ఎన్నికల వేళ ఏపీవాసులకు రైల్వే గుడ్ న్యూస్.. ఇక నో టెన్షన్

అసలే ఎండాకాలం.. ఆపై సెలవు రోజులు. దీంతో రైళ్లో ప్రయాణించేవారి సంఖ్య పెరుగుతోంది. ఫలితంగా రైళ్లల్లో భారీ రద్దీ ఉంటోంది. ఈ నేపథ్యంలో వేసవిలో ప్రయాణికుల రద్దీని నియంత్రించేందుకు రైల్వే శాఖ పలు చర్యలు చేపడుతోంది. అందులో భాగంగా వేసవిలో ప్రత్యేక రైలు సర్వీసులు నడుపుతోంది. సాధారణ రైళ్లకు అదనంగా వీటిని నడుపుతున్నారు. ఈ క్రమంలోనే దక్షిణ మధ్య రైల్వే మరికొన్ని ప్రత్యేక రైళ్లను ప్రకటించింది. కొన్నిచోట్ల వారాంతాల్లో నడస్తుండగా .. మరికొన్ని మార్గాల్లో మామూలు రోజుల్లోనూ ఈ రైలు సర్వీసులను నడిపిస్తున్నారు. ఏప్రిల్ 27 నుంచి మే నెలాఖరు వరకు ఈ రైళ్లు అందుబాటులో ఉంటాయని దక్షిణ మధ్య రైల్వే ప్రకటించింది. తిరుపతి- శ్రీకాకుళం, కాచిగూడ- కాకినాడ, హైదరాబాద్- నరసాపురం మార్గాల్లో ఈ ప్రత్యేక రైళ్లను నడపనున్నారు.

07025 నంబరు గల సమ్మర్ స్పెషల్ ట్రైన్ కాచిగూడ - కాకినాడ మార్గంలో నడపనున్నారు. మే 9వ తేదీ గురువారం కాచిగూడలో రాత్రి 8 గంటల 30 నిమిషాలకు ప్రారంభం కానున్న ఈ రైలు.. శుక్రవారం ఉదయం ఎనిమిది గంటలకు కాకినాడ చేరుకుంటుంది. అలాగే 07026 నంబరుతో మే 10వ తేదీ శుక్రవారం సాయంత్రం 5 గంటల 10 నిమిషాలకు కాకినాడలో బయల్దేరి.. శనివారం తెల్లవారుజామున 4 గంటల 50 నిమిషాలకు కాచిగూడ చేరుకుంటుంది.అలాగే 07487 నంబరుతో నాందేడ్- కాకినాడ మార్గంలోనూ ప్రత్యేక రైలు అందుబాటులోకి తెచ్చారు. మే 13వ తేదీ మధ్యాహ్నం 2 గంటల 25 నిమిషాలకు నాందేడ్‌లో బయల్దేరనున్న ఈ రైలు.. మరుసటి రోజు ఉదయం 8 గంటల 10 నిమిషాలకు కాకినాడ చేరుకుంటుంది. అలాగే అదేరోజు సాయంత్రం ఆరున్నరకు కాకినాడలో బయల్దేరి మరుసటి రోజు మధ్యాహ్నం మూడుగంటలకు నాందేడ్ చేరుకుంటుంది.

ఇక హైదరాబాద్- నరసాపురం మార్గంలోనూ ప్రత్యేక రైలు ఏర్పాటు చేశారు.మే 11వ తేదీ 07175 నంబరుతో హైదరాబాద్ నుంచి రాత్రి 11 గంటలకు బయల్దేరనున్న ఈ స్పెషల్ ట్రైన్... మరుసటి రోజు ఉదయం 8 గంటల 35 నిమిషాలకు నర్సాపురం చేరుకుంటుంది. అదేవిధంగా మే 13వ తేదీ సాయంత్రం ఆరుగంటలకు 07176 నంబరుతో నర్సాపురం నుంచి బయల్దేరనున్న ప్రత్యేకరైలు.. మరుసటి రోజు ఉదయం ఐదు గంటలకు హైదరాబాద్ చేరుకుంటుందని రైల్వే వర్గాలు తెలిపాయి.

ఇక సికింద్రాబాద్- కాకినాడ రూట్లోనూ ప్రత్యేక రైలు ఏర్పాటు చేశారు. 07271 నంబరుతో మే పదో తేదీ రాత్రి 9 గంటల 20 నిమిషాలకు సికింద్రాబాద్‌ నుంచి బయల్దేరనున్న రైలు.. మరుసటి రోజు ఉదయం ఎనిమిదింటికి కాకినాడ టౌన్ చేరుకుంటుంది. ఇక అదే రోజు రాత్రి 9 గంటలకు కాకినాడ నుంచి బయల్దేరి మరుసటి రోజు ఉదయం ఎనిమిదిన్నరకల్లా సికింద్రబాద్ చేరుకుంటుంది.