భారీగా తగ్గిన పెట్రో ధరలు.. పెట్రోల్‌పై రూ.10, డీజిల్‌పై రూ.13 తగ్గింపు

వాహనదారులకు పాక్ సర్కార్ గుడ్‌న్యూస్ చెప్పింది. భారీగా పెరుగుతున్న చమురు ధరల నుంచి కాస్త ఉపశమనం కల్పించింది. పెట్రోల్, డీజిల్, కిరోసిన్‌పై భారీ తగ్గింపును ప్రకటించింది. అంతర్జాతీయంగా గత కొన్ని రోజులుగా వరుసగా చమురు ధరలు తగ్గుతుండటంతో.. దేశీయంగానూ పెట్రో ధరలను తగ్గిస్తూ నిర్ణయం తీసుకుంది. ఈ క్రమంలోనే లీటర్ డీజిల్‌పై రూ.13 తగ్గింపు, లీటర్ పెట్రోల్‌పై రూ.10 తగ్గింపు, లీటర్ కిరోసిన్‌పై రూ.11.15 తగ్గిస్తూ కీలక నిర్ణయం తీసుకుంది. ఈ నిర్ణయం తక్షణమే అమల్లోకి వస్తుందని పాక్ ప్రభుత్వం వెల్లడించింది.

అయితే ఈ భారీ తగ్గింపు చేసినప్పటికీ పాకిస్తాన్‌లో చమురు ధరలు మాత్రం ఆకాశాన్ని అంటేలానే ఉన్నాయి. ఇప్పటివరకు పాకిస్తాన్‌లో లీటర్ పెట్రోల్ ధర రూ.259.10 ఉండగా.. తాజాగా రూ.10 తగ్గించడంతో ప్రస్తుతం రూ.249.10కి చేరింది. ఇక హైస్పీడ్ డీజిల్ ధర గతంలో రూ.262.75 ఉండగా.. రూ.13 తగ్గించగా రూ.249.69కి తగ్గింది. ఇక అదే సమయంలో కిరోసిన్ ధర గతంలో రూ.169.62గా ఉండగా.. తాజాగా రూ.11.15 తగ్గించడంతో అది కాస్తా రూ.158.47కు దిగి వచ్చింది. ఇక లైట్ డీజిల్ ధర రూ.12.12 తగ్గించారు. దీంతో గతంలో రూ.154.05 గా ఉన్న లైట్ డీజిల్ ధర రూ.141.93కి తగ్గింది.

పాకిస్తాన్‌లో పెట్రోల్, డీజిల్ ధరలకు సంబంధించి మాట్లాడిన పెట్రోలియం శాఖ మంత్రి ముసాదిక్ మసూద్ మాలిక్.. అంతర్జాతీయంగా పెట్రోలియం ధరలు భారీగా తగ్గుతున్న నేపథ్యంలో త్వరలోనే ఆ ఊరట పాక్ వాసులకు కల్పిస్తామని గత వారం ప్రకటించారు. అన్నట్టుగానే తాజాగా చమురు ధరలను భారీగా తగ్గిస్తూ నిర్ణయం తీసుకున్నారు. అయితే అదే సమయంలో అంతర్జాతీయ మార్కెట్లలో క్రూడాయిల్ ధరల్లో హెచ్చుతగ్గులు.. మార్కెట్లలో భయాలను సృష్టిస్తున్నాయని.. అయితే వచ్చే 15 రోజుల్లో ఈ అంతర్జాతీయంగా చమురు ధరలను అంచనా వేయడం కష్టమని పాక్ జాతీయ అసెంబ్లీలో ముసాదిక్ మసూద్ మాలిక్ తెలిపారు.

పాకిస్తాన్‌కు సౌదీ అరేబియా నుంచి పెట్రోలియం దిగుమతులు ఉంటాయని పేర్కొన్న ముసాదిక్ మసూద్ మాలిక్.. వాయిదాల పద్ధతిలో ఆ దేశానికి డబ్బులు చెల్లిస్తామని పేర్కొన్నారు. అందుకే అంతర్జాతీయ మార్కెట్లలో చమురు ధరలకు అనుగుణంగా దేశీయంగా పెట్రో ధరల మార్పు ఉంటుందని చెప్పారు. ఇక పెట్రోలియం ఉత్పత్తులను తాము డాలర్లలో కొనుగోలు చేసి పాకిస్తాన్ రూపాయలలో విక్రయిస్తున్నట్లు తెలిపారు.