డిప్యూటీ కలెక్టర్ గది డోర్ కొట్టిన డిప్యూటీ తహసీల్దార్

తెలంగాణలో ఐఏఎస్ అధికారి ఇంటికి  డిప్యూటీ తహసీల్ధార్ వెళ్లిన  ఘటన మరవకముందే ఏపీలో అలాంటి ఘటనే ఒకటి చోటు చేసుకొంది. గుంటూరు జిల్లా కాజలో శిక్షణ తీసుకుంటున్న మహిళా డిప్యూటీ కలెక్టర్‌ గది తలుపును డిప్యూటీ తహసీల్దార్‌ కొట్టడం కలకలంరేపింది. ఈ వ్యవహారంపై కేసు నమోదైంది. అనంతపురానికి చెందిన సతీష్‌ డిప్యూటీ తహసీల్దార్‌గా గుంటూరు జిల్లా మంగళగిరి పరిధి కాజ సమీపంలోని ఏపీ హెచ్‌ఆర్‌డీఐ కేంద్రంలో శిక్షణ తీసుకుంటున్నారు. అక్కడే మరో మహిళా డిప్యూటీ కలెక్టర్‌ కూడా శిక్షణ కోసం వచ్చారు.

ఇంతలో అర్ధరాత్రి దాటిన తర్వాత సతీష్‌ శిక్షణ కేంద్రం వసతిగృహం వీకేఎన్‌కే అపార్ట్‌మెంట్‌ డిప్యూటీ కలెక్టర్‌ ఉండే గది తలుపులు కొట్టారు. వెంటనే ఆమె 112కి ఫోన్‌ చేసి ఫిర్యాదు చేయడంతో.. సమాచారం అందుకున్న మంగళగిరి రూరల్ పోలీసులు అక్కడికి చేరుకున్నారు. తలుపు కొట్టిన డిప్యూటీ తహసీల్దార్‌ని అదుపులోకి తీసుకుని పోలీసు స్టేషన్‌కు తరలించారు. మహిళా డిప్యూటీ కలెక్టర్‌ ఇచ్చిన ఫిర్యాదుతో కేసు నమోదు చేసిన పోలీసులు.. దర్యాప్తు చేస్తున్నారు. అసలు డిప్యూటీ తహసీల్దార్ అక్కడికి ఎందుకు వెళ్లారో ఆరా తీస్తున్నారు. పూర్తి వివరాలు తెలియాల్సి ఉంది.

ఇదే తరహా ఘటన హైదరాబాద్‌లో కూడా జరిగింది. తెలంగాణ ముఖ్యమంత్రి కార్యాలయ ఐఏఎస్ అధికారిణి ఇంట్లోకి డిప్యూటీ తహసీల్దార్ చొరబడిన ఘటన కలకలంరేపింది. అధికారిణి ఇంటి మొదటి అంతస్తులోకి వెళ్లి ఆనంద్ కుమార్ రెడ్డి తలుపు తట్టాడు. అతడిని చూసి షాకైన ఆమె.. వెంటనే పోలీసులకు సమాచారం అందించారు. పోలీసులు డిప్యూటీ తహసీల్దార్‌తో పాటూ అతడి స్నేహితుడ్ని అరెస్ట్ చేశారు. వారిని కోర్టులో హాజరుపరచగా రిమాండ్ విధించారు.