లాక్డౌన్ నేపథ్యంలో చాలా సంస్థలు నష్టాల్లో కూరుకుపోయిన సంగతి తెలిసిందే. ఆర్థిక ఇబ్బందుల నుంచి తప్పించుకోడానికి సంస్థలు ఉద్యోగులను తొలగించే పనిలో పడ్డాయి. ఫలితంగా ప్రపంచవ్యాప్తంగా సుమారు 13 కోట్ల మందికి పైగా ఉద్యోగాలను కోల్పోయారని గణాంకాలు వెల్లడిస్తున్నాయి.ఉపాధి కోల్పోయి, జీతాలు అందక.. ఉద్యోగులంతా ఇప్పుడు దిక్కుతోచని స్థితిలో ఉన్నారు. తమ కుటుంబాలను పోషించలేక ఇబ్బందిపడుతున్నారు. ప్రస్తుత పరిస్థితిలో బయట అప్పు కూడా దొరకడం లేదు. దీంతో జీవితం భారంగా మారింది. ఈ నేపథ్యంలో రష్యాలోని కొంతమంది ఉద్యోగులు నిరసనకు దిగారు. దుస్తులు విప్పేసి నగ్న ప్రదర్శనకు దిగారు.లాక్డౌన్ వల్ల అభివృద్ధి చెందిన దేశాలు కూడా కుదేలైన సంగతి తెలిసిందే. అమెరికాతోపాటు రష్యా కూడా కరోనాను ఎదుర్కోడానికి ముప్పు తిప్పలు పడుతోంది. లాక్డౌన్ వల్ల రష్యాలోని సంస్థలన్నీ నష్టాలన్నీ కూరుకుపోయాయి. ఇక బార్లు, రెస్టారెంట్లయితే పూర్తిగా మూతపడ్డాయి. దీంతో వాటిలో పనిచేసే సిబ్బంది, చెఫ్లు రోడ్డున పడ్డారు. తమను ఆదుకోకుండా ఉద్యోగాల నుంచి తొలగించారనే కారణంతో వారంతా ఒంటి మీద నూలు పోగు లేకుండా నగ్న ప్రదర్శనకు దిగారు. ఇతరులకు ఇబ్బంది లేకుండా ప్లకార్డుల, చేతులు, సీసాలను అడ్డుగా పెట్టుకున్నారు.