హైవేపై వరుసగా 4 కంటైనర్లు.. ఆపి చెక్ చేస్తే.. ఏకంగా రూ.2 వేలకోట్లు

అల్లు అర్జున్ హీరోగా నటించిన జులాయి సినిమా అందరికీ గుర్తుండే ఉంటుంది. అందులో కంటైనర్‌లో డబ్బు తరలించే సీన్ గురించి.. ప్రత్యేకంగా చెప్పా్ల్సిన పనిలేదు. ఒకటి కాదు రెండు కాదు ఏకంగా వందల కోట్ల రూపాయలను కంటైనర్లో తరలిస్తుంటారు ఆ సినిమాలో . కట్టలు కట్టలుగా నోట్లకట్టలను పేర్చి కంటైనర్లో ఉంచిన సీన్ చూస్తే.. వామ్మో అంత డబ్బే అనిపిస్తుంది. అయితే సేమ్ అలాంటి తరహా ఘటనే అనంతపురం జిల్లాలో జరిగింది. నాలుగు కంటైనర్లలో ఏకంగా 2 వేల కోట్ల రూపాయలు తరలించడాన్ని పోలీసులు గుర్తించారు. పోలీసుల తనిఖీల్లో కంటైనర్లలో రెండు వేల కోట్లు తరలిస్తున్న వైనం వెలుగు చూసింది. అయితే ఇక్కడో మరో ట్విస్ట్ ఉంది.

ఎన్నికల కోడ్ అమల్లో ఉన్న నేపథ్యంలో ఏపీవ్యాప్తంగా పోలీసులు కట్టుదిట్టమైన చర్యలు చేపట్టారు. ఎన్నికల్లో నగదు, మద్యం అక్రమ రవాణాను అడ్డుకునేందుకు ఎక్కడిక్కడ తనిఖీలు చేస్తున్నారు. ఈ క్రమంలోనే హైదరాబాద్- బెంగళూరు జాతీయ రహదారిపై గురువారం అనంతపురం జిల్లా పోలీసులు తనిఖీలు నిర్వహించారు. ఈ తనిఖీల్లో పామిడి మండలం గజరాంపల్లి వద్ద నాలుగు కంటైనర్లలో డబ్బు తరలిస్తూ ఉండటాన్ని పోలీసులు గుర్తించారు. ఒక్కో కంటైనర్‌లో 500 కోట్లు చొప్పున.. 4 కంటైనర్లలో 2 వేల కోట్లు తరలిస్తూ ఉండటాన్ని పోలీసులు గుర్తించారు. వెంటనే ఈ విషయాన్ని జిల్లా కలెక్టర్, రిటర్నింగ్ అధికారి, ఆదాయపన్ను శాఖ అధికారులకు చేరవేశారు.

అయితే పోలీసు అధికారుల విచారణలో ఈ డబ్బును రిజర్వ్ బ్యాంక్ ఆఫ్ ఇండియా వద్ద డిపాజిట్ చేసేందుకు తీసుకెళ్తున్నట్లు తేలింది. సిబ్బంది ద్వారా వివరాలు తెలుసుకున్న పోలీసులు.. రెండు వేల కోట్లను కేరళలోని కొచ్చి నుంచి హైదరాబాద్ తరలిస్తున్నట్లు తెలుసుకున్నారు. ఆర్బీఐ వద్ద డిపాజిట్ చేసేందుకు ఈ మొత్తాన్ని తీసుకెళ్తున్నట్లు సిబ్బంది పోలీసులకు వివరించారు. అనంతరం ఆదాయపన్ను అధికారులు, ఎన్నికల అధికారుల ద్వారా వివరాలను సరిచూసుకున్న పోలీసులు.. వారిని అనుమతించారు. అయితే కంటైనర్లలో 2 వేల కోట్లు తరలిస్తున్నారన్న వ్యవహారం మాత్రం స్థానికంగా హాట్ టాపిక్‌గా మారిపోయింది.