిడ్డను ప్రస్తుతం ఇబాకో నగరంలోని వైద్య సంరక్షణ కేంద్రంలో ఉంచారు.
అయితే తనపై జరిగిన దారుణం గురించి, తన బిడ్డకు తండ్రి ఎవరన్న విషయంపై ఆ బాలిక ఏం చెప్పలేకపోతుంది. బాలికకు జరిగిన దారుణం గురించి ఆలస్యంగా వెలుగు చూసిందని ఆ ప్రాంత గవర్నర్ రికార్డో ఒరోజ్కో తెలిపారు. దీనిపై కేసు నమోదు చేశామని, ఆమెపై ఈ దారుణానికి ఒడిగట్టిన వారు ఎవరో తెలుసుకునేందుకు ప్రయత్నిస్తున్నామని తెలిపారు. ఇద్దరు వ్యక్తులను అనుమానిస్తున్నామని తెలిపారు. ఆ బాలిక సవతి తండ్రి(43), పొలాల్లో పని చేసే మరో యువకుడిని అదుపులోకి తీసుకున్నామని చెప్పారు.