బెంగళూరులో ప్రముఖ నటి, ఆమె భర్తపై దాడిచేసి.. దోపిడికి ప్రయత్నించి అల్లరి మూక

కన్నడ నటి, ఆమె భర్తపై దుండుగులు దాడికి పాల్పడి.. వారి మెడలో నుంచి గొలుసు దోచుకెళ్లే ప్రయత్నం చేశారు. బెంగళూరులో నగరంలో ఏప్రిల్ 2న జరిగిన ఈ ఘటన గురించి ఆమె ఇన్‌స్టాగ్రామ్‌లో పోస్ట్ చేయడంతో వెలుగులోకి వచ్చింది. తన భర్త భువన్‌, కుటుంబసభ్యులతో కలిసి వెళుతున్న సమయంలో పులకేశినగర్‌లో కొందరు దుండగులు దాడి చేసి, తన గొలుసు దోచుకునేందుకు ప్రయత్నించారని కన్నడ నటి హర్షిక పుణచ్చ వాపోయింది. ఆమె ఇన్‌స్టాలో వెల్లడించిన వివరాల ప్రకారం.. ఏప్రిల్ 2న పులకేశినగర్‌లోని కర్మా రెస్టారెంట్‌కు తమ కుటుంబం డిన్నర్‌కు వెళ్లిందని తెలిపింది.

డిన్నర్ పూర్తయిన తర్వాత కారులో కూర్చున్న తమపై కొందరు దాడిచేశారని పేర్కొంది. హఠాత్తుగా ఇద్దరు వచ్చి స్థానిక భాషలో అసభ్యంగా మాట్లాడుతూ, తనను తాకడానికి ప్రయత్నించారని అన్నారు. తన భర్త ముఖంపై గుద్దారని, అయిన ఆయన సహనంతో ఉన్నారని చెప్పారు. కొద్దిసేపటికే 30 మందికిపైగా గుంపు వచ్చి తమ వద్ద ఉన్న విలువైన వస్తువులను దోచుకునేందుకు ప్రయత్నించినట్టు వెల్లడించింది.

గుంపులో ఇద్దరు నా భర్త బంగారు గొలుసును తెంపి లాగడానికి ప్రయత్నించారు... ఆయన అప్రమత్తమై వెంటనే దానిని పట్టుకుని నాకు ఇచ్చారు. వారు కారును ధ్వంసం చేసి మాపై భౌతికదాడికి ప్రయత్నించారు. కారులో మహిళలు, కుటుంబ సభ్యులు ఉండటంతో నా భర్త సంయమనం పాటించారు.. అలాగే, మేము కన్నడలో మాట్లాడటం వల్ల వారికి సమస్య ఉందని నేను గమనించాను. 'యే లోకల్ కన్నడ వాలా హై (వీరు స్థానిక కన్నడ ప్రజలు),' నేను, నా భర్త కన్నడలో మాట్లాడటం వారికి నచ్చలేదు.. వెంటనే ఆ ప్రాంతంలో తనకు తెలిసిన ఇన్‌స్పెక్టర్‌కి కాల్ చేశాను.. ఏమీ జరగనట్లుగా ఒక సెకనులో అక్కడ నుంచి గుంపు వెళ్లిపోయింది.. మేము వారి కోసం వెతకడానికి ప్రయత్నిస్తే వారు కొన్ని సెకన్లలో అదృశ్యమయ్యారు’ హర్షిక తెలిపారు.

అయితే, పోలీసులు తక్షణమే స్పందించలేదని ఆక్రోశించారు. ‘సమీపంలో ఒక పెట్రోలింగ్ వాహనం కనిపించడంతో అక్కడకు వెళ్లి ఏఎస్ఐ ఉమేష్‌కి సంఘటనను వివరించాం.. అతను మాకు సహాయం చేయడానికి ఆసక్తి చూపలేదు.. డిపార్ట్‌మెంట్‌లోని ఉన్నతాధికారులతో మాట్లాడాలని చెప్పాడు.. వచ్చి ఏమి జరిగిందో తెలుసుకునే మర్యాద కూడా పాటించలేదు’ అని వాపోయారు. పోలీసు అధికారి ఉదాసీనంగా వ్యవహరించాడని ఆమె ధ్వజమెత్తారు. అయితే, ఈ ఘటనపై తమకు ఎటువంటి ఫిర్యాదు అందలేదని పోలీసులు పేర్కొన్నారు. ఏప్రిల్ 2న ఈ ఘటన జరిగిందని, బాధితులను మేము సంప్రదించి ఫిర్యాదు చేయాలని కోరామన్నారు. కానీ, వారు మాత్రం కొంత సమయం కావాలని చెప్పినట్టు తెలిపారు.