గత మూడు చిత్రాల నుంచి గమనిస్తే జూనియర్ ఎన్టీఆర్లో ఎంత మార్పు వచ్చిందో కొట్టొచ్చినట్లు కనిపిస్తోంది. టెంపర్, నాన్నకు ప్రేమతో, జనతా గ్యారేజ్ ఈ మూడు సినిమాల్లో కూడా వేర్వేరు లుక్స్తో కనిపించి ప్రేక్షకులను మెప్పించాడు. తనకు సరిపడే కథలను ఎన్నుకోవడంతో పాటు తన హెయిర్ స్టయిల్ నుంచి కాస్ట్యూమ్స్ వరకు ఇలా ప్రతిదానిలో కొత్తదనాన్ని కోరుకుంటున్నాడు. తాజాగా ఎన్టీఆర్.. బాబీ దర్శకత్వంలో నటిస్తున్నాడని తెలిసినప్పటి నుంచి సినిమాలో తన లుక్ ఎలా ఉండబోతుందనే ఆసక్తి అందరిలో కనిపిస్తోంది.
ఈ సినిమాలో ఎన్టీఆర్ కవలలుగా, ఆ కవల పిల్లలకు తండ్రిగా మూడు పాత్రల్ని పోషిస్తున్నాడు. ఫిబ్రవరి 15 నుంచి సినిమా రెగ్యులర్ షూటింగ్ మొదలైంది. అయితే ఇప్పటివరకు ఎన్టీఆర్ ఈ షూటింగ్లో పాల్గొనలేదు. దానికో కారణం ఉందని చెబుతున్నారు. ప్రస్తుతం ఎన్టీఆర్ తన లుక్ను మార్చుకునే పనిలో పడ్డాడు. అందుకోసం ప్రత్యేకంగా ఓ ట్రైనర్ను నియమించుకొని కసరత్తులు చేస్తున్నాడు. తన శరీర బరువును మరింత తగ్గించుకోవడానికి ఎన్టీఆర్ ప్రయత్నిస్తున్నాడు. ఈ క్రమంలో దర్శకుడు బాబీ ఇతర నటీనటులతో సన్నివేశాల్ని పూర్తి చేస్తున్నాడు. ఎన్టీఆర్ సెట్స్పైకి రావడానికి మరికొంత సమయం పడుతుందని చెబుతున్నారు.