వేసవిలో పుచ్చకాయ తింటున్నారా.. అయితే జాగ్రత్త!

ప్రస్తుతం వేసవిలో ఎండలు మండిపోతున్నాయి. దీంతో ప్రజలు అల్లాడిపోతున్నారు. సూర్యుడి తాపం నుంచి తప్పించుకునేందుకు రకరకాల ప్రయత్నాలు చేస్తున్నారు. ఇక ఎండాకాలంలో వచ్చే పుచ్చకాయలను బాగా తింటున్నారు. శరీరంలో నీటి శాతం పెంచడంతోపాటు చలువ కోసం పుచ్చకాయలను తింటున్నారు. దీంతో రోడ్ల పక్కన ఎక్కడ చూసినా పుచ్చకాయలు గుట్టలు గుట్టలుగా పోసి అమ్ముతున్నారు. అయితే కల్తీ కేటుగాళ్లు ఈ పండ్లను కూడా వదలడం లేదు. వాటిని కూడా కల్తీ చేస్తూ డబ్బులు సంపాదించుకుంటున్నారు. తాజాగా పుచ్చకాయలను కల్తీ చేస్తూ ఓ ముఠా అడ్డంగా దొరికిపోయింది.

ప్రస్తుతం పుచ్చకాయలను కల్తీ చేస్తున్న ఓ వీడియో సోషల్ మీడియాలో తెగ వైరల్‌గా మారుతోంది. అయితే అందులో ఆ కల్తీ ముఠాను ఓ పోలీస్ పట్టుకుని.. ఆ కల్తీ ఎలా చేస్తున్నారు అనేది ప్రత్యక్షంగా చూపించడం కనిపిస్తోంది. మంచి పుచ్చకాయలు అంటే సాధారణంగా లోపల ఎర్రగా ఉంటాయి. అయితే కొన్ని బాగాలేని, పాడైన పుచ్చకాయలు మాత్రం లోపల గుజ్జు తెల్లగా ఉంటుంది. ప్రజలు ఎర్రగా ఉన్న పుచ్చకాయలనే ఎక్కువగా కొనేందుకు ఇష్టపడుతారు. అది అదనుగా భావించిన కల్తీ ముఠా.. పుచ్చకాయల్లో ఎరుపు రంగు నింపుతూ దొరికిపోయారు.

'సిరంజిలలో ఎరుపు రంగు నింపి దాన్ని ఆ పుచ్చకాయలకు ఇస్తూ కల్తీ చేస్తున్నారు. అయితే ఈ ముఠాను ఓ పోలీస్ అధికారి పట్టుకున్నారు. పక్కా సమాచారంతో దాడి చేసిన ఆ పోలీసు.. ఈ విషయం అందరికీ తెలపాలని అనుకున్నారు. దీంతో వాళ్లు చేసే మోసాలను వీడియో తీసి సోషల్ మీడియాలో పోస్ట్ చేశారు. పుచ్చకాయను ఎలా కల్తీ చేస్తారనేదానిపై అందరికీ అవగాహన కలిగించేలా ఆ పండ్ల వ్యాపారి చేసే దారుణానికి సంబంధించిన వీడియోను వైరల్ చేశారు.

ఈ వీడియోలో ఓ వ్యక్తి పుచ్చకాయలకు కలర్ కోసం ఎరుపు రంగు.. తియ్యగా ఉండేందుకు మరో ద్రవాన్ని నింపుతున్నట్లు కనిపిస్తోంది. ఆ ఎరుపు రంగును తయారు చేసేందుకు ముందుగా కొన్ని రసాయనాలను ఉపయోగించాడు. అనంతరం ఆ ద్రవాలను ఇంజెక్షన్ల ద్వారా పుచ్చకాయల్లోకి ఎక్కిస్తున్నారు. అది చూసిన పోలీస్ అధికారి కూడా ఆశ్చర్య పోవడం గమనార్హం. దొరికిపోయిన ఆ వ్యక్తి.. పోలీస్‌కు లంచం ఇచ్చేందుకు ప్రయత్నించాడు. కానీ అది తిరస్కరించిన పోలీస్.. అతడ్ని అరెస్ట్ చేసి జైలుకు తరలించాడు. అయితే ఆ వీడియో చూసిన కొందరు నెటిజన్లు.. ప్రజల అవగాహన కోసం తీసిన వీడియో మాత్రమేనని.. ఆ కల్తీ అనేది అంతా అబద్ధం అంటూ ట్వీట్లు చేస్తున్నారు.