తెలుగు రాష్ట్రాలకు నారా భువనేశ్వరి ,,,రెండు రాష్ట్రాలకు చెరో రూ.1 కోటి విరాళం

ఆంధ్రప్రదేశ్‌కు వర్షం, వరద రూపంలో పెద్ద విపత్తు వచ్చిపడింది. ముఖ్యంగా విజయవాడ పరిస్థితి దయనీయంగా ఉంది.. నాలుగు రోజుల తర్వాత పరిస్థితి ఇప్పుడిప్పుడే కాస్త మెరుగుపడుతోంది. రాష్ట్రంలో పరిస్థితుల్ని చూసిన ఎంతోమంది సినీ, రాజకీయ, వ్యాపార ప్రముఖులు, స్వచ్ఛంద సంస్థలు ఆపన్న హస్తం అందిస్తున్నాయి. తమకు తోచిన విధంగా సాయం చేస్తున్నాయి.. కొందరు విరాళాలు ప్రకటిస్తుంటే.. మరికొందరు ఆహారం అందిస్తున్నారు. ఇప్పటికే పలువురు ప్రముఖులు విరాళాలు ప్రకటించారు. తాజాగా ఏపీ ముఖ్యమంత్రి చంద్రబాబు సతీమణి, హెరిటేజ్ ఫుడ్స్ లిమిటెడ్ ఎండీ నారా భువనేశ్వరి భారీగా విరాళాన్ని ప్రకటించారు.

ఆంధ్రప్రదేశ్, తెలంగాణలో వరద ప్రభావిత ప్రాంతాల్లో సహాయచర్యలు, బాధిత కుటుంబాలను ఆదుకునేందుకు.. నారా భువనేశ్వరి రూ.రెండు కోట్ల విరాళం ప్రకటించారు. హెరిటేజ్‌ ఫుడ్స్‌ తరఫున ఆంధ్ర, తెలంగాణ సీఎంల సహాయనిధికి రూ.కోటి చొప్పున విరాళం అందిస్తున్నట్లు ఓ ప్రకటనలో తెలిపారు. ఇటీవల కురిసిన భారీ వర్షాలు, వరదలు తెలుగు రాష్ట్రాలను అతలాకుతలం చేశాయని.. సహాయచర్యలు, వరద ప్రభావిత ప్రాంతాల పునర్నిర్మాణంలో ఆయా రాష్ట్రాలకు మద్దతు ఇవ్వడానికి కట్టుబడి ఉన్నామని తెలిపారు. ఇలాంటి సంక్షోభ సమయంలో ప్రజలకు అండగా నిలవడాన్ని బాధ్యతగా భావిస్తున్నామని చెప్పారు భువనేశ్వరి.

మరోవైపు వరద బాధితులను ఆదుకొనేందుకు నెల్లూరు ఎంపీ వేమిరెడ్డి ప్రభాకర్‌రెడ్డి, కోవూరు ఎమ్మెల్యే వేమిరెడ్డి ప్రశాంతిరెడ్డి దంపతులువిజయవాడలో సీఎం చంద్రబాబును కలిసి రూ.కోటి చెక్కును అందజేశారు. వరద బాధితుల సహాయార్థం ఏపీ సివిల్‌ సర్వీస్‌ (ఎగ్జిక్యూటివ్‌ బ్రాంచ్‌) అసోసియేషన్‌ సభ్యులు విరాళాన్ని ప్రకటించారు. తమ ఒక రోజు జీతం కోటి రూపాయలను ముఖ్యమంత్రి సహాయ నిధికి అందిస్తున్నట్లు ప్రకటించారు. వరద బాధితులకు సాయం కోసం రాష్ట్ర ప్రభుత్వ ఉద్యోగుల ఒక రోజు వేతనాన్ని వినియోగించాలని ఎస్సీ, ఎస్టీ ఉద్యోగుల సంఘం కోరింది. మరోవైపు ఏపీ మంత్రి టీజీ భరత్ తరఫున.. వరద బాధితులను ఆదుకునేందుకు ముఖ్యమంత్రి సహాయ నిధికి టీజీవీ గ్రూప్స్‌ తరఫున రూ.10 లక్షలు విరాళం ప్రకటించారు.

ఏపీలో వరద బాధితుల సహాయార్థం విజయవాడ ఆయుష్‌ ఆసుపత్రుల యజమాన్యం రూ.50 లక్షల విరాళం ప్రకటించింది. సీఎం చంద్రబాబును కలిసి విరాళాన్ని అందజేశారు.. అలాగే ఆసుపత్రి యజమాన్యంతోపాటు ఆయుష్‌ వైద్యులు కూడా ఒకరోజు వేతనాన్ని విరాళంగా ఇస్తామని తెలిపారు. గుంటూరు జిల్లా మంగళగిరి నియోజకవర్గానికి చెందిన కళ్లం రాజశేఖర్‌రెడ్డి, కొమ్మారెడ్డి కిరణ్‌ చెరో రూ.10 లక్షలు మంత్రి నారా లోకేష్‌కు అందజేశారు. ఒంగోలుకు చెందిన సరస్వతి విద్యా సంస్థల యజమాని ఏవీ రమణారెడ్డి రూ.7 లక్షలు, ఒంగోలుకు చెందిన మేదరమెట్ల సుబ్బయ్య రూ.లక్ష, ఆలూరు కొండలరావు రూ.50వేలు, ఆలూరి ఝాన్సీలక్ష్మీ రూ.50 వేల చొప్పున విరాళాలు అందజేశారు. వివిధ రాష్ట్రాల్లో వరద సహాయ చర్యల నిమిత్తం పీఎం కేర్స్‌ నిధికి రూ.3 కోట్ల విరాళం ఇస్తున్నట్లు మారుతీ సుజుకీ తెలిపింది.

విజయవాడ వరద బాధితుల కోసం మేఘా ఇంజనీరింగ్ అండ్ ఇన్‌ఫ్రాస్ట్రక్చర్ లిమిటెడ్(ఎంఈఐఎఎల్) స్పందించింది. తక్షణ సాయం కింద.. ప్రభుత్వ యంత్రాంగం ద్వారా మొదటి రోజు లక్ష మందికి ఆహారాన్ని పంపిణీ చేసింది. హరే కృష్ణ మూవ్‌మెంట్ సహకారంతో విజయవాడలో వరద బాధితులకు అండగా మేఘా సంస్థ నిలిచింది. ఉదయం టిఫిన్, మధ్యాహ్నం, రాత్రికి భోజనం, మంచినీళ్ల బాటిళ్లను మెయిల్ సంస్థ అందిస్తోంది. అక్షయ పాత్ర, ఎంఈఐఎల్ వంట శాలల్లో ఆహారం తయారు చేస్తున్నారు. వీరితో పాటుగా రాష్ట్రవ్యాప్తంగా వివిధ జిల్లాలవారీగా ఎంతోమంది స్వచ్ఛందంగా విరాళాలు, ఆహారం, వాటర్ బాటిల్స్, కూరగాయలు, పండ్లు ఇలా తమకు తోచిన విధంగా సాయం అందిస్తున్నారు.