బ్రిటన్ రాణి కారును కొనుగోలు చేసిన భారతీయుడు.. ప్రత్యేకతలివే

ప్రముఖ వ్యాపారవేత్త, పూనావాలా గ్రూప్ మేనేజింగ్ డైరెక్టర్ యోహాన్ పూనావాలా.. దివంగత బ్రిటన్ రాణి ఎలిజబెత్-2 వాడిని కారును కొనుగోలు చేశారు. లగ్జరీ కార్లంటే ఎంతో ఇష్టం ఉన్న యోహన్ పూనావాలా.. వేలంలో ఉంచిన ఎలిజబెత్ 2 కు చెందిన రేంజ్ రోవర్ కారును దక్కించుకున్నారు. అయితే బ్రిటన్ రాణి ఉపయోగించిన కారును కొనుగోలు చేయడం చాలా సంతోషంగా ఉందని పూనావాలా వెల్లడించారు. అయితే తాను కొనుగోలు చేసి తర్వాత కూడా ఆ కారు రిజిస్ట్రేషన్ నంబర్‌ను అదే కొనసాగించడం తనకు లభించిన బోనస్ అని పేర్కొన్నారు. ఇక ఆ కారులో ఎలాంటి మార్పులు చేయకుండా అలాగే తాను ఉపయోగిస్తానని యోహన్ పూనావాలా స్పష్టం చేశారు.

ఈ రేంజ్ రోవర్ కారును బ్రామ్లీ యాక్షనీర్స్ వెబ్‌సైట్‌లో ధర 2.24 లక్షల పౌండ్లు అంటే భారత కరెన్సీలో రూ.2.25 కోట్లకు పైనే నిర్ణయించారు. అయితే వేలం నిర్వహిస్తే ఈ కారు ధర ఎంత పలుకుతుందో చెప్పలేం. కానీ ఈ కారును ఎలాంటి వేలం ప్రక్రియ చేపట్టకుండానే యోహన్ పూనావాలా ప్రైవేట్‌గా కొనుగోలు చేసి సొంతం చేసుకున్నారు. అయితే ఆ కారుకు ఎంత ధర చెల్లించి పూనావాలా సొంతం చేసుకున్నారన్న విషయాన్ని మాత్రం ఎవరూ వెల్లడించలేదు.

సాధారణంగా రాజ కుటుంబం నుంచి బయటికి వచ్చిన కారు రిజిస్ట్రేషన్ నంబర్‌ను మార్చేస్తూ ఉంటారు. కానీ ఈ కారుకు దివంగత రాణి ఎలిజబెత్ 2 ఉపయోగించిన రిజిస్ట్రేషన్ నంబర్‌ను అలాగే ఉంచడం గమనార్హం. 2016 మోడల్‌కు చెందిన ఈ రేంజ్ రోవర్ కారు.. ఎస్‌డీవీ 8 ఆటోబయోగ్రఫీ ఎల్‌డబ్ల్యూడీ ఎడిషన్‌ది. ఆ కారు ఇప్పటివరకు దాదాపు 18 వేల మైళ్లు అంటే 29 వేల కిలోమీటర్లు ప్రయాణించింది. అయితే ఈ కారును బ్రిటన్ రాజ కుటుంబం కోసం ప్రత్యేకంగా తయారు చేశారు. దీంతో ఆ కారు ఎడిషన్‌లోని ఫీచర్లు ఇతర కార్లతో పోల్చితే పూర్తిగా భిన్నంగా ఉంటుంది. రాజ కుటుంబ అవసరాలకు తగ్గట్లు ఆ కారును రూపొందించారు.

కారులో పోలీసు ఎమర్జెన్సీ లైటింగ్, రహస్య లైటింగ్, ప్రత్యేక మెట్లు ఏర్పాటు చేశారు. క్వీన్ ఎలిజబెత్ 2 కారు లోపలికి ఎక్కడానికి.. కిందికి దిగడానికి వీలుగా కారు వెనుక భాగంలో గ్రాబ్ హ్యాండిల్స్‌ను కూడా ఏర్పాటు చేశారు. అయితే తాను కారును కొనుగోలు చేసినా.. అందులో మార్పులను మాత్రం అలాగే ఉంచుతామని యోహన్ పూనావాలా స్పష్టం చేశారు. ఇవే కాకుండా కారులో షూటింగ్ స్టార్ హెడ్‌లైనర్, హెడ్‌రెస్ట్‌పై ఆర్ఆర్ మోనోగ్రామ్, మసాజ్ సీట్లు, ప్రైవసీ గ్లాస్, డ్రైవర్ అసిస్టెన్స్ సిస్టమ్ వంటి అదనపు ఫీచర్లు కూడా ఉన్నాయి.