ట్రెండింగ్
Epaper    English    தமிழ்

ఎకానమీ క్లాస్ టిక్కెట్‌తో బిజినెస్ క్లాస్‌లో సిటింగ్,,,అడ్డుకున్న సిబ్బందిపై మహిళ దాడి

international |  Suryaa Desk  | Published : Tue, Jan 31, 2023, 07:51 PM

ఇటీవల తరుచుగా విమానాల్లో ప్రయాణికుల్లో కొందరి ప్రవర్తన అందరికీ తలనొప్పిగా మారుతోంది. విస్తారా విమానంలో ప్రయాణించిన ఓ మహిళ.. క్యాబిన్ సిబ్బంది పట్ల అనుచితంగా ప్రవర్తించింది. ఎకానమీ క్లాస్‌లో ప్రయాణానికి టిక్కెట్ తీసుకున్న ఆమె.. బిజినెస్ క్లాస్‌లో కూర్చోవడంతో సిబ్బంది అడ్డుకున్నారు. దీంతో తీవ్ర ఆగ్రహానికి గురైన ఆ మహిళ.. క్యాబిన్ క్రూపై దాడికి దిగింది. అంతటితో ఆగకుండా అర్ధనగ్నంగా విమానంలో అటుఇటూ తిరుగుతూ ప్రయాణికులకు ఇబ్బంది కలిగించింది. ఈ ఘటన అబుదాబి-ముంబయి విమానంలో చోటుచేసుకోగా.. సిబ్బంది ఫిర్యాదు ఆధారంగా సోమవారం ఆమెను అరెస్ట్ చేశారు. ఇటలీకి చెందిన పోలా పెర్రుకియో (45) అనే మహిళ.. అబుదాబి నుంచి ముంబయికి విస్తారా ఎయిర్‌లైన్స్ విమానంలో ఎక్కింది.


ఎకానమీ క్లాస్ టిక్కెట్‌తో తీసుకున్న ఆమె బిజినెస్ క్లాస్‌లోకి వచ్చి కూర్చోవడంతో క్యాబిన్ సిబ్బంది అభ్యంతరం చెప్పారు. దీంతో అసహనానికి గురైన ఆమె.. తన నోటికొచ్చినట్టు మాట్లాడింది. అంతటితో ఆగకుండా విమానంలో అటుఇటూ తిరుగుతూ ఒంటి మీద దుస్తులు విప్పేస్తూ సిబ్బంది దాడికి పాల్పడింది. ఆమె అనుచిత ప్రవర్తనకు విసిగిపోయిన సిబ్బంది.. విమానం ముంబయికి చేరుకున్న తర్వాత ఫిర్యాదు చేశారు. ముంబయి పోలీసులు ఆమెను అరెస్ట్ చేసి ఒక్క రోజులో ఛార్జ్‌షీట్ దాఖలు చేశారు. అయితే, ముంబయి కోర్టు ఆమెకు బెయిల్ మంజూరు చేసింది.


‘‘ప్రయాణికురాలి వికృత, హింసాత్మక ప్రవర్తనను దృష్టిలో ఉంచుకుని కెప్టెన్ హెచ్చరిక కార్డును జారీ చేసి, ఆమెను నిరోధించేందుకు నిర్ణయం తీసుకున్నారు.. ఇతర ప్రయాణికుల భద్రతకు భరోసా ఇవ్వడానికి హెచ్చరికలు చేశారు. విమాన ప్రయాణ మార్గదర్శకాలు, మా కఠినమైన స్టాండర్డ్ ఆపరేటింగ్ ప్రొసీజర్‌ల (SOPలు)కు అనుగుణంగా గమ్యస్థానానికి విమానం చేరుకోగానే తక్షణ చర్యలు తీసుకోవాల్సిందిగా భద్రత సిబ్బందికి ఫిర్యాదు చేశాం’’ అని విస్తారా ఓ ప్రకటన విడుదల చేసింది.


మహిళపై పలు సెక్షన్ల కింద కేసు నమోదు చేసే ముందు వైద్య పరీక్షలు నిర్వహించారు. సహ ప్రయాణీకులు, సిబ్బంది, ఇతరుల స్టేట్‌మెంట్‌లను రికార్డ్ చేసినట్టు పోలీసులు తెలిపారు. ఇటీవల కాలంలో విమానంలో తోటి ప్రయాణికులు, సిబ్బంది పట్ల కొందరు వికృత చేష్టలకు పాల్పడిన విషయం తెలిసిందే. ఎయిరిండియా విమానంలో ఇద్దరు మద్యం మత్తులో అనుచితంగా ప్రవర్తించిన ఘటనలపై డీజీసీఏ తీవ్రంగా స్పందించింది.


 






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com