స్టేజ్‌పైనే కోడి మెడ కొరికేసి రక్తం తాగాడు.. డ్యాన్సర్, నిర్వాహకులపై కేసు

అనకాపల్లి జిల్లాలో దిగ్భ్రాంతికర ఘటన జరిగింది. ఓ యువకుడు డ్యాన్స్ చేస్తూ.. అందరూ చూస్తుండగానే దారుణంగా కోడి మెడ కొరికేశాడు. ఈ వీడియో వైరల్ కావడంతో మనోడు చిక్కుల్లో పడ్డాడు.. యువకుడితో పాటూ ఆ కార్యక్రమాన్ని నిర్వహించినవారిపై కేసు నమోదైంది. అనకాపల్లి జిల్లాలోని ఓ ప్రాంతంలో డ్యాన్స్ కార్యక్రమం ఏర్పాటు చేశారు. ఓ యువకుడు తమిళ హీరో రాఘవ లారెన్స్ డైరెక్షన్‌లో వచ్చిన కాంచన మూవీలోని పాటకు డ్యాన్స్ చేశాడు. విలయ ప్రళయ మూర్తి వచ్చింది ఇదే కాంచన అనే అంటూ స్టేజీపై స్టెప్పులేశాడు. కాంచన సినిమాలో లారెన్స్‌లా ఎర్ర చీర కట్టుకుని.. పాటలో బాగా ఇన్వాల్వ్ అయ్యాడు.

ఆ కుర్రాడు డ్యాన్స్ చేస్తూ.. చేతిలో ఉన్న కోడి మెడను అందరూ చూస్తుండగానే కొరికాడు. ఓ కోడి మెడను దూరంగా విసిరాడు.. అందరూ చూస్తుండగానే స్టేజ్‌పైనే కోడి రక్తాన్ని తాడేశాడు. ఆ డ్యాన్సర్ మొహం, ఒంటి నిండా ఆ కోడి రక్తం అయ్యింది. మెడ కొరికేయడంతో ఆ కోడి అతడి చేతుల్లో విలవిల్లాడుతుండగా.. దానిని పట్టుకునే ఆ యువకుడు డ్యాన్స్ చేశాడు. ఈ ఘటన ఈ నెల 6వ తేదీన జరిగింది.. అయితే ఈ వీడియో సోషల్ మీడియాలో వైరల్ అయ్యింది.

ఈ వీడియోను పెటా (People For The Ethical Treatment of Animal) సీరియస్‌గా తీసుకుంది. వెంటనే ఆ సంస్థ ప్రతినిధులు అనకాపల్లి పోలీసులకు ఫిర్యాదు చేశారు. డ్యాన్స్ చేస్తూ జనాల మధ్యలో ఒక వ్యక్తి ఉద్దేశపూర్వకంగా కోడి తలను తన పళ్లతో కొరికి చంపాడని, ఎఫ్ఐఆర్ నమోదు చేయాలని కోరింది పెటా. ఆ డ్యాన్స్ కార్యక్రమం జరిగిన చోట ప్రేక్షకుల్లో పిల్లలు కూడా ఉన్నారని, వినోదం పేరిట ఈ వీడియోను సోషల్ మీడియాలో కూడా షేర్ చేయడం దారుణమన్నారు పెటా ప్రతినిధులు.

పెటా ఫిర్యాదుతో పోలీసులు కేసు నమోదు చేశారు. ఐపీసీ, జంతువుల పట్ల క్రూరత్వం నిరోధక చట్టం-1960లోని సంబంధిత సెక్షన్ కింద డ్యాన్సర్‌తో పాటు నిర్వాహకులపై కూడా ఎఫ్ఐఆర్ ఫైల్ అయ్యింది. డాన్సర్‌తో పాటు డాన్స్ ట్రూప్ కంపెనీ విష్ణు ఎంటర్‌ప్రైజెస్, నిర్వాహకులపై కేసులు పెట్టారు. భారత్ న్యాయ సంహితలోని సెక్షన్ 429 ఆర్/డబ్ల్యూతో పాటు ప్రీవెన్షన్ ఆఫ్ క్రుయాలిటీ టు యానిమల్స్ యాక్ట్ 11 (1) (ఏ) కింద కేసులు ఫైల్ చేశారు. ఈ ఘటన అనకాపల్లి జిల్లాలో కలకలంరేపింది.. ఇలా బహిరంగంగా డ్యాన్స్ స్టేజ్‌పై కోడి మెడ కొరకడం కలకలంరేపుతోంది. ఇలాంటి ఘటనలపై చర్యలు తీసుకుంటేనే మరోసారి జరగవు అంటున్నారు జంతు ప్రేమికులు.