చనిపోయిన వ్యక్తి 'ఆధార్' ఏమవుతుంది? క్లోజ్ చేయాలా.. రూల్స్ ఏం చెబుతున్నాయ్

ప్రస్తుతం భారతీయుల ప్రాథమిక గుర్తింపుగా ఆధార్ కార్డు మారిపోయింది. దేశ ప్రజల జీవితాల్లో ఒక ముఖ్యమైన డాక్యుమెంటు. ఏ పని చేయాలన్నా ఇప్పుడు ఆధార్ కార్డు అడుగుతున్నారు. ఆధార్ అనేది ఒక 12 అంకెల యూనిక్ నంబర్. ఇందులో డెమొగ్రాఫిక్ సమాచారంతో పాటు బయోమెట్రిక్ సమాచారం ఉంటుంది. ప్రభుత్వ పథకాలు పొందడం నుంచి ఆదాయపు పన్నులకు సంబంధించిన పనులకు సైతం ఇప్పుడు ఆధార్ కార్డు ఉండాలి. చిన్న పిల్లలకు సైతం ఆధార్ తీసుకోవాలి. అయితే, ఇటీవలి కాలంలో ఆధార్ కార్డు మోసాలు పెరిగిపోతున్నాయి. ఇతరుల కార్డులు ఉపయోగించి ఆర్థిక లావాదేవీలు చేస్తున్నారు. మరి మరణించిన వ్యక్తి ఆధార్ కార్డుతో మోసాలకు పాల్పడితే ఎలా? చనిపోయిన వ్యక్తి ఆధార్ ఏమవుతుంది? ఓసారి తెలుసుకునే ప్రయత్నం చేద్దాం.

ఆధార్ కార్డులను యూనిక్ ఐడెంటిఫికేషన్ అథారిటీ ఆఫ్ ఇండియా జారీ చేస్తుంది. ప్రతి భారతీయుడికీ యూఐడీఏఐ ద్వారానే కార్డు జారీ అవుతుంది. అయితే, ప్రస్తుతానికైతా ఆధార్ కార్డును క్యాన్సిల్ చేయడం లేదా సరెండర్ చేసేందుకు ఎలాంటి వ్యవస్థ లేదు. కానీ, ఆధార్ భద్రతకు సంబంధించి ప్రత్యేక ఏర్పాట్లు ఉన్నాయి. ఆధార్ కార్డును సరెండర్ చేయడం, క్యాన్సిల్ చేయడం కుదరదు. కానీ, దానిని లాక్ చేయవచ్చు. ఇలా లాక్ చేయడం ద్వారా ఇతరులు ఎవరూ దానిని యాక్సెస్ చేయలేరు. ఒకసారి లాక్ చేసిన తర్వాత మరణించిన వ్యక్తి ఆధార్ ని అన్‌లాక్ చేయడం అనేది అతని కుటుంబ సభ్యులకు మాత్రమే అవకాశం ఉంటుంది. మరి ఆధార్ ఎలా లాక్ చేయాలో తెలుసుకుందాం.

ముందుగా యూఐడీఏఐ అధికారిక వెబ్‌సైట్ uidai.gov.in ఓపెన్ చేయాలి.

ఆ తర్వాత మై ఆధార్ ఆప్షన్ పై క్లిక్ చేయాలి.

ఆ తర్వాత ఆధార్ సర్వీసెస్ పై క్లిక్ చేయాలి.

అక్కడ కనిపించే ఆప్షన్లో lock/ unlock Aadhaar biometrics ఎంచుకోవాలి.

కొత్త పేజీలోకి వెళ్తుంది. అక్కడ ఆధార్ నంబర్, క్యాప్చా ఎంటర్ చేయాలి.

సెండ్ ఓటీపీ పై క్లిక్ చేయాలి. రిజిస్టర్డ్ మొబైల్‌కు వచ్చిన ఓటీపీ ఎంటర్ చేయాలి.

అందులో మీకు కావాల్సిన ఆప్షన్ ఎంచుకుని ఓకే చేస్తే సరిపోతుంది.

మరణించిన వ్యక్తి ఆధార్ బయోమెట్రిక్స్ లాక్ చేయడం ద్వారా దుర్వినియోగం చేయకుండా చూసుకోవచ్చు.