దేశంలో మళ్లీ జికా వైరస్ కలకలం.. డాక్టర్‌ సహా కుమార్తెకు పాజిటివ్

మహారాష్ట్రలో ఒకే కుటుంబంలో 2 జికా వైరస్ కేసులు వెలుగు చూడటం ప్రస్తుతం తీవ్ర సంచలనంగా మారింది. పూణెకు చెందిన ఓ డాక్టర్, ఆయన కుమార్తెకు జికా వైరస్ పాజిటివ్‌గా మెడికల్ టెస్ట్‌ల్లో తేలినట్లు డాక్టర్లు తెలిపారు. ఒకే ఇంట్లో ఇద్దరికీ జికా వైరస్ సోకడంతో అధికారులు అలర్ట్ అయ్యారు. ఆ పరిసరాల్లో జికా వైరస్ వ్యాప్తి చెందకుండా అన్ని ఏర్పాట్లు చేస్తున్నారు. ప్రస్తుతం ఆ డాక్టర్, ఆయన కుమార్తె ఆరోగ్య పరిస్థితి సాధారణంగానే ఉండటంతో అంతా ఊపిరిపీల్చుకున్నారు. కొన్ని రోజుల క్రితం ఆ డాక్టర్‌‌ జ్వరం బారిన పడగా.. తగ్గకపోవడంతో ఆస్పత్రిలో చేరాడు. ఆ తర్వాత వేరే లక్షణాలు కనిపించడంతో రక్త నమూనాలను తీసి ల్యాబ్‌కు పంపించగా.. జికా వైరస్ సోకినట్లు తేలింది.

శరీరంపై దద్దుర్లు రావడంతో ఆస్పత్రిలో చేరిన ఆ డాక్టర్ బ్లడ్ శాంపిల్స్ సేకరించిన ఆస్పత్రి వర్గాలు.. పూణెలోని నేషనల్‌ ఇన్‌స్టిట్యూట్‌ ఆఫ్‌ వైరాలజీకి పంపించారు. ఈ నెల 21వ తేదీన ఆ 46 ఏళ్ల డాక్టర్‌కు జికా వైరస్ సోకినట్లు నిర్ధారణ అయినట్లు పూణె మున్సిపల్‌ కార్పొరేషన్‌ అధికారులు వెల్లడించారు. ఈ కేసు వెలుగు చూడటంతో ఆ డాక్టర్ కుటుంబ సభ్యులకు కూడా బ్లడ్ టెస్ట్‌లు చేయగా.. అతని 15 ఏళ్ల కుమార్తెకు కూడా జికా వైరస్ పాజిటివ్‌గా తేలింది. మిగిలిన వారికి జికా వైరస్ సోకలేదని అధికారులు తెలిపారు. వారిద్దరికీ జికా వైరస్ సోకడంతో.. ఇరుగు పొరుగున ఉన్నవారికి ఏవైనా లక్షణాలు ఉన్నాయా అని అధికారులు ఆరా తీస్తున్నారు.

 జికా వైరస్ లక్షణాలు ఏంటి?

ఈ జికా వైరస్ సోకిన వారికి జ్వరం, చర్మంపై దద్దుర్లు, కండరాలు, కీళ్ల నొప్పులు, తలనొప్పి, జీర్ణకోశ సంబంధ సమస్యలు, గొంతు నొప్పి, దగ్గు వంటి రకరకాల లక్షణాలు కనిపిస్తాయి.

జికా వైరస్ ఎలా సోకుతుంది?

ఆడ ఎడిస్‌ దోమ కుట్టడం ద్వారా ఈ జికా వైరస్‌ వ్యాధి వ్యాప్తి చెందుతుంది.

జికా వైరస్ ఎక్కడ పుట్టింది?

తొలిసారిగా ఈ జికా వైరస్‌ను 1947లో ఆఫ్రికా ఖండంలోని ఉగాండా అడవుల్లోని ఓ కోతిలో గుర్తించారు. ఆ తర్వాత ఆఫ్రికన్‌ దేశాలతో పాటు భారత్, ఇండోనేషియా, మలేషియా, ఫిలిప్పిన్స్, థాయ్‌లాండ్, వియత్నాం లాంటి ఆసియా దేశాలకూ ఈ వైరస్‌ను వ్యాప్తి చెందింది. 2016 నాటికి ప్రపంచంలోని 39 దేశాల్లో ఈ జికా వైరస్‌ను గుర్తించినట్లు ప్రపంచ ఆరోగ్య సంస్థ వెల్లడించింది.