ఎయిర్‌పోర్టులో యూట్యూబర్ ఓవరాక్షన్.. టికెట్ కొని విమానం ఎక్కకుండా ఏం చేశాడంటే

 కొందరు సోషల్ మీడియా ఇన్‌ఫ్లూయెన్సర్లు.. తమ ఫాలోవర్లను పెంచుకునేందుకు చేసే కొన్ని చర్యలు ఎదుటివారికి ఇబ్బందికరంగానూ.. చిరాకు తెప్పించే విధంగానూ ఉంటాయి. పొద్దున లేచింది మొదలు రాత్రి పడుకునేవరకు వారు చేసే పనులు అన్నింటినీ వీడియోలు తీసి సోషల్ మీడియాలోకి వదులుతూ ఉంటారు. ఇక వాటికి లైక్‌లు, షేర్లు, కామెంట్లు అంటూ మరో రచ్చకు తెరలేపుతూ ఉంటారు. అయితే ఆ వీడియోలు తీసేందుకు కొందరు ఇన్‌ఫ్లూయెన్సర్లు చేసే సాహసాలు, పనులు తీవ్ర ఇబ్బందికరంగా ఉంటాయి. కర్ణాటకకు చెందిన ఓ యూట్యూబ్ ఇన్‌ఫ్లూయెన్సర్.. బెంగళూరు ఎయిర్‌పోర్టులో చేసిన పని.. పోలీసులకు పట్టించింది.

పబ్లిసిటీ కోసం బెంగళూరులోని యలహంకకు చెందిన 23 ఏళ్ల వికాస్‌ గౌడ చేసిన ఓ వీడియో ప్రస్తుతం అతడ్ని పోలీసులకు పట్టించింది. ఏప్రిల్ 7 వ తేదీన మధ్యాహ్నం 12 గంటల సమయంలో బెంగళూరు నుంచి చెన్నైకి విమానంలో వెళ్లేందుకు వికాస్‌ గౌడ.. ఎయిరిండియా టికెట్‌ బుక్‌ చేసుకున్నాడు. అయితే ఎయిర్‌పోర్టులో సెక్యూరిటీ చెకింగ్ తర్వాత లోపలికి ప్రవేశించాడు. అప్పటివరకు బాగానే ఉన్న వికాస్‌ గౌడ.. ఆ తర్వాతే తన ఇన్‌ఫ్లూయెన్సర్ బ్రెయిన్ వాడాడు. నేరుగా విమానం ఎక్కకుండా.. అదే ఎయిర్‌పోర్టులో తిరుగుకుంటూ వీడియోలు తీశాడు. ఆ వీడియోలను తన యూట్యూబ్ ఛానల్‌లో అప్‌లోడ్ కూడా చేశాడు.

తాను రోజంతా బెంగళూరు ఎయిర్‌పోర్ట్‌లోనే ఉన్నానని.. అయినప్పటికీ తనను ఎవరూ పట్టించుకోలేదంటూ ఏప్రిల్ 12 వ తేదీన ఒక వీడియోను యూట్యూబ్‌ ఛానల్‌లో పోస్ట్ చేశాడు. ఎయిర్‌పోర్ట్ మొత్తం తిరిగానని.. అయినా ఎవరూ తనను పట్టుకోలేదంటూ వికాస్‌ గౌడ తన వీడియోలో వెల్లడించాడు. ఈ సందర్భంగానే బెంగళూరు ఎయిర్‌పోర్టులో సెక్యూరిటీ గురించి చాలా నెగెటివ్‌ కామెంట్లు చేశాడు.

 ఈ వీడియో కాస్తా సోషల్ మీడియాలో వైరల్ కావడంతో అది కాస్తా బెంగళూరు ఎయిర్‌పోర్ట్‌లో సెక్యూరిటీ చూసే సీఐఎస్ఎఫ్ అధికారుల కంట పడింది. దీంతో వికాస్‌ గౌడపై సీఐఎస్ఎఫ్ అధికారులు పోలీసులకు ఫిర్యాదు చేయడంతో వారు రంగంలోకి దిగి అతడిని అరెస్ట్ చేశారు. వికాస్ గౌడపై ఐపీసీ సెక్షన్లు 505, 448 కింద కేసులు కూడా నమోదు చేశారు. అయితే తాను బెంగళూరు నుంచి చెన్నై వెళ్లే విమానం మిస్ అయ్యానని.. ఎయిర్‌పోర్టులో రోజు మొత్తం కాకుండా.. సుమారు 6 గంటల పాటు తిరిగినట్లు విచారణలో తేలిందని సెక్యూరిటీ అధికారులు వెల్లడించారు. ఈ క్రమంలోనే వికాస్ గౌడ సెల్ ఫోన్‌ను స్వాధీనం చేసుకున్న పోలీసులు.. అందులోని వీడియోలను పరిశీలించారు. అయితే అప్పటికే వికాస్ గౌడ ఆ వీడియోను డిలీట్ చేసినట్లు గుర్తించారు. చివరికి తాను చేసింది తప్పేనని వికాస్ గౌడ అంగీకరించడంతో.. సెలబ్రిటీ కోసం అలా చేసినట్లు ఒప్పుకున్నాడు. దీంతో చివరికి వికాస్ గౌడకు బెయిల్ మంజూరు కావడంతో జైలు నుంచి బయటికి వచ్చాడు.