కిమ్ బెదిరింపులతో జపాన్‌లో యుద్ధభయం

పక్కలో బల్లెంలా తయారైన ఉత్తర కొరియాతో ఎప్పటికైనా ముప్పు తప్పదని భావిస్తోన్న జపాన్, ఒకవేళ యుద్ధం అనివార్యమైతే దాన్ని ఎలా ఎదుర్కోవాలో సిద్ధమవుతోంది. ఇందు కోసం రెండో ప్రపంచయుద్ధం తరువాత తొలిసారిగా మాక్ డ్రిల్‌ను నిర్వహిస్తోంది. దాదాపు ఏడు దశాబ్దాల తర్వాత మిలటరీ డ్రిల్ నిర్వహించి, అత్యవసర పరిస్థితి తలెత్తితే రాజధాని టోక్యోను ఎలా వదిలి వెళ్లాలన్న విషయమై ప్రజల్లో అవగాహన కల్పిస్తోంది. దీనిలో భాగంగా నగరమంతా మైకుల ద్వారా అణుబాంబు దాడి జరగనుందని హెచ్చరిస్తూ, తక్షణమే అండర్ గ్రౌండ్‌కు వెళ్లిపోవాలని ఆదేశాలు జారీచేసింది. టోక్యో అమ్యూజిమెంట్ పార్క్ వేదికగా సాగిన ఈ డ్రిల్‌లో భాగంగా... ఆ ప్రాంగణంలో ఉన్న వారందరికీ "మిసైల్ దూసుకొస్తోంది... మిసైల్ దూసుకొస్తోంది" అని కేకలు వేస్తూ పోలీసులు పరుగులు తీశారు.

ప్రతి ఒక్కళ్లూ సురక్షిత భవనాలు, భూగర్భ గృహాలు, పక్కనే ఉన్న సబ్‌వే రైల్వే‌స్టేషన్‌లోకి నిదానంగా వెళ్లిపోవాలని భద్రతా సిబ్బంది సూచించారు. అటుపై కొద్ది నిమిషాల తరువాత, మిసైల్ గ్రేటర్ టోక్యో రీజియన్‌ను దాటి పసిఫిక్ మహాసముద్రం వైపు వెళ్లిపోయిందన్న రెండో ప్రకటన వినిపించింది. అయితే ఇప్పటి వరకూ భూకంపాలు సంభవించినప్పుడు ఎలా తప్పించుకోవాలన్న విషయంపై ప్రజల్లో అవగాహన కలిగించేందుకు జపాన్ ప్రభుత్వం తరుచూ మాక్ డ్రిల్స్‌ను నిర్వహిస్తోంది. తాజాగా అణుయుద్ధం ముప్పు కూడా పొంచి ఉండటంతో, నగరంలో మరిన్ని భూగర్భ గృహాలను నిర్మిస్తోంది. ఈ డ్రిల్ కంటే ఉత్తర కొరియా క్షిపణి దాడిచేయకూడదని దేవుణ్ని ప్రార్థిస్తున్నాని షూటా మత్సుహిమా అనే విద్యార్థి వ్యాఖ్యానించాడు.

అయితే ఈ డ్రిల్ వల్ల విపత్కర పరిస్థితుల్లో ఎలా తప్పించుకోవాలో అవగాహన ఏర్పడుతుందని, ఇది చాలా మంచిదని మరో విద్యార్థి కన ఒకకుని అన్నాడు. దక్షిణ కొరియా వేదికగా ఫ్రిబవరి 9 నుంచి ఆరంభం కానున్న వింటర్ ఒలింపిక్స్ నేపథ్యంలో ఉత్తర కొరియా ఎలా వ్యవహరిస్తోందననే ఆందోళన ప్రపంచ దేశాల్లో మొదలైంది. గతేడాది ఉత్తర కొరియా ప్రయోగించిన మూడు క్షిపణులు జపాన్ ద్వీపం మీదుగానే ప్రయాణించాయి. దీంతో జపాన్ అప్రమత్తమైంది.