కేబినెట్ భేటీలో వాలంటీర్లపై చర్చ.. షాకింగ్ విషయాలు చెప్పిన అధికారులు

ఏపీలో వాలంటీర్ల వ్యవహారం మరోసారి చర్చకు వచ్చింది. ఆంధ్రప్రదేశ్ మంత్రివర్గ సమావేశంలో వాలంటీర్ వ్యవస్థపై సుదీర్ఘమైన చర్చ జరిగినట్లు తెలిసింది. వైఎస్ జగన్ ముఖ్యమంత్రిగా ఉన్న సమయంలో వాలంటీర్ వ్యవస్థను ఏర్పాటు చేశారు. ప్రతి 50 ఇళ్లకు ఓ వాలంటీర్‌ను నియమించి.. ప్రభుత్వ సంక్షేమ పథకాల లబ్ధిని వారికి అందిస్తూ వచ్చారు. అలాగే గ్రామ, వార్డు సచివాలయాల వ్యవస్థను ఏర్పాటు చేసిన వైసీపీ ప్రభుత్వం.. వాలంటీర్ వ్యవస్థను దానికి అనుసంధానం చేసింది. పింఛన్ల దగ్గర నుంచి ప్రభుత్వం నుంచి అందే ఏ పథకమైనా వాలంటీర్ల చేతుల మీదుగానే సాగింది. అయితే 2024 ఆంధ్రప్రదేశ్ అసెంబ్లీ ఎన్ని్కల్లో వైసీపీ ఓడిపోయింది. టీడీపీ కూటమి అధికారంలోకి వచ్చింది. దీంతో వాలంటీర్ వ్యవస్థ కొనసాగింపుపై ఆందోళన వ్యక్తమైంది.

ఈ క్రమంలోనే వాలంటీర్లను ఏ రకంగా ఉపయోగించుకోవాలనే దానిపై టీడీపీ కూటమి ప్రభుత్వం ఆలోచనలు చేస్తూ వచ్చింది. తాజాగా బుధవారం జరిగిన మంత్రివర్గ సమావేశంలోనూ ఏపీలో వాలంటీర్ల వ్యవస్థ పునరుద్ధరణ గురించి చర్చించినట్లు తెలిసింది. అయితే ఈ సందర్భంగా సీఎం చంద్రబాబు నాయుడుకు అధికారులు కీలక వివరాలు వెల్లడించినట్లు సమాచారం. 2023 ఆగస్టుతోనే ఏపీలో వాలంటీర్ల కాలపరిమితి ముగిసిందని అధికారులు మంత్రివర్గం దృష్టికి తీసుకువచ్చారు. దీంతో గడువు ముగిసిన తర్వాత కూడా అప్పటి సీఎం వైఎస్ జగన్.. వారితో రాజీనామాలు చేయించినట్లు మంత్రులు అభిప్రాయపడినట్లు సమాచారం. తప్పుడు విధానాలతో వైఎస్ జగన్ పాలన సాగించారని మంత్రులు ఆరోపించారు. ఈ నేపథ్యంలో వాలంటీర్లు పునరుద్ధరణపై మరింత సమాచారం తీసుకోవాలని అధికారులను చంద్రబాబు ఆదేశించారు.

దీంతో వచ్చే మంత్రివర్గ సమావేశంలో ఏపీలో వాలంటీర్ వ్యవస్థపై ఓ క్లారిటీ వచ్చే అవకాశం ఉంది. మరోవైపు ఎన్నికల సమయంలో వేల సంఖ్యలో వాలంటీర్లు తమ పదవులకు రాజీనామాలు చేసిన సంగతి తెలిసిందే. వైసీపీ మద్దతుగా రాజీనామాలు చేసిన వాలంటీర్లు.. ఎన్నికల ప్రచారంలో కూడా పాల్గొన్నారు. అయితే టీడీపీ ప్రభుత్వం అధికారంలోకి వచ్చాక.. వైసీపీ నేతలు తమతో బలవంతంగా రాజీనామాలు చేయించారంటూ రాష్ట్రవ్యాప్తంగా పలుచోట్ల వాలంటీర్లు రోడ్డెక్కి నిరసనలు కూడా చేశారు. పోలీస్ స్టేషన్‌లలో కేసులు కూడా పెట్టారు. తాజాగా వీరంతా తమను పదవుల్లోకి తీసుకోవాలని.. వాలంటీర్ వ్యవస్థను పునరుద్ధరించాలని డిమాండ్ చేస్తున్నారు.