వెనిజులా అధ్యక్షుడు నికోలస్ మాడ్యురోపై అమెరికా తీవ్ర అభియోగాలు మోపింది. తమ దేశంలోకి అక్రమంగా మాదక ద్రవ్యాలు రవాణా చేశారంటూ వెనిజులా అధ్యక్షుడు నికోలస్ మాడ్యురోపై ఆరోపణలు చేసిన అమెరికా ఆయన అరెస్టుకు తోడ్పడేలా సమాచారం అందిస్తే 15 మిలియన్ డాలర్ల రివార్డు ఇస్తామని కూడా ప్రకటించింది. వెనిజులా ప్రభుత్వం తీవ్ర అవినీతి కూపంలో చిక్కుకుందనీ.. దాన్ని రూపుమాపేందుకే ఈ నిర్ణయం తీసుకున్నామంటూ అమెరికా అటార్నీ జనరల్ విలియమ్ బార్ పేర్కొన్నారు. కాగా అమెరికా ఆరోపణలపై వెనిజులా విదేశాంగ మంత్రి జార్జి అరియాజా తీవ్ర స్థాయిలో స్పందించారు. డ్రగ్ ట్రాఫికింగ్కు వ్యతిరేకంగా వెనిజులా చేస్తున్న పోరాటాన్ని తక్కువచేసేందుకే ట్రంప్ ప్రభుత్వం ఈ వికృత పంథాను ఎన్నుకుందంటూ మండిపడ్డారు.