ట్రెండింగ్
Epaper    English    தமிழ்

పోలీసులను చూడగానే డ్రైవర్ తత్తరపాటు..కారు ఆపి చెక్ చేస్తే వామ్మో.

Andhra Pradesh Telugu |  Suryaa Desk  | Published : Tue, Apr 30, 2024, 09:18 PM

ఏపీలో ఎన్నికల పోలింగ్ తేదీ సమీపిస్తోంది. మే 13వ తేదీ ఎన్నికలు జరగనున్నాయి. దీంతో పోలీసులు భద్రతను కట్టుదిట్టం చేస్తున్నారు. అలాగే ఎన్నికల్లో నగదు, మద్యం పంపిణీకి అడ్డుకట్ట వేసేందుకు అనేక చర్యలు తీసుకుంటున్నారు. ఇందులో భాగంగా స్థానిక పోలీసులతో పాటుగా.. ఎన్నికల సంఘం నియమించిన స్పెషల్ ఫ్లయింగ్ స్క్వాడ్‌లు విస్తృతంగా తనిఖీలు నిర్వహిస్తున్నాయి. అయితే ఈ తనిఖీల్లో అక్కడక్కడా డబ్బులు పట్టుబడుతున్న ఘటనలు వెలుగుచూస్తునే ఉన్నాయి. తాజాగా అనంతపురం జిల్లాలో భారీగా నగదు పట్టుబడింది. ఓ కారులో తరలిస్తున్న సుమారు కోటి రూపాయలను పోలీసులు స్వాధీనం చేసుకున్నారు.


అనంతపురం పట్టణంలోని విద్యుత్ నగర్‌ సర్కిల్ వద్ద మంగళవారం పోలీసులు తనిఖీలు నిర్వహించారు. ఇందులో భాగంగా అటుగా వస్తున్న వాహనాలను సోదాలు చేశారు. ఈ క్రమంలోనే అనంతపురం నుంచి కదిరి వైపుగా వెళ్తున్న ఓ ఫార్చూనర్ కారుపై పోలీసులకు అనుమానం కలిగింది. దీనికి తోడు డ్రైవర్ ప్రవర్తన, తత్తరపాటు కూడా పోలీసులకు అనుమానాలు రేకెత్తించింది. దీంతో కారును ఆపిన పోలీసులు.. అందులో తనిఖీ చేసి షాక్ తిన్నారు. రెండు బ్యాగులో భారీగా నగదును తరలిస్తున్నట్లు గుర్తించారు. ఈ నగదుకు సంబంధించి డ్రైవర్ ఎలాంటి పత్రాలు చూపకపోవటంతో పోలీసులు ఆ మొత్తాన్ని సీజ్ చేశారు. ఈ బ్యాగుల్లో సుమారుగా కోటి రూపాయలను తరలిస్తున్నట్లు తెలిసింది.


 ఈ ఘటనపై కేసు నమోదు చేసిన అనంతపురం పోలీసులు.. ఈ డబ్బు ఎవరిది, ఎక్కడికి తరలిస్తున్నారనే దానిపై దర్యాప్తు జరుపుతున్నారు. సరైన పత్రాలు లేకుండా ఇంత మొత్తంలో నగదు తరలిస్తున్న నేపథ్యంలో.. ఎన్నికల్లో పంపిణీకే ఈ డబ్బును తరలిస్తున్నట్లు పోలీసులు అనుమానిస్తున్నారు. మరోవైపు పోలింగ్ తేదీ సమీపిస్తుండటంతో మరింత కట్టుదిట్టంగా తనిఖీలు జరపాలని పోలీసులు నిర్ణయించారు. చెక్ పోస్టుల ఏర్పాటు చేసి వాహనాలను క్షుణ్ణంగా గాలిస్తున్నారు. ఇక ఎన్నికల కోడ్ అమల్లో ఉన్న కారణంగా సరైన పత్రాలు లేకుండా నగదు, బంగారం వెంట తీసుకెళ్లవద్దని పోలీసులు సూచిస్తున్నారు. కోడ్ అమల్లో ఉన్న సమయంలో 50 వేలకు మించి వెంట తీసుకెళ్లాలంటే తప్పనిసరిగా డాక్యుమెంట్లు ఉండాలంటున్నారు.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com