ఓ వ్యక్తి ఓ మహిళను నాలుగు సార్లు పెళ్లి చేసుకున్నాడు. ఆమెకు మూడు సార్లు విడాకులు ఇచ్చి.. మళ్లీ ఆమెనే పెళ్లి చేసుకున్నాడు. అతడు సెలవుల కోసమే ఇలా చేశాడని తెలిసి అందరూ షాక్ అవుతున్నారు. ఈ ఘటన తైవాన్ దేశంలోని తైపై నగరంలో జరిగింది...తైవాన్ దేశంలోని తైపై నగరంలో ఓ వ్యక్తి బ్యాంకులో క్లర్క్ గా పనిచేస్తున్నాడు. ఆ దేశ లేబర్ చట్టాల ప్రకారం ఎవరైనా ఉద్యోగి పెళ్లి చేసుకుంటే 8 రోజుల వేతనంతో కూడిన సెలవును మంజూరు చేయాల్సి ఉంటుంది. అందుకే అతడు తన సెలవుల కోసం ఒకే మహిళను నాలుగుసార్లు పెళ్లి చేసుకున్నాడు. గతేడాది ఏప్రిల్ 6వ తేదీన అతడు ఓ మహిళను పెళ్లి చేసుకున్నాడు. నిబంధనల ప్రకారం 8 రోజుల సెలవు కోసం బ్యాంకులో దరఖాస్తు చేసుకున్నాడు. ఆ తర్వాత తన భార్యకు అతడు విడాకులు ఇచ్చాడు. మళ్లీ ఆమెను పెళ్లి చేసుకున్నాడు. ఇలా నాలుగు సార్లు ఆమెను పెళ్లాడాడు. మూడు సార్లు విడాకులు ఇచ్చాడు. నిబంధనల ప్రకారం 32 రోజుల పాటు అతడు సెలవులకు దరఖాస్తు చేశాడు. అయితే ఈ విషయాన్ని గ్రహించిన బ్యాంకు అధికారులు అతడికి వేతనంతో కూడిన సెలవులను మంజూరు చేయడం కుదరదని చెప్పారు. దీంతో ఆ క్లర్క్ లేబర్ బ్యూరో ఇన్వెస్టిగేషన్ ఆఫీసులో ఓ పిటిషన్ ను దాఖలు చేశాడు. తీర్పు అతడికే అనుకూలంగా వచ్చింది. బ్యాంకు అధికారులు లేబర్ చట్టాలను ఉల్లంఘించారంటూ గతేడాది అక్టోబర్ నెలలో రూ.52,800 జరిమానాను విధించారు. బ్యాంకు అధికారులు ఈ తీర్పును సవాల్ చేస్తూ బైషీ లేబర్ బ్యూరీలో పిటిషన్ దాఖలు చేశారు. సెలవుల కోసం ఆ క్లర్క్ నీతిమాలిన పనికి చేసినప్పటికీ నిబంధనలను మాత్రం అతడు అతిక్రమించలేదని బైషీ లేబర్ బ్యూరో తేల్చిచెప్పింది. బ్యాంకు అధికారులు అతడికి నష్టపరిహారాన్ని చెల్లించాల్సిందేనంటూ తీర్పునిచ్చింది. ఈ ఘటనకు సంబంధించిన వార్త ప్రస్తుతం సోషల్ మీడియాలో వైరల్ అవుతోంది. ఇలా కూడా సెలవులు పొందొచ్చా? అంటూ నెటిజన్లు కామెంట్స్ చేస్తున్నారు.