అట్లుంటది జలీల్‌ఖాన్‌తో.. ఇచ్చిపడేశారుగా.. వేదికపై నవ్వులే, నవ్వులు

జలీల్‌ఖాన్.. విజయవాడ రాజకీయాల్లో పరిచయం అక్కర్లేని పేరు. కాంగ్రెస్ పార్టీలో, వైఎస్సార్‌సీపీలో, ఇప్పుడు టీడీపీలో సీనియర్ నేతగా ఉన్నారు. ఈసారి ఎన్నికల్లో విజయవాడ పశ్చిమ నియోజకవర్గం నుంచి టికెట్ ఆశించారు. కానీ పొత్తుల్లో భాగంగా ఈ సీటు బీజేపీకి దక్కగా.. సుజనా చౌదరి అభ్యర్థిగా ఉన్నారు. జలీల్‌ఖాన్‌ను పిలిచిన టీడీపీ అధిష్టానం బుజ్జగించింది.. దీంతో ఆయన కూటమి అభ్యర్థులైన సుజనా చౌదరి, కేశినేని చిన్ని గెలుపు కోసం పనిచేస్తున్నారు.. ప్రచారాన్ని ముమ్మరం చేశారు. ఈ క్రమంలో ఓ ఆసక్తికర సన్నివేశం జరిగింది.. జలీల్‌ఖాన్ దెబ్బకు నేతలంతా అవాక్కయ్యారు. సోషల్ మీడియాలో వీడియో వైరల్ అవుతోంది.

విజయవాడ పశ్చిమ నియోజకవర్గంలోని ఎన్ కన్వెన్షన్ సెంటర్‌లో సమావేశం నిర్వహించారు. ఈ జనసేన పార్టీ విస్తృత సమావేశంలో కూటమి పార్లమెంట్ అభ్యర్థి కేశినేని శివనాథ్ (చిన్ని), సుజనా చౌదరి, మాజీ ఎమ్మెల్యే టీడీపీ నేత జలీల్ ఖాన్ పాల్గొన్నారు. వేదికపై జలీల్‌ఖాన్ మాట్లాడే సమయంలో ఆసక్తికర సన్నివేశం కనిపించింది. జలీల్ ఓ వైపు ప్రసంగం చేస్తుండగా.. వేదికపై మరోవైపు సుజనా చౌదరి, కేశినేని చిన్నిలు మాట్లాడుకుంటూ కనిపించారు. మధ్యలో ప్రసంగం ఆపేసిన జలీల్‌ఖాన్ ఇద్దరు నేతల్ని పిలిచారు.. వాళ్లు మాత్రం వాళ్ల కబుర్లలో మునిగిపోయారు.

వెంటనే జలీల్‌ఖాన్.. సార్ సుజనా చౌదరి గారు, హలో, ఎంపీగారు, ఎమ్మెల్యేగారు అంటూ పిలిచారు.. అప్పుడు వాళ్లు స్పందించారు. ఏంటండి ఇది అన్నట్లుగా సైగలు చేసిన జలీల్.. ఇది మీటింగ్ అండి.. ఏవైనా రహస్యాలు ఉంటే ఇంటికెళ్లి మాట్లాడుకోండి అంటూ చురకలంటించారు. 'మీ కోసం 2వేలమంది రెండు గంటలుగా వెయిట్ చేస్తున్నారు.. ముస్లింలు, కాపులు వచ్చారు.. వాళ్లు చాలా మర్యాద ఇస్తారు, గౌరవిస్తారు. తిక్కలేచిందంటే తాట తీస్తారు.. వీళ్లతో చాలా జాగ్రత్తగా చూసుకోవాలి మనం' అన్నారు జలీల్‌ఖాన్. మాజీ ఎమ్మెల్యే వ్యాఖ్యలతో వేదికపై ఉన్న వారంతా పెద్దగా నవ్వారు. సమావేశానికి వచ్చిన వారు కూడా నవ్వుకుంటూ కనిపించారు.

జలీల్‌ఖాన్ వీడియో సోషల్ మీడియాలో వైరల్ అవుతోంది. అట్లుంటది జలీల్‌‌‌ఖాన్‌తో అంటూ కొందరు నెటిజన్లు కామెంట్స్ చేస్తున్నారు. 'ఏమైపోయావు అన్న. ఒక డైలాగ్ తో ఎంపీ మ్మెల్యే సైలెంట్ అయ్యారు.. ఏమైనా జలీల్ ఖాన్.. తోపు వీలుంటే ఆపు' అంటూ మరో నెటిజన్ వీడియోను షేర్ చేశారు. మొత్తానికి చాలా రోజుల తర్వాత జలీల్‌‌ఖాన్ సోషల్ మీడియాలో ట్రెండింగ్‌లోకి వచ్చారు. గతంలో జలీల్‌ఖాన్ బీకామ్‌లో ఫిజిక్స్ డైలాగ్‌‌తో ఫేమస్ అయ్యారు. ఇప్పుడు మళ్లీ వీడియోతో సోషల్ మీడియాలో వైరల్ అవుతున్నారు.