పండగ ఆఫర్స్‌లో వడ్డీ తక్కువని.. 'హోమ్ లోన్' తీసుకుంటున్నారా? ఈ విషయాలు తెలుసుకోండి

భారత దేశంలో పండగల సీజన్‌లో వార్షిక బోనస్‌లు, ఉత్సాహభరితమైన స్ఫూర్తితో ప్రజలు ఖర్చుకు వెనకాడరు. పండగ ఆఫర్ల విషయంలో వేగంగా నిర్ణయాలు తీసుకుంటుంటారు. ఆఫర్ ద్వారా తమకు ఎంతో ప్రయోజనం చేకూరుతుందని భావిస్తుంటారు. ఇలాంటి పరిస్థితులను తమకు అనుకూలంగా మార్చుకుంటున్నాయి చాలా బ్యాంకులు, ఫైనాన్షియల్ సంస్థలు. ఇంటి కొనుగోలుదారులను ఆకర్షించేందుకు హోమ్ లోన్లపై ప్రత్యేక ఆఫర్లు ప్రకటిస్తున్నాయి. తక్కువ వడ్డీ, ప్రాసెసింగ్ ఫీ మాఫీ, అనువైన రీపేమెంట్ ఆప్షన్ వంటివి ఇందులో ఉంటున్నాయి. ఈ ప్రత్యేక ఆఫర్‌లో లోన్ తీసుకోవడం ద్వారా పెద్ద మొత్తంలో ఆదా చేసుకోగలరని పెద్ద ఎత్తున ప్రచారం చేస్తున్నాయి. దీంతో చాలా మంది మరో ఆలోచన లేకుండా లోన్ తీసుకునేందుకు సిద్ధమైపోతుంటారు. కానీ, ఇలాంటి ఆఫర్ల విషయంలో జాగ్రత్తగా ఉండాలని నిపుణులు హెచ్చరిస్తున్నారు. పండగ సీజన్‌లో ఆఫర్స్ ఉన్నాయని కదా అని నిర్ణయం తీసుకుంటే అది దీర్ఘకాలంగా ఆర్థిక భారాన్ని మోపుతుంది.

ఇలాంటి ఆకర్షణీయమైన ఫీచర్లు ఉన్నప్పటికీ అటువంటి ఆఫర్లను విమర్శనాత్మక ఆలోచనతో సంప్రదించాల్సిన అవసరం ఉందని నిపుణులు సూచిస్తున్నారు. పండగ ప్రమోషన్ల ఉత్సాహం వ్యక్తులు తమ వాస్తవ అవసరాలు లేదా ఆర్థిక సామర్థ్యాల కంటే ఆకర్షణీయమైన నిబంధనల ఆధారంగా తొందరపడి రుణాలు తీసుకునేలా చేస్తుందని అంటున్నారు. దీంతో తెలియకుండానే అప్పుల ఊబిలో కూరుకుపోతుంటారని హెచ్చరిస్తున్నారు. అలాగే తక్కువ ప్రాసెసింగ్ ఫీజులు, తగ్గిన వడ్డీ రేట్లు వంటి ప్రయోజనాలు ముఖ్యమైనవే. అయితే, పండగల సీజన్‌లో అందించే కానుకలు, ప్రచారం వస్తువుల వంటి ద్రవ్యేతర ప్రోత్సాహకాలు తరచుగా గ్రాండ్ స్కీమ్‌లో తక్కువ విలువను కలిగి ఉంటాయి. ఈ అదనపు బెనిఫిట్స్ రుణం తీసుకోవడం వల్ల వచ్చే ముఖ్యమైన ఆర్థిక చిక్కులను కనిపించకుండా చేస్తాయి. దీంతో దీర్ఘకాలంలో ఇబ్బందులు పడాల్సి వస్తుంది.

పండగల సీజన్‌లో ప్రకటించే ఆఫర్ల మాత్రమే చూసి నిర్ణయం తీసుకోవద్దు. కనిపించని నిబంధనలు, షరతుల గురించి క్షుణ్నంగా తెలుసుకోవాలి. దీంతో అనుకోకుండా ఎదురయ్యే ఛార్జీలు, పెనాల్టీల గురించి ముందే తెలుస్తుంది. అది మీ సేవింగ్స్‌ను ప్రభావితం చేయకుండా జాగ్రత్తపడవచ్చు. గృహ రుణం అంటేనే ఒక దీర్ఘకాలిక బాధ్యత. టెన్యూర్ పూర్తయ్యే వరకు తాము ఎంత చెల్లిస్తున్నాం అనేది ముందే ఒక అంచనా వేయగలగడం చాలా ముఖ్యం. నెలవారీ వాయిదాలు ఈఎంఐలు తమ ఆర్థిక సామర్థ్యానికి అనుగుణంగా ఉండేలా చూసుకోవాలి. తలకు మించిన భారంగా మారితే అప్పుల ఊబిలో కూరుకుపోతారు. అలాగే మంచి పేరున్న బ్యాంకుల్లోనే రుణాలు తీసుకోవడం మంచిదని చెబుతున్నారు నిపుణులు.