భర్తను భుజాలపై మోస్తూ ఊరి చుట్టూ భార్య ప్రదక్షిణలు
national | Suryaa Desk | Published : Mon, Jun 22, 2020, 02:21 PM
వారం రోజుల పాటు భార్య చెప్పాపెట్టకుండా ఎక్కడికో వెళ్లిందని ఆరోపిస్తూ.. భర్త అన్నదమ్ములు ఆమెకు వింత శిక్ష విధించారు. ఈ దారుణ ఘటన మధ్యప్రదేశ్‌లో చోటు చేసుకుంది. వారం తర్వాత భార్య ఇంటికి రావడంతో గొడవ జరిగినట్లుగా స్థానికులు తెలిపారు. దీంతో ఆమె మరిదులు భర్తను భుజంపై ఉంచుకొని ఊరి చుట్టూ తిప్పాలని గట్టిగా ఆదేశించారు. ఇక ఏమీ చేయలేక స‌ద‌రు మ‌హిళ భర్తను భుజాలపై ఎక్కించుకుని ఊరంతా తిప్పింది. మధ్యప్రదేశ్‌లోని ఝ‌భువా జిల్లాలోని ఓ గ్రామంలో ఈ ఘటన జ‌రిగింది. ఝ‌బ్వా జిల్లా పోలీసులు వెల్లడించిన వివరాల మేరకు.. బాధిత మ‌హిళ జూన్ 13 నుంచి క‌నిపించ‌కుండా పోయింది. గత శుక్రవారమే ఇంటికి తిరిగొచ్చింది. ఆమె వచ్చీరావడంతోనే మ‌హిళ మరిదులు, బావ‌లు పెద్దల ముందు పంచాయ‌తీ పెట్టించారు. చేసిన తప్పునకు గానూ తిరిగి ఆమెతో భర్త కాపురం చేయాలంటే అత‌డిని భుజాలపై ఎత్తుకుని ఊరు చుట్టూ ప్రదక్షిణ చేయాల్సిందేనని నిబంధన విధించారు. దీంతో ఆమె వారు చెప్పినట్టే చేసింది. ఈ విషయాన్ని స్థానిక మీడియా వెలుగులోకి తీసుకురావడంతో ఘటనపై తీవ్ర విమర్శలు వ్యక్తమవుతున్నాయి. త‌ప్పుచేసింద‌న్న కార‌ణంతో ఓ మ‌హిళ‌ను ఊరంద‌రి ముందు అవమానించారని పలు సంఘాలు వాదిస్తున్నాయి. స‌ద‌రు మ‌హిళ భర్త, అత‌ని సోద‌రులు మాత్రం ఆమెకు మరో వ్యక్తితో ప్రేమ వ్యవహారం ఉంద‌ని ఆరోపిస్తున్నారు. ఈ ఘటనపై జిల్లా పోలీసులు దర్యాప్తు చేస్తున్నారు.
|
|