ఏపీ యువతకు తీపికబురు.. కొత్తగా 15000 ఉద్యోగాలు

ఏపీలో నూతనంగా అధికార పగ్గాలు చేపట్టిన టీడీపీ కూటమి ప్రభుత్వం.. రాష్ట్రానికి పెట్టుబడులను తీసుకువచ్చేందుకు ప్రయత్నాలు ప్రారంభించింది. ఇప్పటికే పలువురు పారిశ్రామికవేత్తలతో భేటీ అవుతున్న సీఎం నారా చంద్రబాబు నాయుడు.. ఇటీవలే టాస్క్‌ఫోర్స్ కూడా ఏర్పాటు చేశారు. టాటా సన్స్ ఛైర్మన్ నటరాజన్ చంద్రశేఖరన్‌ను కో ఛైర్మన్‌గా నియమించారు. తాజాగా ఫాక్స్‌కాన్ సంస్థ ప్రతినిధులు కూడా ఏపీలో పెట్టుబడులు పెట్టేందుకు సుముఖత వ్యక్తం చేశారు. ఏపీ ఐటీశాఖ మంత్రి నారా లోకేష్‌ను కలిసి పెట్టుబడులకు ఉన్న అవకాశాలపై చర్చించారు. తాజాగా మరో సంస్థ ఏపీలో వ్యాపార విస్తరణపై దృష్టి సారించింది. హెస్‌సీఎల్ సంస్థ.. ఆంధ్రప్రదేశ్‌లో తన కార్యకలాపాలను విస్తరించే దిశగా అడుగులు వేస్తోంది. హెచ్‌సీఎల్ కార్పొరేట్ వైస్ ప్రెసిడెంట్ శివశంకర్‌తో కూడిన ప్రతినిధుల బృందం.. మంత్రి నారా లోకేష్‌తో మంగళవారం భేటీ అయ్యింది.

ఈ భేటీ వివరాలను మంత్రి నారా లోకేష్ ఎక్స్ వేదికగా వెల్లడించారు. హెచ్‌సీఎల్ సంస్థ ఏపీలో కార్యకలాపాలను విస్తరించాలనుకుంటున్నట్లు నారా లోకేష్ తెలిపారు. విస్తరణలో భాగంగా నూతన కార్యాలయం నిర్మాణం చేపట్టాలని భావిస్తున్నట్లు చెప్పారు. ఏపీలో హెచ్‌సీఎల్‌కు శంకుస్థాపన వేసింది.. సీఎం చంద్రబాబు నాయుడేనన్న సంగతిని నారా లోకేష్ గుర్తు చేశారు. గత టీడీపీ ప్రభుత్వంలో హెచ్‌సీఎల్ ప్రారంభం కాగా.. 4500 మందికి ఉద్యోగాలు వచ్చాయని వివరించారు. ప్రస్తుతం ఈ సంస్థ తన కార్యకలాపాలను మరింత విస్తరించే ఆలోచనలో ఉందని.. దీనివలన మరో 15 వేల ఉద్యోగాలు వస్తాయంటూ నారా లోకేష్ ట్వీట్ చేశారు. హెచ్‌సీఎల్ సంస్థ విస్తరణకు కావాల్సిన అన్ని అనుమతులను వేగంగా మంజూరు చేస్తామని.. ప్రభుత్వం నుంచి కావాల్సిన సహకారం అందిస్తామని నారా లోకేష్ వివరించారు.

మరోవైపు ఫాక్స్‌కాన్ సంస్థ ప్రతినిధులు కూడా ఇటీవల నారా లోకేష్‌తో భేటీ అయ్యారు. ఉండవల్లిలోని నివాసంలో ఆయనను కలిసి ఫాక్స్‌కాన్ ప్రతినిధులు.. ఏపీలో ఫాక్స్‌కాన్ ప్లాంట్ ఏర్పాటుకు సంసిద్ధత వ్యక్తం చేశారు. పెట్టబడులు పెట్టి ఉద్యోగాల కల్పనకు సూత్రప్రాయంగా అంగీకరించారు. మరోవైపు ఏపీలో ఫాక్స్‌కాన్ మ్యానుఫ్యాక్చరింగ్ సిటీ నిర్మించాలని నారా లోకేష్ వారిని కోరారు. సౌకర్యాలను ఏపీ ప్రభుత్వం కల్పిస్తుందన్న నారా లోకేష్.. మ్యానుఫ్యాక్చరింగ్ హబ్ విషయంలో చంద్రబాబు విజన్ వారికి వివరించారు.