ఏపీ ఎన్నికలపై ఆసక్తికర లెక్కలు.. 175మందిలో జనసేన ఎమ్మెల్యే టాప్

ఆంధ్రప్రదేశ్ అసెంబ్లీ ఎన్నికలకు సంబంధించి అసోసియేషన్‌ ఫర్‌ డెమొక్రటిక్‌ రిఫామ్స్‌ (ఏడీఆర్‌) ఆసక్తికర లెక్కల్ని బయటపెట్టింది. ఓవరాల్‌గా ఏ పార్టీకి ఎంత శాతం ఓట్లు వచ్చాయి.. నోటా ఓట్ల శాతం ఏ నియోజకవర్గంలో ఎక్కువగా ఉందో ఓ విశ్లేషణను విడుదల చేశారు. ఏపీలో గాజువాక నియోజకవర్గం నుంచి గెలిచిన టీడీపీ అభ్యర్థి పల్లా శ్రీనివాసరావుకు ఏకంగా 95,235 ఓట్ల మెజార్టీ వచ్చిన సంగతి తెలిసిందే. ఆ తర్వాత భీమిలి నుంచి గెలిచిన టీడీపీ ఎమ్మెల్యే గంటా శ్రీనివాసరావుకు 92,401 వేల మెజార్టీ దక్కింది. ఆ తర్వాత నారా లోకేష్‌కు మంగళగిరి నియోజకవర్గంలో 91,413 ఓట్ల మెజార్టీ దక్కింది

ఆంధ్రప్రదేశ్‌ అసెంబ్లీ ఎన్నికల్లో అత్యధికశాతం ఓట్లు సాధించిన వారిలో.. పురుషుల్లో విశాఖపట్నం దక్షిణ నియోజకవర్గం నుంచి పోటీచేసిన జనసేన అభ్యర్థి వంశీకృష్ణ శ్రీనివాస్‌కు ఏకంగా 70.24శాతం ఓట్లు పడ్డాయి. మహిళల్లో చూస్తే.. విజయనగరం నుంచి పోటీచేసిన టీడీపీ అభ్యర్థి అదితి విజయలక్ష్మీ గజపతిరాజు 64.21శాతం అత్యధిక ఓట్లు వచ్చినట్లు ఏడీఆర్‌ తెలిపింది.

అత్యల్పంగా అనంతపురం జిల్లా మడకశిర తెలుగు దేశం పార్టీ అభ్యర్థి ఎం.ఎస్‌.రాజు (0.19%) శాతం ఓట్లు వచ్చాయి. ప్రకాశం జిల్లా గిద్దలూరు అభ్యర్థి అశోక్‌రెడ్డి (0.47%) అత్యల్ప ఓట్ల శాతం తేడాతో గెలుపొందారు. ఈ ఎన్నికల్లో టీడీపీ 45.60%, వైఎస్సార్‌సీపీకి 39.37%, జనసేనకు 6.87%, బీజేపీకి 2.83%, కాంగ్రెస్‌కు 1.72%, నోటాకు 1.09%, బీఎస్పీకి 0.60%, సీపీఎంకు 0.13%, సీపీఐకి 0.04%, ఇతర పార్టీలకు 1.75% ఓట్లు వచ్చినట్లు ఏడీఆర్ సంస్థ తెలిపింది.

మొత్తం 175 మంది ఎమ్మెల్యేల్లో 22 మంది మహిళలు ఉన్నారు. మహిళా విజేతలందరికీ 40%కిపైగా ఓట్లు రావడం విశేషం. అంతేకాదు ఏపీ మంత్రి కింజరాపు సొంత నియోజకవర్గం టెక్కలిలో నోటాకు అత్యధికంగా 3.79 శాతం ఓట్లు పోల్ కావడం విశేషం. ఆ తర్వాతి స్థానాల్లో సాలూరు (3.63%), రంపచోడవరం (3.45%) నియోజకవర్గాలు కూడా ఉన్నాయి. టెక్కలిలో నోటాకు ఎక్కువ ఓట్లు రావడం చర్చనీయాంశం అయ్యింది.