చంద్రబాబు దళిత వ్యతిరేకి... మేకపాటి సుచరిత

వై.ఎస్.జగన్ అన్నతోనే తన ప్రయాణమని, వైసీపీలోనే కొనసాగుతానని మాజీ హోంమంత్రి, ప్రత్తిపాడు ఎమ్మెల్యే మేకతోటి సుచరిత స్పష్టంచేశారు. దళిత వ్యతిరేకి చంద్రబాబు అని.. అందుకే తెలుగుదేశం పార్టీ 23 ఎమ్మెల్యే స్థానాలకు పరిమితం అయ్యిందని ఆమె వ్యాఖ్యానించారు. వైఎస్సార్సీపీ పాలనలో.. దళితులకు పూర్తి సంక్షేమ ఫలాలు అందుతున్నాయని స్పష్టం చేశారు. గురువారం మీడియాతో మాట్లాడిన సుచరిత అనేక అంశాలపై క్లారిటీ ఇచ్చారు. దళితులుగా పుట్టాలని ఎవరైనా కోరుకుంటారా?.. అని ఆనాడు చంద్రబాబు చేసిన వ్యాఖ్యలను గుర్తు చేసిన సుచరిత.. భారత రాజ్యాంగాన్ని రాసిన మహానుభావుడు పుట్టిన కులంలో తను పుట్టడం అదృష్టంగా భావిస్తున్నానని స్పష్టం చేశారు. ఎవరూ ఎన్ని కుట్రలు చేసిన ప్రజాశీర్వాదం జగన్‌కో ఉందని చెప్పారు.

తాను పార్టీ మారుతున్నానంటూ సోషల్ మీడియాలో వస్తున్న వార్తలను మేకతోటి సుచరిత ఖండించారు. సోషల్ మీడియాలో వస్తున్న ఊహాగానాలను ఆధారంగా తీసుకొని కొన్ని ప్రధాన ఛానళ్లు.. పేపర్లలో వస్తున్న కథనాలపై ఆగ్రహం వ్యక్తం చేశారు. కావాలనే ఓ వర్గం మీడియా ఈ దుష్ప్రచారానికి తెరలేపారని ఫైర్ అయ్యారు. ఇలాంటి వాటిని ప్రచురించే ముందు నేరుగా తనని సంప్రదించవచ్చని స్పష్టం చేశారు. పార్టీ మారడం కంటే.. తాను ఇంటికే పరిమితమవుతానని స్పష్టం చేశారు. వైఎస్సార్ (YSR) ఆశీర్వాదంతో.. 2009లో ప్రత్తిపాడు ఎమ్మెల్యేగా తాను ఎన్నికయ్యానని వివరించారు.

వైఎస్సార్ మరణం తర్వాత.. ఎమ్మెల్యేగా రాజీనామాను చేసి ఆనాడు జగన్ వెంట నడిచానని సుచరిత గుర్తు చేశారు. కడవరకు జగన్‌కు తోడుగా.. వైసీపీకి విధేయురాలిగా ఉంటానని ఉద్ఘాటించారు. విలువలతో కూడిన.. నిజాయతీ కలిగిన నేత సీఎం జగన్ అని కొనియాడారు. జగన్ ఆశీర్వదించి ఎక్కడ పోటీ చేయమంటే అక్కడినుంచి పోటీ చేస్తానని స్పష్టం చేశారు. విద్యా వ్యవస్థలో సీఎం జగన్ మార్పులు తీసుకువచ్చి.. భావితరాలకు బాటలు వేస్తున్నారని వ్యాఖ్యానించారు. ఎమ్మెల్యేల ఫోన్ ట్యాపింగ్ చేయాల్సిన అవసరం ప్రభుత్వానికి లేదని.. కావాలనే కొందరు పార్టీ అధినాయకత్వంపై బురద జల్లుతున్నారని ఆగ్రహం వ్యక్తం చేశారు.