హర్మన్‌కు ఆ డాషింగ్ ఓపెనరే ఆదర్శం

హర్మన్ ప్రీత్ కౌర్‌కు మాజీ క్రికెటర్, భారత డాషింగ్ ఓపెనర్ వీరేంద్ర సెహ్వాగే ఆదర్శమట. సెహ్వాగ్ ఆటతోనే స్ఫూర్తి పొంది హర్మన్.. తన బ్యాటింగ్ తీరును మెరుగుపరుచుకుందని ఆమె సోదరి హెమ్‌జిత్ తెలిపింది. ‘హర్మన్ ఆరాధ్య క్రికెటర్ సెహ్వాగే. సెహ్వాగ్ ఆటను బాగా ఆస్వాదించేది’ అని ఆమె పేర్కొంది. అంతేకాకుండా హర్మన్‌కు విరాట్‌లోని దూకుడు కూడా ఉందని ఆమె చెప్పుకొచ్చింది. మహిళల వన్డే ప్రపంచకప్‌లో భాగంగా గురువారం (జులై 20) జరిగిన సెమీ ఫైనల్ మ్యాచ్‌లో హర్మన్ అద్భుతంగా చెలరేగడంతో ఆస్ట్రేలియాను సునాయాసంగా ఓడించి, భారత్ ఫైనల్‌కు చేరిన సంగతి తెలిసిందే.

'చిన్న నాటి నుంచి హర్మన్.. అబ్బాయిలతోనే ఎక్కువగా క్రికెట్ ఆడేది. ఎప్పుడూ పరుగుల కోసం పరితపించే ఆమె బ్యాటింగ్ తీరును మెరుగు పరచుకోడానికి బాగా కష్టపడేది. హర్మన్ ఎప్పుడూ పాజిటివ్‌గా ఆలోచిస్తుంది. మైదానంలో విరాట్ కోహ్లిలా దూకుడు ప్రదర్శించే ఆమె.. ఇంట్లో మాత్రం కూల్ అండ్ కామ్’ అని హెమ్‌జిత్ తెలిపింది.

హర్మన్‌కు ఆమె తండ్రి హర్మందర్ సింగే రోల్ మోడలట. ఆయన కూడా మంచి క్రికెటరే. అంతేకాకుండా హర్మన్‌కు ఆయనే తొలి కోచ్. ‘అర్థిక ఇబ్బందుల కారణంగా మా నాన్న క్రికెట్‌లో ఎదగలేకపోయాడు. ఆయన తన కలను ఇప్పుడు హర్మన్ రూపంలో నిజం చేసుకున్నారు' అని హెమ్‌జిత్ గర్వంగా చెబుతోంది.హర్మన్ ప్రీత్ కౌర్‌ అదిరే ఆటతో ఇండియా ఫైనల్‌కు దూసుకెళ్లడంతో దేశంలో సంబరాలు అంబరాన్నంటాయి. పంజాబ్‌లోని మోగాలో హర్మన్ కుటుంబ సభ్యుల ఆనందోత్సాహాలు అంతా ఇంతా కాదు. సోషల్ మీడియాలో ఇప్పుడు అన్నీ హర్మన్ ప్రీత్‌ వార్తలే. ఆమెకు అభినందనలు తెలుపుతూ ట్వీట్ల వర్షం కురిపిస్తున్నారు.