నా గుండె తరుక్కుపోతోంది.... వైఎస్ షర్మిల

వరదలతో అతలాకుతలమైన విజయవాడలో సీఎం చంద్రబాబు రాత్రీ పగలు తేడా లేకుండా సహాయక చర్యలు పర్యవేక్షిస్తున్నారు. ఈ వయసులోనూ జేసీబీలు, ట్రాక్టర్లపై ప్రయాణిస్తూ బాధితుల గోడు వింటున్నారు. అండగా ఉంటామని, ఆదుకుంటామని భరోసా ఇస్తున్నారు. అధికారులతో సమీక్షలు నిర్వహిస్తూనే.. క్షేత్రస్థాయిలో పర్యటిస్తూ సహాయక చర్యలను పర్యవేక్షిస్తున్నారు. ఈ నేపథ్యంలో చంద్రబాబు చేస్తున్న సహాయక చర్యలపై ప్రశంసలు కురుస్తున్నాయి. తాజాగా ఏపీ కాంగ్రెస్ అధ్యక్షురాలు వైఎస్ షర్మిల సైతం చంద్రబాబు చేస్తున్న సహాయక చర్యలను ప్రశంసించారు. బుధవారం విజయవాడలోని వరద ప్రభావిత ప్రాంతాల్లో వైఎస్ షర్మిల పర్యటించారు. బాధితులతో మాట్లాడి వారి బాధలు విన్నారు. ప్రభుత్వం చేపడుతున్న సహాయక చర్యలను అడిగి తెలుసుకున్నారు.

అనంతరం మీడియాతో మాట్లాడిన వైఎస్ షర్మిల.. సింగ్‌నగర్‌లో వరద బాధితుల కష్టాలు వర్ణనాతీతమని ఆవేదన వ్యక్తం చేశారు. వరద బాధితుల కష్టాలు, ఇబ్బందులు చూస్తుంటే గుండె తరుక్కుపోయిందని అన్నారు. వరద ప్రభావిత ప్రాంతాల్లో చంద్రబాబు చేపట్టిన సహాయక చర్యలు సంతోషకరమన్న వైఎస్ షర్మిల.. అయితే సహాయక చర్యలు క్షేత్రస్థాయికి చేరడం లేదన్నారు. తెలంగాణ ప్రభుత్వం అమల్లోకి తెచ్చిన హైడ్రా తరహాలోనే ఏపీలోనూ చెరువుల ఆక్రమణలపై దృష్టి పెట్టాలని సూచించారు. ఇదే విషయమై వైఎస్ షర్మిల ట్వీట్ చేశారు.

"కొంప కొల్లేరు అయ్యింది.. బెజవాడ బుడమేరు అయింది. సింగ్ నగర్‌లో వరద బాధితుల కష్టాలు వర్ణనాతీతం. బాధితులు పడుతున్న కష్టాలు స్వయంగా చూసి నా గుండె తరుక్కుపోయింది. వరదల్లో ఇప్పటికీ 35 మంది చనిపోయారు. 35వేల ఇళ్లు కూలిపోయాయి. మొత్తం 5 లక్షల మంది దాకా నష్టపోయారు. ఇంత భారీ ఎత్తున విపత్తు సంభవిస్తే ప్రధాని మోడీ కనీసం స్పందించలేదు. విజయవాడ వరదలు కేంద్రానికి కనిపించడం లేదా..? తక్షణమే దీనిని జాతీయ విపత్తుగా పరిగణించండి." అంటూ వైఎస్ షర్మిల ట్వీట్ చేశారు.

 "వరదల్లో సీఎం చంద్రబాబు చేస్తున్న సహాయక చర్యలు సంతోషకరం. కానీ సహాయక చర్యలు గ్రౌండ్ లెవల్‌కి చేరడం లేదు. 2005లో ఇలాంటి వరదలు వస్తే అప్పటి ముఖ్యమంత్రి వైఎస్ఆర్ ఇక్కడకు వచ్చారు. బుడమేరు వరదలు రాకుండా సమస్య పరిష్కారం చేయాలని చూశారు. ఆపరేషన్ కొల్లేరును క్లియర్ చేశారు. ఆరోజుల్లో బుడమేరు కట్టలు బలోపేతం చేశారు. కానీ గత 10 ఏళ్లలో బుడమేరులో ఆక్రమణలు జరిగాయి. తెలంగాణలో హైడ్రా మాదిరిగా బుడమేరు ఆక్రమణలు తొలగించి రిటర్నింగ్ వాల్ కట్టాలి" అంటూ వైఎస్ షర్మిల ట్వీట్ చేశారు.