నెలకు రూ.25వేలు అకౌంట్‌లో వేశారు.. లాభం అని సంబరపడితే ఇదేం ట్విస్ట్

లీజు పేరుతో ట్రాక్టర్లు తీసుకెళ్లి విక్రయించే ముఠాను అరెస్ట్ చేశారు పోలీసులు.. ఉమ్మడి అనంతపురం జిల్లాలో ఓ ఘరానా ముఠా ఈ మోసాలకు పాల్పడింది. నల్లజంగరి రవికుమార్‌, సాకే రామ్మోహన్‌, బయారెడ్డి, కాకర్ల హాజీపీరా, బోగిరెడ్డి చంద్ర ఓబుళరెడ్డి, పెసల నాగమల్లారెడ్డి, సుదర్శన్‌రెడ్డి, తలారి రామలింగేశ్వరరావు, పాణ్యం మల్లికార్జునరెడ్డి, కర్ణాటకలోని చిక్కబళ్లాపుర జిల్లా చాకవేలు గ్రామ వాసి జయచంద్రారెడ్డి, తీగలపల్లి వాసి మధుసూదన్‌రెడ్డి ముఠాగా ఏర్పడ్డారు. వీరంతా ఉమ్మడి అనంతపురం, కడప, కర్నూలు జిల్లాలకు చెందిన వారు.

ఏడాదిగా ఉమ్మడి అనంతపురం జిల్లాలోని పలు ప్రాంతాలకు వెళ్లి పులివెందుల, కడప ప్రాంతాల్లో వివిధ పనుల నిమిత్తం ట్రాక్టర్లు లీజు కావాలని వాహనాల యజమానులను సంప్రదించారు. ప్రతి నెలా రూ.25,000 అకౌంట్‌లోకి జమ చేస్తామని.. నకిలీ అగ్రిమెంట్‌ పత్రాలపై సంతకాల చేయించి ఇచ్చేవాళ్లు. రెండు నెలలపాటు కొందరికి డబ్బుల్ని జమ చేశారు.. ఆ తరువాత ఈ గ్యాంగ్ అడ్రస్ లేకుండా పోయింది. ట్రాక్టర్ల యజమానులు మొబైల్‌లో సంప్రదించినా అందుబాటులోకి రాలేదు.. దీంతో కొందరు తాడిమర్రి పోలీసు స్టేషన్‌లో ఫిర్యాదు చేశారు.

లీజుకు అని చెప్పి తీసుకెళ్లిన వందలాది ట్రాక్టర్లను కేటుగాళ్లు ఉమ్మడి నెల్లూరు, ప్రకాశం, కడప, కర్నూలు, నంద్యాల, గుంటూరు జిల్లాలో తక్కువ ధరకే అమ్మేశారు. అలా వచ్చిన డబ్బుల్ని ముఠాలోని సభ్యులు భాగాలుగా పంచుకునేవారు. ఈ ట్రాక్టర్లు కొనుగోలు చేసిన వ్యక్తులను కూడా వీరు మోసం చేశారు. తక్కువ ధరకు రిజిస్టర్‌ చేయిస్తామని నగదు తీసుకుని మాయం అయ్యేవారు. ఈ ముఠాలోని కీలక సభ్యులైన రవికుమార్‌, బయారెడ్డి, హాజీపీరాలను అరెస్టు చేసినట్లు శ్రీ సత్యసాయి జిల్లా ఎస్పీ మాధవరెడ్డి తెలిపారు. వీరి ఇచ్చిన సమాచారం మేరకు 57 ట్రాక్టర్లను స్వాధీనం చేసుకున్నామన్నారు. వీటి విలువ సుమారుగా రూ.5 కోట్లకు పైగానే ఉంటుందన్నారు. ఇంకా వాహనాలు రికవరీ చేయాలని, ముఠాలోని మిగతా సభ్యులను పట్టుకుని వాటిని స్వాధీనం చేసుకుంటామని ఎస్పీ తెలిపారు. ఇతర జిల్లాలో మకాం వేసి నిందితులను అరెస్టు చేశారు. ట్రాక్టర్లను స్వాధీనం చేసుకున్నారు.