మీరు ఎక్కడెక్కడ ఆధార్ నంబర్ ఇచ్చారో తెలుసా? సింగిల్ క్లిక్‌తో హిస్టరీ మొత్తం తెలిసిపోద్ది

భారత పౌరులకు ఆధార్ కార్డు కచ్చితంగా ఉండాలి. అందరికీ ఒకే గుర్తింపు కార్డు ఉండాలన్న లక్ష్యంతో 2010లో యూపీఏ నేతృత్వంలోని కేంద్ర ప్రభుత్వం ఆధార్ కార్డుల్ని ప్రవేశపెట్టింది. దీనిని ఎక్కడైనా గుర్తింపు కార్డుగా ఉపయోగించుకోవచ్చు. బ్యాంక్ అకౌంట్ తెరవాలన్నా.. పాన్ కార్డు కోసం అప్లై చేయాలన్నా.. కొత్త సిమ్ కార్డు తీసుకోవాలన్నా కూడా ప్రతి దానికి ప్రూఫ్‌గా ఆధార్ కార్డు సమర్పించాల్సిందే. పరీక్షా కేంద్రాల్లో మీ ప్రూఫ్‌గా.. ఇంకా కేంద్ర ప్రభుత్వాలు, రాష్ట్ర ప్రభుత్వాలు ఎన్నో స్కీమ్స్ ఆఫర్ చేస్తుండగా.. వాటి బెనిఫిట్స్ పొందాలంటే కూడా ఆధార్ కార్డు తప్పనిసరిగా ఉండాలి. ఇలా అవసరం ఉన్నటువంటి ప్రతి చోటా మనం ఆధార్ నంబర్ ఇస్తున్నాం.

ఇక మనం ఈ ఆధార్ కార్డును లేదా నంబర్‌ను ఎక్కడెక్కడ ఉపయోగిస్తున్నామో తెలియట్లేదు. చాలా మందికి దీని గురించి పెద్దగా అవగాహన ఉండక పట్టించుకోరు కూడా. ఇలాంటప్పుడే ఆధార్ కార్డు దుర్వినియోగం జరిగే అవకాశాలు కూడా ఉంటాయి. మన ఆధార్ కార్డును ఎవరైనా వేరే వారు వినియోగించే ప్రమాదం కూడా ఉంటుంది. అందుకే అప్రమత్తంగా ఉండాలి. ఇతరులు ఎవరైనా మీ ఆధార్ కార్డును వినియోగిస్తున్నారా? వంటి అనుమానాలు వచ్చినా.. అలాంటివి రావొద్దన్నా కూడా మీరు ముందుగా మీ కార్డు హిస్టరీ తెలుసుకోవాల్సి ఉంటుంది. దీనితో మీ ఆధార్ కార్డును మీ అనుమతి లేకుండా ఎవరైనా వినియోగిస్తే సులువుగా కనిపెట్టొ్చ్చు. ఇతర మోసపూరిత చర్యలకైనా ఎవరైనా పాల్పడుతుంటే కనిపెట్టొచ్చు.

ఆధార్ హిస్టరీ ఎలా చూడాలంటే?

ముందుగా మనం దీని కోసం ఆధార్ కార్డుల్ని జారీ చేసే కేంద్ర విశిష్ట గుర్తింపు ప్రాధికార సంస్థ (UIDAI) అధికారిక వెబ్‌సైట్‌కు వెళ్లాల్సి ఉంటుంది.

అక్కడ ఎడమవైపు My Aadhaar ఆప్షన్‌‌లో మూడో వరుసలో కనిపించే ఆధార్ సర్వీసెస్‌పై క్లిక్ చేయాల్సి ఉంటుంది.

కిందికి స్క్రోల్ చేస్తే ఆధార్ అథెంటికేషన్ హిస్టరీ అనే ఆప్షన్ ఎంచుకోవాలి. తర్వాత లాగిన్ కోసం కొత్త పేజీ ఓపెన్ అవుతుంది.

లాగిన్‌ మీద క్లిక్ చేసి.. ఆధార్ నంబర్, క్యాప్చా కోడ్, ఓటీపీ నంబర్ ఎంటర్ చేసి లాగిన్ కావాలి.

నెక్ట్స్ కనిపించే స్క్రీన్‌లో కిందికి స్క్రోల్ చేయగానే.. అథెంటికేషన్ హిస్టరీ కనిపిస్తుంది. దానిపై క్లిక్ చేయాలి.

అక్కడ మీరు ALL ను ఎంచుకొని.. తేదీ సెలక్ట్ చేసుకొని Fetch Authentication Histroy పై క్లిక్ చేయాలి.

ఆధార్‌కు లింక్ చేసిన ఓటీపీ, డెమోగ్రాఫిక్, బయోమెట్రిక్‌తో మీ ఆధార్ కార్డును 6 నెలలుగా ఎక్కడెక్కడ వినియోగించారనే డేటా కనిపిస్తుంది.