లాప్ టాప్ ను ఇలా వాడితే...మీకు ఛార్జీంగ్ సమస్యే రాదు

ల్యాప్ టాప్ తీసుకోవడమే కాదు వాటిని ఎలా వాడుకోవాలో కూడా మనకు అవగాహన ఉండాలి. అలా అవగాహన ఉన్నపుడే మనం వాడే ల్యాప్ టాప్ సుధీర్ఘకాలం నడుస్తుంది. ల్యాప్‌టాప్‌ లను ప్రస్తుతం చాలా మంది వాడుతున్నారు. వర్క్ ఫ్రమ్ హోమ్ అయినా.. ఆఫీస్ నుంచి పని చేసినా.. ఆన్‌లైన్ క్లాసులైనా ఇప్పుడు ల్యాప్‌టాప్‌లనే ఎక్కువగా ఉపయోగిస్తున్నారు. సినిమాలు, గేమ్స్‌కు లాంటి ఎంటర్‌టైన్‌మెంట్‌కు కూడా ల్యాప్‌లు బెస్ట్ ఆప్షన్‌గా ఉన్నాయి. ఇలా ల్యాప్‌టాప్‌లో ఏ పని చేసుకోవాలన్నా బ్యాటరీ లైఫ్ ఎంతో ముఖ్యం. అందుకే ల్యాప్‌టాప్‌ చార్జింగ్ ఎక్కువ సేపు ఉండాలని చాలా మంది అనుకుంటారు. అందుకే కొన్ని టిప్స్ పాటిస్తే సాధారణం కన్నా మీ ల్యాప్‌టాప్‌ బ్యాటరీ లైఫ్ పెరుగుతుంది. ఎక్కువ సేపు చార్జింగ్ పెట్టకుండానే వాడుకోవచ్చు. ఇలా మీ ల్యాప్‌టాప్‌ బ్యాటరీ లైఫ్ మెరుగయ్యేందుకు పాటించాల్సిన టిప్స్ ఇవే.

చార్జింగ్‌ ఎక్కువ సేపు వచ్చేలా విండోస్ 10లో పవర్ సేవింగ్ సెట్టింగ్స్ బాగా ఉపయోగపడతాయి. స్టార్ట్ సెర్చ్‌బార్‌లో పవర్ సేవర్ అని టైప్ చేస్తే పవర్ ఆప్షన్స్ కనిపిస్తాయి. మానిటర్ పవరింగ్ ఆఫ్, స్లీప్ మోడ్‌కు త్వరగా వెళ్లడం లాంటి ఆప్షన్లు ఉంటాయి. అలాగే టాస్క్‌బార్‌‌లోని బ్యాటరీ ఐకాన్‌పై క్లిక్ చేసి కూడా పవర్ సెట్టింగ్స్‌ను మార్చుకోవచ్చు. ల్యాప్‌టాప్‌లో ఎక్కువగా బ్యాటరీని వాడుకునే భాగం స్క్రీన్. ఫుల్ బ్రైట్‌నెస్ పెడితే చార్జింగ్ త్వరగా అయిపోతుంది. అందుకే బ్యాటరీ లైఫ్ ఎక్కువ సేపు ఉండాలనుకున్నప్పుడు స్క్రీన్ బ్రైట్‌నెస్‌ను తగ్గించండి.. దీని ద్వారా చార్జింగ్ చాలా వరకు సేవ్ అవుతుంది.

ల్యాప్‌టాప్‌లకు చాలా మంది మౌస్‌లు, ఎక్స్‌టర్నల్ కీబోర్డులు వాడుతుంటారు. అలాగే ఎక్స్‌టర్నల్ హార్డ్‌డ్రైవ్‌లు, వెబ్‌క్యామ్ వినియోగిస్తుంటారు. అయితే అవసరం అయిపోయాక వాటిని తీసేయాలి. ముఖ్యంగా ఎక్స్‌టర్నల్ హార్డ్‌డ్రైవ్‌లు, యూఎస్‌బీలు లాంటివి డేటా ట్రాన్స్‌ఫర్ అయిన వెంటనే తీసేయాలి. లేకపోతే అవి కూడా పవర్‌ను వినియోగించుకుంటాయి. ఒకవేళ డిస్క్ డ్రైవ్ ఉంటే.. దానిలో డిస్క్‌ను తొలగించాలి.

వైర్‌లెస్‌ నెట్‌వర్క్ ఫీచర్లు కూడా ల్యాప్‌టాప్‌ బ్యాటరీని ఎక్కువగా వినియోగించుకుంటాయి. అందుకే అవసరం లేని సమయాల్లో వైఫై (Wifi)ని ఆఫ్ చేయాలి. అలాగే వినియోగించనప్పుడు బ్లూటూత్‌ను బంద్ చేయాలి.

ల్యాప్‌టాప్‌ పూర్తిగా బ్యాటరీ అయిపోయే ముందే చార్జింగ్ పెట్టాలి. వీలైనంత మేర 20 శాతానికి తగ్గకముందే చార్జ్ చేస్తే బెటర్. అలాగే 100శాతం పూర్తయినా చాలా మంది గంటల పాటు అలాగే చార్జింగ్ పెట్టి పని చేస్తుంటారు. ఇది కూడా మంచిది కాదు. బ్యాటరీ ఎక్కువ కాలం బాగా ఉండాలంటే పూర్తిగా అయిపోయే ముందే చార్జ్ చేస్తూ.. 100శాతం పూర్తయ్యాక ఆపేయాలి. ఒకవేళ అవసరం లేని సాఫ్ట్‌వేర్‌లు ఆటోస్టార్‌లో ఉంటే వాటిని డిసేబుల్ చేయండి. టాస్క్ మెనేజర్ స్టార్ట్‌ఆప్‌లో ఇవి ఉంటాయి. వీటిని డిసేబుల్ చేస్తే.. ల్యాప్‌టాప్‌ ఆన్ చేయగానే రన్ అయ్యే పర్మిషన్‌ను తీసేసినట్టే. అలాగే ఏవైనా అదనంగా గ్రాఫిక్ ఎఫెక్ట్స్ ఆన్‌లో ఉన్నా డిసేబుల్ చేయండి. దీనివల్ల కూడా బ్యాటరీ లైఫ్ మెరుగుపరుచుకోవచ్చు.

ల్యాప్‌టాప్‌ ఎక్కువగా హీట్ అయితే కూడా చార్జింగ్ త్వరగా అయిపోయే అవకాశాలు ఉంటాయి. అందుకే కూల్‌గా ఉండేలా జాగ్రత్తలు తీసుకోవాలి. మరీ ఎక్కువగా హీట్ అవుతుంటే ప్రాసెస్‌లు కాసేపు ఆపేయాలి.