కింగ్ కోబ్రాకు స్నానం...సోషల్ మీడియాలో వీడియో వైరల్

సాహసం చేయరా డింబకా అన్న నానుండి ఈ వీడియోలోని వ్యక్తికి కచ్చితంగా సరిపోలుతుంది. పాములంటే భయపడని వారుండరు. ఎందుకంటే కాటేస్తే కైలాసానికే అనే అవగాహన అందరికి ఉంది. కానీ ఈ మధ్య కాలంలో పెద్ద పెద్ద పాములను అవలీలగా పట్టుకున్నవాళ్లను చూస్తున్నాం. కాటేసిందనే కోపంతో దానిని కొరికి.. కసి తీర్చుకున్నవాళ్లను చూశాం. లేదా వాటిని మెడలో వేసుకుని ధైర్యంగా తిరిగిన వాళ్లను చూశాం. వీటికి సంబంధించిన వీడియోలు సోషల్ మీడియాలో ఓ రేంజ్‌లో ట్రెండ్ అయ్యాయి.

తాజాగా పాముకు సంబంధించిన మరో ఆశ్చర్యకరమైన వీడియో.. అందరి దృష్టిని ఆకర్షించింది. దానిని చూసిన వారు ఔరా అనుకోకుండా ఉండరు. సాధారణంగా పాములంటే జాగ్రత్తగా ఉంటాం. కానీ ఓ వ్యక్తి బారెడు పొడవున్న పాముకు శ్రద్ధగా స్నానం చేయించాడు. ఇంటి బాత్రూమ్‌లో కుక్కపిల్లకి స్నానం చేయించినట్టుగా కోబ్రాకి స్నానం చేయించాడు. ఈ వీడియో నెట్టింట వైరల్ అవుతుంది. అందులో కింగ్‌ కోబ్రాకి ఓ వ్యక్తి తల మీద నుంచి నీళ్లు పోస్తూ స్నానం చేయిస్తున్నాడు. సబ్బు పెట్టి మరీ స్నానం చేయించాడు. ఆ పాము అతడు నీళ్లు పోస్తున్న మగ్గును చాలాసార్లు కాటేస్తూనే ఉంది. కానీ ఓ వ్యక్తి మాత్రం అదేం పట్టించుకోకుండా.. దానికి స్నానం చేయించే పనిలోనే నిమగ్నమైపోయాడు.

ఇన్‌స్ట్రామ్‌లో దర్శనమిచ్చిన ఈ వీడియోకి మహిళలు పురుషుల కంటే ఐదు శాతం ఎక్కువగా బతకడానికి కారణం ఇదేనంటూ క్యాప్షన్ కూడా పెట్టారు. మగవాళ్లు ఇలాంటి డేరింగ్ స్టంట్స్ చేస్తుంటారని, అందువల్ల ఎక్కువ కాలం జీవించరంటూ స్టేట్‌మెంట్లు ఇచ్చేస్తున్నారు. ఈ వీడియోని చూసిన వాళ్లు షాక్ అవుతున్నారు. కానీ దీనిని వేలాదిమంది లైక్ చేస్తున్నారు. ఇక దీనిని చూసిన వాళ్లు.. కామెంట్ సెక్షన్‌లో పలు ఏమోజీలతో నింపేస్తున్నారు. అయితే గతంలో కూడా ఇలాంటి ఘటనలు చోటుచేసుకున్నాయి. పాములు పట్టుకునే స్నేక్ స్నాచర్‌లు పాములకు బురదు ఉందనే కారణంతో వాటికి స్నానం చేయించిన సంఘటనలు ఉన్నాయి. కానీ ఇలా ఇంట్లో బాత్రూమ్‌లో శ్రద్ధగా స్నానం చేయించడం కొంత ఆశ్చర్యానికి గురి చేస్తోంది.