10 గంటల్లో 4.6 కిలోలు తగ్గిన అమన్ సెహ్రావత్

పారిస్ 2024 ఒలింపిక్స్ పురుషుల రెజ్లింగ్‌లో 21 ఏళ్ల అమన్ సెహ్రావత్‌ భారత్‌కు కాంస్య పతకాన్ని అందించాడు. ఈ మెగా ఈవెంట్‌లో భారత్‌ నుంచి పాల్గొన్న ఏకైక పురుష రెజ్లర్‌గా ఉన్న సెహ్రావత్.. ఉడుం పట్టు పట్టి బ్రాజ్ మెడల్ సొంతం చేసుకున్నాడు. అయితే ఈ మెడల్ సాధించడాని కంటే ముందు.. ఈ 21 ఏళ్ల కుర్రాడు అనర్హత వేటు పడే ముప్పును ఎదుర్కొన్నాడు. కానీ బ్రాంజ్ మెడల్ మ్యాచ్‌కు ముందు రాత్రంతా నిద్రపోకుండా వర్కౌట్ చేసి బరువు తగ్గించుకుని బరిలో నిలిచాడు. బ్రాంజ్ మెడల్ కొట్టేశాడు. ఇది వరకే వినేష్ ఫొగాట్ విషయంలో అనర్హత వేటు పడిన నేపథ్యంలో భారత సహాయ సిబ్బంది కూడా కఠోరంగా శ్రమించారు.

అసలేం జరిగిందంటే..

జాతీయ మీడియా ప్రకారం.. అమన్ సెహ్రావత్ పారిస్ 2024 ఒలింపిక్స్‌లో 57 కిలోల ఈవెంట్‌లో పాల్గొన్నాడు. కానీ అతడు సెమీ ఫైనల్ ఓడిపోయాక.. బరువు చూసుకుని షాక్ అయ్యాడు. ఉండాల్సిన బరువు కంటే సుమారు 4.5 కిలోల బరువు ఎక్కువగా ఉన్నాడు. ఏకంగా 61.6 కిలోల బరువు ఉన్నాడు. కానీ బ్రాంజ్ మెడల్ మ్యాచుకు కొన్ని గంటల సమయం మాత్రమే మిగిలి ఉంది. అప్పటికే అధిక బరువు విషయంలో వినేష్ ఫొగాట్ అనర్హత వేటుకు గురైంది. ఫైనల్ ఆడకుండా నిషేధాన్ని ఎదుర్కొంది. దీంతో అమన్ విషయంలోనూ అదే జరుగుతుందా? అనే టెన్షన్ కోచింగ్ స్టాఫ్‌లో మొదలైంది. కానీ దీన్ని అధిగమించేందుకు కఠినమైన షెడ్యూల్‌ను ఫిక్స్ చేశారు.

కోచ్‌లు విరేంద్ర దహియా, జగ్మందర్ సింగ్‌లు అమన్ సెహ్రావత్ కోసం పక్కా ప్రణాళికలు రచించారు. వర్కౌట్లు ఏవి ఎప్పుడు చేయాలి అనే ప్లాన్ వేసుకున్నారు. అమన్ కూడా బరువు తగ్గేందుకు కఠోర సాధన చేశాడు. తొలుత 21 ఏళ్ల అమన్ సెహ్రావత్‌ వేడినీళ్ల స్నానం చేశాడు. ఇది గంట పాటు జరిగింది. ఆ తర్వాత అర్ధరాత్రి దాటాక జిమ్‌లో సుమారు 30 నిమిషాలు ట్రెడ్‌మిల్‌పై నడిచాడు. ఆ తర్వాత 30 నిమిషాల పాటు బ్రేక్ తీసుకున్న అమన్.. సుమారు సెషన్ల పాటు ఐదేసి నిమిషాల చొప్పు ఆవిరి స్నానం చేశాడు. అయితే ఇవన్నీ చేసినా అతడు అనుకున్నంత బరువు తగ్గలేదు. కేవలం 3.6 కిలోల బరువు మాత్రమే తగ్గాడు. సుమారు కిలో బరువు అదనంగా ఉన్నాడు. ఈ సమయంలో భారత బృందంలో టెన్షన్ మొదలైంది. కానీ మళ్లీ సెషన్స్ నిర్వహించారు.

మసాజ్ చేయడం, ఆ తర్వాత లైట్ జాగింగ్ రన్నింగ్ సెషన్స్ నిర్వహించారు. దీంతో మ్యాచ్ రోజైన శుక్రవారం ఉదయం 4.30 గంటలకు అతడు 4.6 కిలోల బరువు తగ్గాడు. అప్పుడు అతడి బరువు 56.9 కిలోల బరువు అంటే.. తాను పోటీ పడే 57 కిలోల ఈవెంట్ కంటే వంద గ్రాములు తక్కువ బరువు ఉన్నాడు. దీంతో అంతా ఊపిరిపీల్చుకున్నారు. దాదాపు 10 గంటల పాటు నిర్విరామంగా కష్టపడి అమన్.. తన బరువును తగ్గించుకున్నాడు. బౌట్‌లో పాల్గొని.. భారత్‌కు కాంస్య పతకాన్ని అందించాడు.