రాజకీయాల్లో బేబీనే.. కానీ భయపడను.. మొదటి స్పీచ్‌లో అదరగొట్టిన విజయ్

తమిళ రాజకీయ యవనికపైకి మరో నూతన పార్టీ దూసుకువచ్చింది. సినిమాల్లో నుంచి రాజకీయాల్లోకి ఎంట్రీ ఇచ్చిన తమిళ హీరో విజయ్.. తన పార్టీ సిద్ధాంతాలు ఏమిటో, ఎందుకోసం తాను రాజకీయాల్లోకి వచ్చానో ప్రజలకు వివరించారు. తమిళనాడులోని విల్లుపురం జిల్లా విక్రవాండిలోని వీసాలైలో తమిళగ వెట్రి కళగం (టీవీకే) ఆవిర్భావ సభ, తొలి మహానాడు జరిగింది. ఈ సమావేశంలో అశేష కార్యకర్తలను ఉద్దేశించి మాట్లాడిన విజయ్.. తన పార్టీ సిద్ధాంతాలు ఏమిటనేదీ స్పష్టం చేశారు. రాజకీయాల్లోకి రావాలన్న నిర్ణయం పూర్తి అవగాహనతో తీసుకున్నానన్న విజయ్.. వెనకడుగు వేసే ప్రసక్తే ఉండదన్నారు. ఏ టీమ్, బీ టీమ్ అనే తప్పుడు ప్రచారాలతో టీవీకే పార్టీని ఓడించలేరని ప్రత్యర్థుల విమర్శలకు దీటైన సమాధానం ఇచ్చారు.

రాజకీయాల్లో విజయాలు, ఓటముల గురించి అన్నీ తెలుసుకున్న తర్వాతే.. హీరోగా కెరీర్ ఉన్నత స్థానంలో ఉన్నప్పుడే వదిలేసి మీ కోసం, మిమ్మల్ని నమ్మి మీ విజయ్‌గా మీ ముందు నిలుచున్నానంటూ అభిమానులు, కార్యకర్తలను ఉద్దేశించి ప్రకటించారు. పూర్తి అవగాహన ఉండే రాజకీయాల్లోకి రావాలని నిర్ణయించుకున్నానన్న విజయ్.. ఇక వెనుకడుగు వేసేది లేదని ప్రకటించారు. రాజకీయాల్లో చిన్నపిల్లాడిని అని కొంతమంది అంటున్నారని.. చిన్నపిల్లాడిని అయినా రాజకీయం అనే పాముతో ఆడుకునే పిల్లాడినని, దేనికీ భయపడనని అన్నారు. తనను సినిమా ఆర్టిస్ట్ అంటూ కొందరు పేర్కొంటున్నారన్న విజయ్.. తమిళనాట ఎంజీఆర్.. ఏపీలో ఎన్టీఆర్ రాజకీయాల్లో తమదైన ముద్ర వేసిన సంగతిని గుర్తుచేశారు.

ఇక ఆవిర్భావ దినోత్సవంలో అధికార డీఎంకే పార్టీపైనా విజయ్ విమర్శలు గుప్పించారు. ద్రవిడియన్ మోడల్ అని చెప్తూ ప్రజా వ్యతిరేక పాలనను నడుపుతూ ప్రజలను మోసం చేస్తున్నారని విమర్శించారు. తాము ఎవరిపైనా విమర్శలు చేయడానికి ఇక్కడకు రాలేదని.. ప్రజల కోసం పనిచేసేందుకు వచ్చామని చెప్పారు సిద్ధాంతపరంగా ద్రవిడ జాతీయవాదం, తమిళ జాతీయవాదం అని వేరుచేసి చూడలేమన్న విజయ్.. అవి ఈ నేలకు ఉన్న రెండు కళ్లులాంటివన్నారు. లౌకిక సామాజిక న్యాయ సిద్ధాంతాలే తమ టీవీకే సిద్ధాంతమన్నారు. విభజన వాదాన్ని ప్రోత్సహించే పార్టీలను టీవీకే సిద్ధాంతపరంగా విభేదిస్తుందన్న విజయ్.. ప్రతిదీ, ప్రతి ఒక్కరికీ అనే నినాదంతో తమ పార్టీ పనిచేస్తుందన్నారు.

రాజకీయాల్లో లింగ సమానత్వం తేవడానికి కేవలం మాటలు సరిపోవన్న విజయ్.. చర్యలు కూడా కావాలని అన్నారు. తమ పార్టీ లింగ సమానత్వానికి పెద్దపీట వేస్తుందని చెప్పుకొచ్చారు. వన్ కమ్యూనిటీ, వన్ గాడ్ అనే సిద్ధాంతంతో తమ పార్టీ ముందుకు వెళ్తుందని ఆవిర్భావసభలో విజయ్ ప్రసంగించారు. 2026లో తమిళనాడు ఎన్నికలు జరగనున్నాయన్న విజయ్.. ఎన్నికల్లో తమను ఆశీర్వదించాలని కోరారు.