ఏపీ కేబినెట్ భేటీలో మంత్రులకు పేపర్లు పంచిన నారా లోకేష్

ఆంధ్రప్రదేశ్ మంత్రివర్గం ఇవాళ (సెప్టెంబర్ 18) భేటీ అయ్యింది. పలు అంశాలపై మంత్రివర్గంలో మంత్రులతో సీఎం చంద్రబాబు నాయుడు చర్చించారు. అయితే సచివాలయం వేదికగా జరిగిన ఈ మంత్రివర్గ సమావేశానికి ముందు ఓ ఆసక్తికర సన్నివేశం జరిగింది. ఆంధ్రప్రదేశ్ ఐటీ, విద్యాశాఖ మంత్రిగాఉన్న నారా లోకేష్.. సమావేశానికి ఓ బండిల్ పేపర్లు తీసుకువచ్చారు. అదేంటీ ఏపీ మంత్రివర్గ సమావేశం ఈ- కేబినెట్‌గా మారిపోయింది కదా.. మరెందుకు కాగితాలు అని అనుకోకండి. పేపర్లను తన వెంట తీసుకువచ్చిన మంత్రి నారా లోకేష్.. వాటిని అక్కడున్న మంత్రులకు పంచిపెట్టారు. ఇంతకీ ఏంటా పేపర్లు అనుకుంటున్నారా.. అక్కడికే వస్తున్నాం..

ఏపీలో టీడీపీ కూటమి అధికారంలోకి వచ్చిన తర్వాత.. మంత్రి నారా లోకేష్ మంగళగిరిలోని తన నివాసంలో ప్రజాదర్బార్ నిర్వహిస్తున్నారు. ఈ ప్రజాదర్బార్ కార్యక్రమానికి మంగళగిరి నియోజకవర్గానికి చెందిన ప్రజలతో పాటుగా.. రాష్ట్రవ్యాప్తంగా ఉన్న ప్రజలు తరలివచ్చి తమ సమస్యలను మంత్రి దృష్టికి తీసుకువస్తున్నారు. అలా తన దృష్టికి వచ్చిన సమస్యలను పరిష్కరిస్తున్నారు లోకేష్. అయితే తన శాఖకు సంబంధించిన సమస్యలను సాధ్యమైనంత త్వరగా పరిష్కరించగలుగుతున్న నారా లోకేష్ వద్దకు వేర్వేరు మంత్రిత్వశాఖలకు సంబంధించిన విజ్ఞప్తులు, వినతులు కూడా వస్తున్నాయి. ఈ నేపథ్యంలోనే ప్రజాదర్బార్ కార్యక్రమంలో తనకు వచ్చిన వినతులను మంత్రివర్గ సమావేశానికి తెచ్చారు నారా లోకేష్.

ఏపీ మంత్రివర్గ సమావేశం ముందు ఈ వినతులను సంబంధిత శాఖల మంత్రులకు అందజేశారు. వీటిని వీలైనంత త్వరగా పరిష్కరించాలంటూ మంత్రులను కోరారు. రాష్ట్రవ్యాప్తంగా పెద్దసంఖ్యలో ఫిర్యాదులు, సమస్యలు ప్రభుత్వం దృష్టికి వస్తున్నాయన్న నారా లోకేష్.. వీటిపైనా మంత్రివర్గం దృష్టి సారించాలని సూచించారు.

మరోవైపు మంత్రివర్గ సమావేశానికి ముందు కూడా నారా లోకేష్ ప్రజాదర్బార్ కార్యక్రమం నిర్వహించారు. ఉండవల్లి నివాసంలో 32వ రోజు జరిగిన ప్రజాదర్బార్ కార్యక్రమానికి ప్రజలు పెద్దఎత్తున తరలివచ్చారు. తాము ఎదుర్కొంటున్న సమస్యలను ఏకరువు పెట్టారు. ఆయా సమస్యలను సంబంధిత శాఖలకు పంపి పరిష్కారానికి చర్యలు తీసుకుంటామని నారా లోకేష్ వారికి హామీ ఇచ్చారు. వరదల కారణంగా ప్రజాదర్బార్ కార్యక్రమం కొన్నిరోజులు నిలిచిపోయింది. అయితే పరిస్థితి అంతా చక్కబడటంతో సోమవారం నుంచి నారా లోకేష్ ప్రజాదర్బార్ కార్యక్రమాన్ని మరలా ప్రారంభించారు.