వైఎస్ భారతి, అవినాష్ రెడ్డిపై షర్మిల సంచలన వ్యాఖ్యలు

కడప జిల్లాలో వైఎస్ వారసుల మధ్య రాజకీయ మాటలు ముదురుతున్నాయి. అవినాష్ రెడ్డి మీద సునీత, వైఎస్ జగన్ మీద షర్మిల ఇలా.. ఒకరిపై ఒకరు మాటల దాడి చేసుకుంటున్నారు. కడప లోక్ సభ నియోజకవర్గం నుంచి కాంగ్రెస్ పార్టీ అభ్యర్థిగా పోటీచేస్తున్న వైఎస్ షర్మిల.. తాజాగా వైఎస్ భారతి, వైఎస్ అవినాష్ రెడ్డి సంచలన వ్యాఖ్యలు చేశారు. ఇంతకాలం వైఎస్ వివేకా హత్యకేసులో నిందితుడిగా ఉన్న అవినాష్ రెడ్డికి టికెట్ ఎలా ఇస్తారంటూ ప్రశ్నిస్తూ వచ్చిన షర్మిల.. ఈ సారి ఏకంగా అవినాష్ రెడ్డి ఊరు దాటిపోవడానికి సిద్ధమవుతున్నారంటూ సంచలన వ్యాఖ్యలు చేశారు. వచ్చే ఎన్నికల్లో ఓడిపోతే అరెస్ట్ చేస్తారనే భయంతో.. ఊరుదాటి పోయేందుకు పాస్ పోర్టులు కూడా సిద్ధం చేసుకుంటున్నారంటూ షర్మిల విమర్శించారు. అవినాష్ రెడ్డిని గెలిపిస్తే నేరం చేసినట్లేనన్న షర్మిల.. జైలుకు వెళ్లే ఎంపీ కావాలో.. ప్రజలకు అందుబాటులో ఉండే ఎంపీ కావాలో తేల్చుకోవాలంటూ సంచలన వ్యాఖ్యలు చేశారు.

మరోవైపు వైఎస్ జగన్ మోహన్ రెడ్డి సతీమణి, వదిన వైఎస్ భారతిపైనా షర్మిల సంచలన వ్యాఖ్యలు చేశారు. ఎల్లప్పుడూ సింగిల్ ప్లేయర్‌గా వాళ్లే అధికారంలో ఉండాలనేదే భారతి వ్యూహమన్న షర్మిల.. గొడ్డలితో అందరినీ నరికేయండి.. మీరే సింగిల్ ప్లేయర్‌గా ఉంటారంటూ తీవ్రవ్యాఖ్యలు చేశారు. కడప లోక్ సభ నియోజకవర్గం నుంచి వైసీపీ అభ్యర్థిగా సిట్టింగ్ ఎంపీ అవినాష్ రెడ్డి బరిలో ఉన్నారు. అలాగే కాంగ్రెస్ పార్టీ తరుఫున వైఎస్ షర్మిల పోటీచేస్తున్నారు. వైఎస్ వివేకాను హత్యకేసులో నిందితులను చట్టసభలకు వెళ్లనివ్వనంటూ షర్మిల.. కడప స్థానాన్ని పోటీచేయడానికి ఎంచుకున్నారు. అప్పటి నుంచి వైఎస్ కుటుంబంలో విభేదాలు మొదలయ్యాయి.

షర్మిల, వైఎస్ జగన్ మేనత్త విమలారెడ్డి.. జగన్, అవినాష్ వైపు నిలుస్తున్నారు. అలాగే వైఎస్ వివేకా సతీమణి సౌభాగ్యమ్మ, కూతురు సునీత, వైఎస్ షర్మిల ఓ వైపు నిలుస్తున్నారు. అయితే వైఎస్ షర్మిల.. తన ప్రత్యర్థులతో చేతులు కలిపి తమను ఓడించాలని చూస్తున్నారంటూ సీఎం వైఎస్ జగన్ సైతం ఇటీవల ఆరోపించారు. షర్మిల అంటే జాలేస్తోందని.. కడపలో డిపాజిట్లు కోల్పోతుందని బాధగా ఉందంటూ ఇటీవల ఓ ఇంటర్వ్యూలోనూ జగన్ ప్రస్తావించారు. చెల్లె్మ్మ అంటే ప్రేమేనన్న జగన్.. రాంగ్ డైరెక్షన్‌లో వెళ్తున్నారంటూ విమర్శించారు. మరోవైపు వైఎస్ జగన్ విమర్శలను షర్మిల సైతం అదే స్థాయిలో తిప్పికొడుతున్నారు.