గతేడాది 59 వేల మంది భారతీయులకు అమెరికా పౌరసత్వం.. కానీ, టాప్ వాళ్లే

అమెరికాలో ఉన్నత విద్య, ఆపై మంచి వేతనంతో ఉద్యోగం.. తర్వాత అగ్రరాజ్యం పౌరసత్వం ఇది చాలా మంది విదేశీయుల కల. కానీ, ఈ అవకాశం అతికొద్ది మందికి మాత్రమే దక్కుతుంది. ఈ నేపథ్యంలో గతేడాది 2023లో 59,100 మంది భారతీయులకు అమెరికా పౌరసత్వం లభించింది. అమెరికా సిటిజన్‌షిప్ అండ్ ఇమ్మిగ్రేషన్ సర్వీసెస్ (యూఎస్‌సీఐఎస్) విడుదల చేసిన నివేదిక ప్రకారం.. అత్యధికంగా 1.1 లక్షల మంది మెక్సికో పౌరులకు అమెరికా పౌరసత్వం దక్కింది. ఈ మేరకు 2023 వార్షిక నివేదిక ఇటీవల విడుదల చేసింది. 2023 ఆర్థిక సంవత్సరంలో దాదాపు 8.7 లక్షల మంది విదేశీ పౌరులు అమెరికా పౌరులుగా మారారని తెలిపింది.

అత్యధికంగా మెక్సికన్లు 12.7 శాతం (1.1 లక్షలు) తర్వాతి భారతీయులు 6.7 శాతం (59,100) గా ఉన్నారని రిపోర్ట్ పేర్కొంది. ఫిలిప్పీన్స్ పౌరులు 44,800 (5.1 శాతం), డొమినికన్ రిపబ్లిక్ పౌరులు 35,200 (4 శాతం) ఉన్నారని తెలిపింది. దరఖాస్తుదారుడు అమెరికా ఇమ్మిగ్రేషన్ అండ్ నేషనాలిటి యాక్ట్ (INA) నిబంధనలకు అర్హత సాధిస్తే మాత్రమే పౌరసత్వం లభిస్తుందని వెల్లడించింది. వయసుల వారీగా చూస్తే 18 నుంచి 24 ఏళ్ల మధ్య 75,400, 25 నుంచి 29 ఏళ్ల మధ్య 88,000, 30 నుంచి 34 ఏళ్ల మధ్య 112,300, 35 నుంచి 39 ఏళ్ల మధ్య 123,000, 40 నుంచి 44 ఏళ్ల మధ్య 108,500, 45 నుంచి 49 84,600, 50 నుంచి 54 ఏళ్ల మధ్య 74,300, 55 నుంచి 59 ఏళ్ల మధ్య 65,300, 60 నుంచి 64 ఏళ్ల మధ్య 50,600, 65 ఏళ్ల పైబడినవారు 97,900 మంది ఉన్నారు.

కనీసం ఐదేళ్లపాటు అమెరికాలో చట్టబద్ధ నివాసం, జీవిత భాగస్వామిగా అమెరికా పౌరులు, మిలిటరీ సేవలో ఉండటంతో పాటు పలు సాధారణ నిబంధనలు పౌరసత్వాన్ని పొందేందుకు అర్హతలుగా ఉన్నాయని యూఎస్‌సీఐఎస్ రిపోర్ట్ స్పష్టం చేసింది. ఆర్థిక సంవత్సరం 2023లో అమెరికా పౌరసత్వం పొందినవారిలో చాలా మంది కనీసం 5 ఏళ్లు చట్టబద్ధ నివాసం ద్వారా అర్హత పొందినవారే ఉన్నారని పేర్కొంది. కాగా అమెరికా పౌరులను వివాహం చేసుకున్నవారికి మూడేళ్లలోనే అక్కడ పౌరసత్వం లభిస్తుంది. అమెరికా చట్టం ప్రకారం.. దరఖాస్తుదారులు ఆంగ్ల భాషలో సాధారణ వాడుకలో పదాలను చదవడం, రాయడం, మాట్లాడే సామర్థ్యం, అమెరికా చరిత్ర, ప్రభుత్వం (పౌరశాస్త్రం)పై జ్ఞానం, అవగాహన కలిగి ఉండాలి. సహజసిద్ధమైన పౌరసత్వాన్ని పొందడానికి దరఖాస్తుదారుల దీనికి సంబంధించిన పరీక్షల్లో ఉత్తీర్ణత సాధించాలి..