ట్రెండింగ్
Epaper    English    தமிழ்

బాల మేధస్సుకు...గిన్నిస్ బుక్ రికార్డ్ లో చోటు

national |  Suryaa Desk  | Published : Sun, Aug 07, 2022, 11:34 PM

బాల మేధస్సు ను గిన్నిస్ బుక్ గుర్తించింది. తన రికార్డ్ లో చోటు ఇచ్చింది. అంతే తానున్న రాష్ట్రంలోని ప్రముఖులంతా ఆ బాల మేధావికి సలాం కొడుతున్నారు. హర్యాణాకు  చెందిన ఓ పిల్లవాడు అదరగొట్టాడు. కేవలం పన్నేండేళ్ల వయస్సులోనే గిన్నీస్ వరల్డ్ రికార్డ్ సృష్టించాడు. అంతగా ఏం చేశాడనుకుంటున్నారా..? ఆల్‌మోస్ట్ అద్భుతమే చేశాడని చెప్పాలి. ఇంత చిన్న వయస్సులోనే మూడు యాప్‌లను అభివృద్ధి చేశాడు. అది కూడా యూట్యూబ్‌ను చూసి యాప్‌లను డెవలప్‌ చేశాడు. ఆ బాల మేధావి పేరు కార్తికేయ జఖర్. ప్రపంచంలోనే అత్యంత పిన్న వయస్కుడైన యాప్ డెవలపర్‌గా గిన్నిస్ వరల్డ్ రికార్డ్ సృష్టించాడు.


కార్తికేయ జఖర్ ఝజ్జర్‌లోని జవహర్ నవోదయ విద్యాలయలోని ఎనిమిదో తరగతి చదువుతున్నాడు. అయితే యూట్యూబ్ సహకారంతో మూడు యాప్‌లను రూపొందించాడు. అయితే జఖర్ యాప్‌లను చాలా యాక్సిడెంటల్‌గానే తయారు చేశాడు. కరోనా లాక్‌డౌన్ సమయంలో అందరికీ ఆన్‌లైన్ తరగతులు మొదలయ్యాయి. అప్పుడు కార్తికేయ జఖర్ తండ్రి రూ.10,000 పెట్టి ఓ ఫోన్‌ను కొనుగోలు చేశాడు. అయితే ఆ ఫోన్‌‌లో చాలా సమస్యలు వచ్చేవి.


అయితే కార్తికేయ జఖర్ చాలా తెలివైన వాడు కావడంతో ఆ ఫోన్ రిపేర్ చేయడానికి యూట్యూబ్‌ను ఆశ్రయించాడు. యూట్యూబ్‌లో కోడింగ్ నేర్చుకున్నాడు. అలాగే మొబైల్‌లో ఉత్పన్నమయ్యే సమస్యలను పరిష్కరించాడు. "కోడింగ్‌లో సమస్యతో మొబైల్ ఫోన్ చాలాసార్లు హ్యాంగ్ అయింది. యూట్యూబ్ సాయంతో నేను ఫోన్‌ని సరిచేసి నా చదువును కొనసాగించాను." అని జఖర్ చెప్పాడు. తర్వాత యూట్యూబ్ ద్వారా కొన్ని నేర్చుకుని జనరల్ నాలెడ్జ్‌, కోడింగ్, గ్రాఫిక్ డిజైనింగ్, డిజిటల్ ఎడ్యుకేషన్‌కు సంబంధించిన యాప్‌లను రూపొందించాడు.


"నేను మూడు యాప్‌లను తయారు చేశాను. మొదటిది లూసెంట్ జీకే ఆన్‌లైన్‌లో జనరల్ నాలెడ్జ్‌కి సంబంధించినది. రెండోది కోడింగ్, గ్రాఫిక్ డిజైనింగ్‌ను బోధించే రామ్ కార్తీక్ లెర్నింగ్ సెంటర్. మూడోది శ్రీ రామ్ కార్తీక్ డిజిటల్ ఎడ్యుకేషన్. ఇప్పుడు ఈ యాప్‌లు 45,000 మంది విద్యార్థులకు ఉచిత శిక్షణను అందిస్తున్నాయి." అని కార్తికేయ జఖర్ చెప్పాడు. అంతేకాదు తాను ప్రధాని నరేంద్ర మోదీ నుంచి ప్రేరణ పొందానని, ఏదో ఒక రోజు దేశానికి సేవ చేయాలని అనుకుంటున్నాని జఖర్ అంటున్నాడు. అలాగే జఖర్ హార్వర్డ్ నుంచి స్కాలర్‌షిప్‌ను గెలుచుకున్నాడు.


ఇక కార్తికేయ జఖర్ సాధించిన విజయాల పట్ల బాలుడి తల్లిదండ్రులు ఎంతో ఆనందం వ్యక్తం చేస్తున్నారు.


కార్తికేయ తండ్రి అజిత్ జఖర్ వృత్తి రీత్యా రైతు. కృషి, సంకల్పంతోనే తన కొడుకు విజయాలు సాధించాడని అజిత్ జఖర్ అన్నారు. ఈ సందర్భంగా తన కొడుకు ప్రభుత్వం నుంచి అందిస్తే మరిన్ని అప్లికేషన్‌లను అభివృద్ధి చేస్తాడని ఆయన అన్నారు. "నా కొడుకు ఇతర అప్లికేషన్‌లను అభివృద్ధి చేయడానికి సాయం చేయమని నేను ప్రభుత్వాన్ని కోరుతున్నాను. అతను కార్తికేయ ప్రతిభావంతుడు. డిజిటల్ టెక్నాలజీలో దేశానికి సేవ చేయాలని నేను కోరుకుంటున్నాను. మా గ్రామంలో కరెంట్ కోతలు ఎక్కువగా ఉన్నాయి. ఇలాంటి సమస్య మధ్య కూడా కార్తికేయ ఎన్నో చేస్తున్నాడు." అని అజిత్ జఖర్ తెలియజేశారు.


కార్తికేయ ప్రతిభపై హర్యాణా సీఎం మనోహర్ లాల్ ఖట్టర్ స్పందించారు. బాలుడి విజయాలను ప్రశంసిస్తూ ట్విట్టర్‌లో ట్వీట్ చేశారు. "జజ్జర్‌కు చెందిన పన్నెండేళ్ల కార్తికేయ అతి పిన్న వయస్కుడైన యాప్ డెవలపర్‌గా గిన్నిస్ వరల్డ్ రికార్డ్ సృష్టించాడు. క్రీడలు, సంస్కృతి, కళలే కాదు.. హర్యాణా యువత ప్రపంచ స్థాయిలో సాంకేతికతలో ప్రశంసనీయమైన పని చేస్తున్నారు." అని ఆయన పేర్కొన్నారు.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com