స్వీపర్ ఉద్యోగాలకు 46 వేల మంది గ్రాడ్యుయేట్ల దరఖాస్తు

దేశంలో నిరుద్యోగం అతి పెద్ద సమస్యగా మారింది. ప్రతీ ఏటా లక్షలాది మంది డిగ్రీలు, పీజీలు పూర్తి చేసుకుని.. బయటకు వస్తున్నారు. అయితే ఉద్యోగాల కోసం ప్రయత్నిస్తూ నిరుద్యోగులుగా మారుతున్నారు. కోర్సులు పూర్తి చేసిన వారికి సరిపడా ఉద్యోగాలు లేకపోవడం ఒక సమస్య అయితే.. ఉద్యోగాలకు సరిపడా స్కిల్స్ లేకపోవడం మరో సమస్యగా మారింది. ఇక ప్రభుత్వ ఉద్యోగాలకు సంబంధించి నోటిఫికేషన్ విడుదలైందంటే చాలు లక్షల మంది నిరుద్యోగులు ఎగబడుతున్నారు. 10వ తరగతి అర్హతతో నోటిఫికేషన్ వెలువడినా.. డిగ్రీలు, పీజీలు, పీహెచ్‌డీలు పూర్తి చేసిన వారు పోటీ పడుతున్నారు. అటెండర్, స్వీపర్, ప్యూన్ ఉద్యోగాలకు.. గ్రాడ్యుయేట్లు పోటీ పడుతున్న ఘటనలు మనం తరచూ చూస్తూనే ఉన్నాం.

ఈ క్రమంలోనే తాజాగా హర్యానాలో స్వీపర్ ఉద్యోగాలకు నోటిఫికేషన్ విడుదల కాగా.. లక్ష మందికిపైగా దరఖాస్తు చేశారు. ఇందులో 46 వేల మంది డిగ్రీలు, పీజీలు చేసిన వారే ఉండటం గమనార్హం. ఈ ఘటన చూస్తుంటే దేశంలో నిరుద్యోగ తీవ్రత ఏ స్థాయిలో ఉందో అర్థం అవుతోంది. హర్యానాలో ఇటీవలే కాంట్రాక్ట్ స్వీపర్ ఉద్యోగాలకు నోటిఫికేషన్‌ జారీ అయింది. అయితే ఈ నోటిఫికేషన్ రిలీజ్ అయిన తర్వాత కొన్ని రోజుల్లోనే లక్ష మందికిపైగా అభ్యర్థులు దరఖాస్తు చేసుకున్నారు. ఇందులో 6 వేల మంది పోస్ట్ గ్రాడ్యుయేట్ పూర్తి చేసుకున్న వారు కాగా.. 40 వేల మంది గ్రాడ్యుయేట్లు.. 1.2 లక్షల మంది అండర్ గ్రాడ్యుయేట్లు అప్లై చేసుకున్నారు.

అయితే రోడ్లు ఊడ్చే ఈ స్వీపర్ ఉద్యోగం కోసం లక్ష మందికిపైగా నిరుద్యోగులు దరఖాస్తు చేసుకోవడం.. అందులో పీజీలు, డిగ్రీలు పూర్తి చేసిన వారు కూడా ఉండటంతో అధికారులు తీవ్ర ఆశ్చర్యానికి గురవుతున్నారు. పర్మినెంట్ ఉద్యోగం కూడా కాకుండా కాంట్రాక్ట్ ఉద్యోగానికి ఇంత మంది అప్లై చేసుకోవడం ఏంటని ముక్కున వేలేసుకుంటున్నారు. ఇక ఈ కాంట్రాక్ట్ స్వీపర్ ఉద్యోగానికి ఎంపిక అయిన వారికి నెలకు రూ.15 వేలు చెల్లించనున్నారు.

హర్యానాలో ప్రభుత్వ ఉద్యోగాలు పక్కన పెడితే ప్రైవేటు ఉద్యోగాలు కూడా దొరకడం లేదు. ఇక దొరికిన ప్రైవేటు ఉద్యోగంలోనూ రూ.10 వేల జీతం మాత్రమే ఇస్తున్నారని.. అది ఎందుకూ సరిపోవడం లేదని నిరుద్యోగులు తీవ్ర ఆవేదన వ్యక్తం చేస్తున్నారు. కనీసం ఈ కాంట్రాక్ట్ స్వీపర్ ఉద్యోగంలోనైనా చేరితే జీతం రూ.15 వేలు అందడంతో పాటు భవిష్యత్తులో పర్మినెంట్ అవుతుందని భావిస్తున్నారు. మరికొందరు నిరుద్యోగులు అయితే ప్రస్తుతం ఏ పనీ లేకుండా ఖాళీగా ఉన్నామని.. ఆర్థిక సమస్యలు, ఇతర కారణాల వల్ల ఈ స్వీపర్ ఉద్యోగానికి దరఖాస్తు చేసుకున్నట్లు చెప్పారు.