భోజనానికి సరిపడా డబ్బుల్లేవని.. కూతురిని హోటల్‌లో వదిలి వెళ్లిన తండ్రి
national | Suryaa Desk | Published : Tue, Apr 16, 2019, 02:57 PM
ఓ వ్యక్తి తన వద్ద భోజనానికి సరిపడా డబ్బుల్లేవనే కారణంతో కూతురిని హోటల్‌లో వెళ్లి వదలడం చర్చనీయమైంది. చైనాలోని ఫొషాన్‌లో చోటుచేసుకున్న ఈ ఘటన సోషల్ మీడియాలో వైరల్‌గా మారింది. కూతురితో కలిసి హోటల్‌కు వచ్చిన తండ్రి.. భోజనానికి 6 యువాన్ (రూ.62) ఖర్చవుతుందని, తన వద్ద ఒక యువాన్ తక్కువ ఉందని గుర్తించాడు.
దీంతో అతడు తన రెండేళ్ల కూతురిని హోటల్‌లో వదిలి వెళ్లాడు. చిన్నారి ఏడుస్తున్నా పట్టించుకోలేదు. తన కూతురును ఇక్కడే వదిలి వెళ్తున్నా అని, రేపు డబ్బులు తీసుకొచ్చి ఆమెను తీసుకెళ్తానని క్యాషియర్‌కు తెలిపాడు. క్యాషియర్ అతడికి సర్దిచెప్పేలోపే ఆ వ్యక్తి అక్కడ నుంచి వెళ్లిపోయాడు. దీంతో హోటల్ సిబ్బంది ఆ చిన్నారికి భోజనం పెట్టి, పోలీసులకు సమాచారం ఇచ్చారు. పోలీసులు ఆ చిన్నారిని పోలీస్ స్టేషన్‌కు తీసుకెళ్లారు. ఇదంతా హోటల్‌లో ఉన్న సీసీటీవీ కెమేరాలో రికార్డయ్యింది.
కొద్దిసేపటి తర్వాత హోటల్‌కు వచ్చిన ఆ వ్యక్తికి తన కూతురు అక్కడ కనిపించలేదు. దీంతో హోటల్ సిబ్బందిపై కేకలు పెట్టాడు. పోలీసులకు ఎందుకు ఫిర్యాదు చేశారని నిలదీశాడు. అనంతరం తన కుమార్తె కోసం పోలీస్ స్టేషన్‌కు వెళ్లాడు. జరిగిన ఘటనపై పోలీసులు అతడికి గట్టిగా క్లాస్ పీకారు. అయితే, తన వద్ద భోజనానికి సరిపడా డబ్బులు లేవని, మిగతా డబ్బులు తెచ్చేందుకు తన కూతురిని హోటల్‌లో వదిలి వెళ్లానని తెలిపాడు. దారి మధ్యలో బ్యాటరీ స్కూటర్ మొరాయించడంతో ఆలస్యమైందని తెలిపాడు. స్కూటర్‌కు ఛార్జింగ్ పెట్టుకుని వచ్చేసరికి బాగా ఆలస్యమైందన్నాడు.
|
|