చరిత్ర సృష్టించాలన్నా ఆయనే. . దాన్ని తిరగరాయాలన్నా

ఆయన పేరు చెబితే బాక్సాఫీస్ రికార్డ్స్ తరుచుగా షేక్ అవుతూ ఉంటాయ్.. చరిత్ర సృష్టించాలన్నా ఆయనే. . దాన్ని తిరగరాయాలన్నా ఆయనే.. వారసుడిగా చిన్నతనంలోనే సినీ రంగ ప్రవేశం చేసి... తండ్రి ఒడిలో నటనలో ఓనమాలు దిద్దారు. పౌరాణికం, జానపదం, భక్తిరసం, సోషియాఫాంటసీ, సాంఘికం, మాస్ , క్లాస్ ఇలా జోనర్ ఏదైనా సరే.. తండ్రికి తగ్గ తనయుడిగా నందమూరి నట వారసుడిగా తెలుగు సినిమా హిస్టరిలో తన మార్క్ చూపించి నేటికీ ‘పైసా వసూల్’‌లో లెజెండ్.. బాలయ్య పుట్టినరోజు నేడు.

విశ్వవిఖ్యాత నటసార్వభౌముడి వారసుడిగా వెండి తెరకు పరిచయమైన నందమూరి బాలకృష్ణ అద్భుత నటనాకౌశల్యంతో అగ్రనటుడిగా ఎదిగాడు. బాలయ్య సినీ ప్రయాణంలో ఎన్నో మలుపులు మరెన్నో మైలు రాళ్లు, ప్రయోగాలకు కేరాఫ్ అడ్రస్‌గా పట్టుదలతో ముందుకు సాగే తత్వం ఆయన్ను నటసింహంగా మార్చాయి.1974లో వచ్చిన ‘తాతమ్మ కథ’ చిత్రం ద్వారా బాలయ్య నటుడిగా పరిచయం అన్నారు. తండ్రిలో పాటు ఎన్నో చిత్రాల్లో చిన్న చిన్న పాత్రలు పోషించారు. అక్కడే నటనలో ఓనమాలు దిద్దారు. దానవీర శూర కర్ణ, అక్బర్ సలీం,అనార్కలి సినిమాలు బాలయ్య కెరియర్‌ను మలుపుతిప్పాయి.

ఇక 1984లో ‘సాహసమే నా ఊపిరి’ చిత్రంతో హీరోగా రంగప్రవేశం చేశారు. ఆ తరువాత మంగమ్మ గారి మనువడు చిత్రంతో తెలుగు సినిమా హిస్టరీలో రికార్డ్‌ల వేటను ప్రారంభించాడు బాలయ్య. దంచవే మేనత్త కూతురా.. అంటూ బాక్సాఫీస్ రికార్డ్స్‌ను దంచేపారేశాడు.ఆ తరువాత కుటుంబ కథా చిత్రాలతో ముద్దుల మావయ్య, నారీ నారీ నడుమ మురారీ లాంటి వరుస చిత్రాలతో టాప్ హీరోగా ఎదిగాడు. శ్రీ రామరాజ్యం, భైరవ ద్వీపం, ఆదిత్య 369 , పాండురంగడు లాంటి చిత్రాలతో ప్రయోగాలు చేసి ఆయనలోని విభిన్న కోణాలను పరిచయం చేశారు.

ఆ తరువాత మూసదోరణికి స్వస్తి చెప్పి సమర సింహా రెడ్డి, నరసింహ నాయుడు, చెన్నకేశవరెడ్డి , సీమసింహం లాంటి చిత్రాలతో తనలోని సీమ పౌరుషంలోని వాడిని వేడిని తెరపై చూపించి సరికొత్త ట్రెండ్‌ను క్రియేట్ చేశాడు. సింహా, లెజెండ్ చిత్రాలతో ఇక టాలీవుడ్ ఇలాంటి పాత్రను చేయాలంటే బాలయ్య తరువాతే ఎవరైనా అన్నంత రేంజ్‌లో మాస్ ప్రేక్షలను థియేటర్స్‌కు పరుగులు పెట్టించి నేటికి ‘పైసా వసూల్’లో హిస్టరీ రిపీట్ చేస్తునే ఉన్నాడు బాలకృష్ణ.గౌతమిపుత్ర శాతకర్ణి మూవీతో తెలుగు తెరపై 100 చిత్రాలను పూర్తి చేసి.. పూరి జగన్నాథ్ దర్శకత్వంలో 101 చిత్రంగా ‘పైసా వసూల్ ’ తో ప్రేక్షకుల ముందుకు రాబోతున్నారు బాలకృష్ణ.