ఏపీ రైతులకు శుభవార్త

రైతులకు కేంద్రం శుభవార్త చెప్పింది. కృష్ణాపురం ఉల్లి ఎగుమతులపై నిషేధాన్ని తొలగిస్తూ నిర్ణయం తీసుకుంది. కేపీ ఉల్లిని ఎగుమతి చేసేందుకు అనుమతి ఇస్తూ నోటిఫికేషన్ జారీ చేసింది.. 10వేల మెట్రిక్ టన్నుల ఉల్లిని చెన్నై పోర్టు నుంచి ఎగుమతి చేసేందుకు అనుమతి ఇచ్చింది. అదే సమయంలో మార్చి 31లోగా ఎగుమతులు పూర్తి చేయాలని ఆదేశించింది. కేంద్రం తీసుకున్న ఈ నిర్ణయంపై రైతులు హర్షం వ్యక్తం చేశారు.

ఇదిలా ఉంటే.. కేపీ ఉల్లి ఎగుమతులపై నిషేధాన్ని ఎత్తివేస్తూ కేంద్ర వాణిజ్య మంత్రిత్వశాఖ నోటిఫికేషన్‌ విడుదల చేయడంపై రైతులు హర్షం వ్యక్తం చేశారు. దీని కోసం కృషి చేసినందుకు రైతు సంఘాల నేతలు ఢిల్లీలో.. వైఎస్సార్‌సీపీ ఎంపీలను పార్లమెంట్ ఆవరణలో కలిసి ధన్యవాదాలు తెలిపారు. రైతు సంక్షేమమే తమ లక్ష్యం.. అదే తమ విధానం అంటూ వైఎస్సార్‌సీపీ ఎంపీ విజయసాయిరెడ్డి ట్వీట్ చేశారు.కేపీ ఉల్లి రైతుల సమస్యల్ని వైఎస్సార్‌సీపీ ఎంపీ విజయసాయిరెడ్డి రెండు రోజుల క్రితమే రాజ్యసభలో ప్రస్తావించారు. ఉల్లి ఎగుమతులపై నిషేధం కారణంతో.. రైతులు తాము పండించిన పంటను ఏం చేయాలో తెలియని అగమ్యగోచర స్థితిలో ఉన్నారన్నారు. నిషేధం తక్షణమే ఎత్తివేయాలని కోరారు.. వాణిజ్య మంత్రి కూడా సానుకూలంగా స్పందించగా.. ఇప్పుడు నిషేధం ఎత్తివేస్తూ నిర్ణయం తీసుకున్నారు.

ఏపీలో పండించే కేపీ రకం ఉల్లి విదేశాలకు ఎక్కువగా ఎగుమతి చేస్తుంటారు. కానీ ఎగుమతులపై నిషేధం ఉండటంతో ఉల్లిని ఎగుమతి చేయలేకపోతున్నారు.. కేపీ రకం ఉల్లిని సింగపూర్, మలేషియా, శ్రీలంక తదితర దేశాలకు ఎగుమతి చేస్తుంటారు. కర్ణాటకలో పండించే రెడ్ రోస్ రకం ఉల్లి ఎగుమతులకు కూడా కేంద్రం గతంలో అనుమతి ఇచ్చిన సంగతి తెలిసిందే.