దక్షిణాదిలో తొలి డబుల్ డెక్కర్ ఫ్లైఓవర్.. బెంగళూరులో తీరనున్న ట్రాఫిక్ కష్టాలు

దక్షిణాది తొలి డబుల్ డెక్కర్ ఫ్లైఓవర్ బెంగళూరు నగరంలో బుధవారం ప్రారంభమైంది. రాగిగూడ నుంచి సెంట్రల్ సిల్క్ బోర్డు జంక్షన్ వరకూ మొత్తం 3.3 కిలోమీటర్ల పొడవైన ఈ డబుల్ డెక్కర్ పైవంతెనను నిర్మించారు. కర్ణాటక ఉప-ముఖ్యమంత్రి డీకే శివకుమార్, ఆ రాష్ట్ర రవాణా మంత్రి రామలింగారెడ్డి, ఇతర ఎమ్మెల్యేలు, అధికారులు ఈ ప్రారంభోత్సవ కార్యక్రమంలో పాల్గొన్నారు. ఈ డబుల్ డెక్కర్ ఫ్లైఓవర్‌ ఎగువ డెక్‌లో ఎలివేటెడ్ మెట్రో కారిడార్.. దిగువ డెక్‌లో వాహనాల రాకపోకలకు రహదారి నిర్మించారు. బెంగళూరు మెట్రో రైల్ కార్పొరేషన్ లిమిటెడ్ కారణంగా ఈ డబుల్ డెక్కర్ ఫ్లైఓవర్‌ ప్రారంభం ఆలస్యమైంది. అయితే, ఈ ఫ్లైఓవర్‌ను బలవంతంగా తెరుస్తామని ఆప్ నాయకులు గతవారం హెచ్చరించారు. CSB జంక్షన్ వద్ద ట్రాఫిక్ రద్దీ నుంచి ఉపశమనం కలిగించేలా ఈ ఫ్లైఓవర్ నిర్మాణాన్ని ప్రతిపాదించారు. ఆఫ్కాన్స్ సంస్థ ఈ వంతెన నిర్మాణ కాంట్రాక్ట్‌ దక్కించుకుంది.

 రాగిగూడ నుంచి వచ్చే వాహనదారులు ర్యాంప్ ఏ నుంచి, హెచ్‌ఎస్‌ఆర్ లేఔట్ నుంచి వచ్చే వాహనాలు ర్యాంప్ సి నుంచి ఫ్లైఓవర్‌ మీదకు చేరుకోవాల్సి ఉంటుంది. గ్రౌండ్ లెవల్‌లో ఉన్న ర్యాంప్ B.. ర్యాంప్ ఏ నుంచి ఔటర్ రింగ్ రోడ్, హోసూర్ రోడ్‌లను కలుపుతుంది. హెచ్‌ఎస్‌ఆర్ లేఅవుట్ నుంచి వచ్చే వారు ర్యాంప్ డి, మెట్రో ఎల్లో లైన్‌ నుంచి బీటీఎం లేఅవుట్‌‌కు వెళ్లాలంటే ర్యాంప్ ఈ ద్వారా చేరుకోవాలి. ర్యాంప్ ఏ, బీలు రెండూ అత్యంత రద్దీగా ఉండే జాతీయ రహదారి (NH-44) మీదుగా ఇప్పటికే ఉన్న మడివాలా ఫ్లైఓవర్‌‌ను కలుపుతాయి.

ఈ డబుల్ డెక్కర్ ఫ్లైఓవర్ తొలి దశలో ర్యాంప్-ఏ, బి,సీ ర్యాంపుల నిర్మాణం మే 2024 నాటికి పూర్తిచేయగా.. మిగతా రెండూ ఈ ఏడాది డిసెంబరు చివరికి పూర్తవుతాయని బీఎంఆర్సీఎల్ తెలిపింది. దక్షిణాది రాష్ట్రంలో ఇదే మొట్టమొదటి డబుల్ డెక్కర్ ఫ్లైఓవర్. దేశ ఐటీ రాజధాని బెంగళూరు నగరంలో వాహనదారుల కష్టాలు వర్ణనాతీతం. వర్షాలు కురిసినప్పుడు ఇరుకైన రోడ్లు, లెక్కలేనన్ని వాహనాలతో కిలోమీటరు దూరం ప్రయాణానికి గంటల సమయం పడుతుంది. సిల్క్ బోర్డ్ జంక్షన్ వద్ద పరిస్ధితి దారుణంగా ఉంటుంది. డబుల్ డెక్కర్ ఫ్లైఓవర్ అందుబాటులోకి రావడంతో ట్రాఫిక్ కష్టాల నుంచి బెంగళూరు వాసులకు కొంత మేర ఉపశమనం కలగనుంది.

హైదరాబాద్‌లోనూ డబుల్ డెక్కర్ ఫ్లైఓవర్‌ను నిర్మించేందుకు తెలంగాణ ప్రభుత్వం కసరత్తు చేస్తోంది. ఇటీవల జాతీయ రహదారుల సంస్థతో కలిసి.. హైదరాబాద్ మెట్రో రైల్ కార్పొరేషన్ దీనికి సంబంధించిన కీలక ప్రకటన చేసింది. మదీనాగూడ వద్ద 1.2 కి.మీ. డబుల్ డెక్కర్ ఫ్లైఓవర్ నిర్మాణానికి డీపీఆర్ సిద్ధం చేసినట్టు తెలిపింది.