వ్యాపారవేత్త భార్యను హత్యచేసిన జిమ్ ట్రైనర్.. 4 నెలల తర్వాత కలెక్టర్ బంగ్లాలో బయటపడిన శవం

నాలుగు నెలల కిందట కనిపించకుండా పోయిన ఓ వ్యాపారవేత్త భార్య.. కలెక్టర్ బంగ్లా సమీపంలో శవమై తేలింది. సంచలన ఈ ఘటన ఉత్తర్ ప్రదేశ్‌లోని కాన్పూర్‌లో వెలుగులోకి వచ్చింది. పోలీసులు వెల్లడించిన వివరాల ప్రకారం.. కాన్పూర్‌కు చెందిన ఓ వ్యాపారి భార్య జూన్ 24 న అదృశ్యమైంది. దీనిపై ఆమె కుటుంబసభ్యులు ఫిర్యాదు ఆధారంగా కేసు నమోదుచేసిన పోలీసులు.. దర్యాప్తు చేపట్టారు. అయితే, ఆమె భర్త కాన్పూర్‌లోని గ్రీన్ పార్క్ సమీపంలో ఫిట్‌నెస్ సెంటర్ నిర్వహిస్తోన్న విమల్ సోనీపై అనుమానం వ్యక్తం చేశాడు. అతడే తన భార్యకు హత్యచేసి ఉంటాడని పేర్కొన్నాడు. ఆమె అదృశ్యమైన రోజు నుంచి విమల్ కూడా కనిపించకపోవడంతో అతడ్ని కోసం పోలీసులు ముమ్మరంగా గాలించారు.

తన జిమ్‌కు తరుచూ వచ్చే వ్యాపారి భార్యకు విమల్‌తో ఏర్పడిన పరిచయం సంబంధానికి దారితీసిందని కాన్పూర్ నార్త్ డీసీపీ శ్రవణ్ కుమార్ సింగ్ తెలిపారు. అతడికి పెళ్లి కుదిరిన విషయం తెలిసి ఆమె కలత చెంది కొద్ది రోజుల జిమ్‌కు వెళ్లలేదని తెలిపారు. అతడి నిశ్చితార్దరం జరిగిన 20 రోజుల తర్వాత జూన్ 24న జిమ్‌కి వచ్చిందని అన్నారు. ఇదే విషయమై ఆమె ప్రశ్నించగా.. బయటకు వెళ్లి మాట్లాడుకుందామని చెప్పాడని డీసీపీ పేర్కొన్నారు. ఇద్దరూ కలిసి కారులో వెళ్తుండగా వాగ్వాదం జరిగిందని, ఈ క్రమంలో ఆమె మెడపై విమల్ బలంగా కొట్టడంతో స్పృహ‌ కోల్పోయిందని, ఆ తర్వాత ఆమెను హత్య చేశాడన్నారు. ఆమె శవాన్ని కాన్పూరు జిల్లా కలెక్టర్ బంగ్లా సమీపంలో పాతిపెట్టి పరారయ్యాడు.

నిందితుడు మొబైల్ ఫోన్ తన వెంట తీసుకెళ్లకపోవడంతో అతడి జాడ తెలుసుకోడానికి పోలీస్ బృందాలను పుణే, ఆగ్రా, పంజాబ్ రాష్ట్రాలకు పంపారు. చివరకు నిందితుడు నాలుగు నెలల తర్వాత పట్టుబడటంతో అరెస్ట్ చేశారు. విచారణలో తాను హత్య చేసి.. శవాన్ని కలెక్టర్ బంగ్లా సమీపంలో పాతిపెట్టినట్టు చెప్పాడు. అయితే, ఆ ప్రదేశం తవ్వడంతో మహిళ మృతదేహం బయటపడిందని, ఆమెను అదృశ్యమైన వ్యాపారవేత్త భార్యగా గుర్తించామని పోలీసులు తెలిపారు. ఆమె వద్ద ఉన్న విలువైన ఆభరణాలు కూడా అతడే తీసి ఉంటాడని అనుమానిస్తున్నారు. దీనిపై ప్రశ్నిస్తున్నామని చెప్పారు.