ఏపీ సీఎం కార్యదర్శిగా ఐఏఎస్ రాజమౌళి,,,ఉత్తర్వులు జారీ

ఆంధ్రప్రదేశ్ ముఖ్యమంత్రి నారా చంద్రబాబు నాయుడు కార్యదర్శిగా సీనియర్‌ ఐఏఎస్‌ అధికారి ఏవీ రాజమౌళి నియమితులయ్యారు. ఉత్తర్‌ప్రదేశ్‌ కేడర్‌కు చెందిన రాజమౌళి మూడేళ్ల డిప్యుటేషన్‌పై ఏపీకి వచ్చిన సంగతి తెలిసిందే. ఆయనను ఉత్తర్‌ప్రదేశ్ ప్రభుత్వం గురువారం రిలీవ్‌ చేయగా.. ఆయన ఏపీ కేడర్‌లో శుక్రవారం రిపోర్ట్‌ చేశారు. ఆ వెంటనే సీఎంవోలో సీఎం కార్యదర్శిగా పోస్టింగ్‌ ఇస్తూ సీఎస్ నీరబ్‌కుమార్‌ ప్రసాద్‌ ఉత్తర్వులు జారీచేశారు. రాజమౌళిది ఆంధ్రప్రదేశ్ కాగా.. 2003 బ్యాచ్‌ ఐఏఎస్‌ అధికారి. ఆయన గతంలోనూ టీడీపీ హయాం (2014-2019)లో చంద్రబాబుకి కార్యదర్శిగా పనిచేసిన సంగతి తెలిసిందే.

గతంలో కూడా రాజమౌళి చంద్రబాబుకు అత్యంత సన్నిహితుడిగా ఉంటూ ఏపీ సీఎంవోలో కీలక బాధ్యతలు నిర్వహించారు. ఇప్పుడు మరో మూడేళ్లు ఆయన సీఎంవోలోనే విధులు నిర్వహిస్తారు. రాజమౌళి రాకతో సీఎంవో కీలక అధికారుల సంఖ్య నాలుగుకు చేరింది. ప్రస్తుతం సీఎం ముఖ్య కార్యదర్శిగా ముద్దాడ రవిచంద్ర, సీఎం కార్యదర్శిగా ప్రద్యుమ్న, అదనపు కార్యదర్శిగా కార్తికేయ మిశ్రాలు ఉన్నారు.

మరోవైపు ముఖ్యమంత్రి నారా చంద్రబాబు నాయుడు వికసిత్‌ ఆంధ్రప్రదేశ్‌-2047 విజన్‌ డాక్యుమెంట్‌పై నీతి ఆయోగ్‌ సీఈవో బీవీఆర్‌ సుబ్రహ్మణ్యం, సంస్థ ప్రతినిధులతో సచివాలయంలో సమావేశమయ్యారు. వికసిత్‌ భారత్‌ -2047కు ప్రణాళిక సిద్ధం చేస్తున్నట్లే వికసిత్‌ ఆంధ్రప్రదేశ్‌ 2047కు విజన్‌ డాక్యుమెంట్‌ తయారుచేయడంపై చర్చించారు. రాబోయే రోజుల్లో రాష్ట్రాభివృద్ధికి చేపట్టాల్సిన కార్యక్రమాలు, ప్రాజెక్టులపై చర్చ జరిగింది. ఏపీలో ఆర్టిపిషియల్ ఇంటెలిజెన్స్ యూనవర్శిటీ ఏర్పాటు చేయాలనే ఆలోచన ఉందన్నారు చంద్రబాబు. భవిష్యత్‌లో ఏఐతో అన్ని రంగాల్లో మార్పులు వస్తాయన్నారు.

ప్రధానంగా అమరావతి, విశాఖలను ఏఐ హబ్స్‌గా రూపొందించేలా ప్రణాళికలు సిద్ధం చేయాలన్నారు చంద్రబాబు. అలాగే వ్యవసాయ రంగంలో నూతన ఆవిష్కరణలతో పాటు, ప్రకృతి వ్యవసాయాన్ని ప్రోత్సహించేలా ఉండాలన్నారు. ప్రతి సామాన్యుడికీ ఫలాలు అందాలని.. రాష్ట్రస్థాయి నుంచి మండల, కుటుంబస్థాయి వరకు ఒక యూనిట్‌గా తీసుకునేలా కార్యాచరణ ఉండాలన్నారు.టెక్నాలజీని ఉపయోగించుకుని పేదరికం లేని సమాజం సాధించాలి అన్నారు. అలాగే సంపద సృష్టికి దోహదపడే పాలసీలకు ప్రాధాన్యం ఇవ్వాలని.. దీనికి సంబంధించి డాక్యుమెంట్‌ రూపొందించాలన్నారు.